KAMBʼAL 8
Kʼuʼkaʼa Walak U Chaʼik U Yantal a Kʼas y Yajilal a Dʼios?
1. Bʼikiʼ ti kaji a kʼasil?
A Dʼioso chukul u chaʼa ti a winik ti kaʼ u chʼaʼ u bʼejnil tubʼajil junpul maʼ jedʼeʼek u paatal u jobʼes a probʼlema
Kaji a kʼasil yokʼolkabʼ leʼek ti yaax uchi u tus a Kisin. Aj maʼloʼ ʼaanjel ti kulaji, pero «maʼ yan a jaj etel». (Juan 8:44) Kaji u tzʼile ti kaʼ tzʼabʼäk u yanil jabʼix a Dʼios. A Kisin uchi u tus tiʼi ix primero chʼup, ix Eva y u emsaj u yool ti kaʼ tzʼoksajbʼäk tuwich a Dʼios. Adʼan u yetʼokta ix Eva ti maʼ u tzʼoksik a Dʼioso. Leʼek a tukul u bʼetaj a Adʼan u talesaj a yajilal y kimil. Xoko Romanos 5:19; 2 Corintios 11:3.
Leʼek kaʼ u yadʼaj a Kisin tiʼi ix Eva ti maʼ u tzʼoksik a Dʼioso, u kajsaj a chichpolil ti a Dʼioso, wa xan u chʼaʼbʼäl u kuuchil a Dʼioso. Ti u masil a kristiyaano u täkʼäntajooʼ a Kisin ti maʼ u kʼatiintik a Dʼios tiʼijooʼ u yaj Chʼaʼbʼej. Mentäkä leʼek a Kisin a «walac u täcaa yocolcab.» Xoko Juan 14:30; 1 Juan 5:19.
2. Yan wa kʼuʼ a maʼ kiʼ ichil u bʼetaj a Dʼioso?
Tulakal u meyaj a Dʼios laj maʼloʼ. Leʼek a kristiyaano etel a ʼaanjelooʼ leʼek u bʼetaj a Dʼios, jedʼeʼekooʼ u tzʼoksik a Dʼioso. (Deuteronomio 32:4, 5) Leʼek ti bʼetajbʼoon u men a Dʼioso chaʼan toʼon kaʼ ti bʼeteʼ a kiʼ wa xan a maʼ kiʼ. Leʼek a chaʼkʼäʼil abʼeʼe tzʼajaʼan toʼon kaʼ ti yeʼ ti yakunaj tiʼi a Dʼioso. Xoko Santiago 1:13-15; 1 Juan 5:3.
3. Kʼuʼkaʼa tan u chaʼik Dʼios kaʼ yanak a yajilal ʼaasto takleebʼ?
Chen tzʼeek tiempo, a Jehovah tan u chaʼik a chichpolil a tan tiʼi. Kʼuʼkaʼa? Ti kaʼ u yeʼ ti wa maʼ yan a Dʼios ichilooʼ u kuxtal maʼax kʼuʼ a jedʼeʼekooʼ u bʼetik a kristiyaano. (Eclesiastes 7:29; 8:9) Tupach 6,000 jaabʼ u kuentajil a kristiyaano, a winiki maʼ jedʼeʼek u jobʼsik a gera, kʼasil, maltratarbʼäl, y kʼojaʼanil. Xoko Jeremias 10:23; Romanos 9:17.
U gobʼienar a winiki maʼ jabʼix a tiʼi a Dʼioso, bʼel u kaʼa u yilaʼ u kiʼil mak kaʼ u kʼamʼoolte a tiʼi a Dʼioso. (Isaias 48:17, 18) Seebʼaʼan u laj jobʼsik u gobʼierno a winik a Jehovah. Jadʼi a kristiyaano a kaʼ u chaʼa kaʼ chʼaʼbʼäk u bʼejnil u men a Dʼioso, bʼel u kaʼ ti kuntal tuwich yokʼolkabʼ.—Isaias 11:9. Xoko Apocalipsis 11:15.
Cha’ante a vid’eo’ Why Does God Allow Suffering?
4. Kʼuʼ a tan u chaʼik toʼon kaʼ ti bʼeteʼ u paciencia a Dʼioso?
A Kisin u yadʼaj ti maʼax mak bʼel u kaʼa u tzʼaaʼ u yanil a Jehovah ich yakunajil. A kʼati wa yeʼ ti tus abʼeʼe? Jedʼeʼeke! A Dʼioso paciencia tan u chaʼik toʼon kaʼ ti yeʼ wa bʼel ti kaʼa ti täkʼänte a tiʼi wa xan a tiʼi a winik. Walak ti yeʼik kʼuʼ ti kʼati leʼek bʼikiʼ ti walak ti bʼensik ti kuxtal. Xoko Apocalipsis 12:10; 2 Pedro 3:9.
5. Bʼikiʼ ti jedʼeʼek ti käxtik a Dʼios tiʼi ti wa Chʼaʼbʼej?
Leʼek kʼuʼ a tan ti bʼetik tan u yeʼik wa ti kʼati u chʼaʼbʼej a Dʼioso
Jedʼeʼek ti käxtik a Dʼios tiʼi ti wa Chʼaʼbʼej tanil ti käxtik y bʼetik a tan u yeʼik a jajil tzʼoksaj a yan ichil u Tʼan a Dʼios, a Bʼibʼle. (Juan 4:23) Jedʼeʼek ti kulpachtik a Kisin tiʼi ti wa chʼaʼbʼej leʼek ti maʼ ti oksik ti bʼajil ich politikojil y gera jabʼixlik u bʼetaj a Jesus. Xoko Juan 17:14.
A Kisin tan u usartik u mukʼ ti kaʼ mas yanak a käjtal etel kaʼax makak y kaʼ ti bʼeteʼ a bʼaʼal a yaj. Leʼek ti maʼ taʼach ti bʼetikooʼ abʼeʼe yan ti ʼamiigojooʼ, ti wetʼokil, maʼ kiʼooʼ tuwich walakooʼ u pʼaʼastikoʼon. (1 Pedro 4:3, 4) Aleebʼe toʼon tun pʼatal kʼuʼ a bʼel ti kaʼa ti bʼeteʼ. Bʼel wa ti kaʼ ti wetʼoktooʼ a kristiyaano a yaj u yubʼooʼ a Dʼioso? Bʼel wa ti kaʼ ti tzʼokes u ley leʼek a walak u talel ichil u yakunaj y u tukul a Dʼioso? Wa kaʼ ti bʼeteʼ, ti nuuktaj tun a Kisin ti kaʼ u yadʼaj ti chen bʼel ti kaʼ ti puerciarbʼäl ti bʼeteʼ kʼuʼ u kʼati a Dʼios. Xoko 1 Corintios 6:9, 10; 15:33.
Leʼek u yakunaj a Dʼios tiʼijooʼ a kristiyaano tan u yadʼik ti bʼel u kaʼa ti jobʼol a kʼasil y yajilal. Leʼek mak tan u yeʼik y u tzʼoksik adʼaʼa bʼel u kaʼa ti kuxtal ti bʼebʼeel yokʼolkabʼ. Xoko Juan 3:16.