KAMBʼAL 30
Jedʼeʼekooʼ u kaʼ Kuxtal a Mak a Kimenooʼ Tiʼitech!
A kimili yajʼolal a walak u tzʼeeke, maʼ kiʼolal. Mentäktun a Bʼibʼle u yadʼaj ti jabʼix juntuul elemiingoj a kimili. (1 Corintios 15:26) Jabʼix ti känaj ichil a kambʼal 27, kʼochol u kaʼa u kʼinil ti leʼek a Jehovah bʼel u kaʼa u jobʼes a elemiingoj adʼaaʼ. Pero kʼuʼ a bʼel u kaʼa ti uchul tiʼijooʼ adʼooʼ a ak kimooʼo? Yan a promesaj a tan u promesaartiktoʼon a Jehovah a mil u kiʼil u yoolili. Mil u yaabʼil a kimen bʼelooʼ u kaʼa ti kaʼ kuxtal y jedʼeʼekooʼ u kuxtal ti bʼebʼeel. Top jedʼeʼek wa u kaʼ kuxtalooʼ a kimene? Bʼelooʼ wa u kaʼa likʼsabʼäl tiʼi kaʼ xikooʼ ti kaʼan jabʼix tiʼi kaʼ kunlakooʼ tuwich yokʼolkabʼ?
1. Kʼuʼ u kʼati a Jehovah tiʼijooʼ a mak a kimenooʼ tiʼitoʼono?
A Jehovah u kʼati u kaʼ kuxkintooʼ a kimene. Yan a juntuul winik aj Job u kʼabʼaʼ, mukʼaʼan u tzʼokʼsaj ichil a Dʼioso y u yeel ti maʼ bʼel u kaʼa tubʼsajbʼäl umen Dʼios wa kaʼ kimik. U yadʼaj tiʼi a Dʼioso: «Bʼel a kaʼa a päyeen y bʼel in kaʼa in nuukteech [ichil in kuuchil leʼek tubʼaj mukbʼeen].»—Xoko a Job 14:13-15.
2. Bʼiki ti weel ti jaj ti kaʼ kuxtalooʼ u kaʼa a kimene?
Leʼek ti tali a Jesus wayeʼ yokʼolkabʼa, tzʼabʼi tiʼi a podʼeer umen a Dʼioso tiʼi kaʼ u likʼsooʼ a kimene y paataji u likʼsooʼ. Por ejemploj, u likʼsaj ix neneʼ chuʼ a 12 u jaabʼa y u likʼsalik u yaj xidʼal al juntuul ix maʼichama. (Marcos 5:41, 42; Lucas 7:12-15) Leʼek ti keʼentoj a Jesus wayeʼ yokʼolkabʼa, kimi u ʼamiingoj aj Lazaro u kʼabʼaʼ. Ak kuatro dia kimik y mukbʼuk pero kaʼ likʼsabʼi umen Jesus. Uchi u payajchiʼ tiʼi u tat ti kaʼan, kaʼtun u yadʼaj: «Lazaro, liqʼuen. Coʼon.» Kaʼtun «Joqʼui a quimene», kaʼ kuxaji! (Juan 11:43, 44) Chen tukle bʼoon u kiʼilooʼ u yool u famiilia etel u ʼamiingoj kaʼ u yilajooʼ ti kuxaji aj Lazarojo!
3. Kʼuʼ a kiʼ jedʼeʼek ti wooltik a uchul u kaʼa tiʼijooʼ a mak a kimenooʼ tiʼitoʼono?
A Bʼibʼle tan u promesaartik ti: «Belooʼ u caʼa ti caʼ cuxtal a quimene.» (Hechos 24:15) Leʼek a kaʼ likʼsabʼooʼ umen Jesus ti keʼen yokʼolkabʼa, maʼ ti kaʼan bʼinooʼi. (Juan 3:13) Wayeʼ yokʼolkabʼ kaʼ kuxkunbʼooʼ y kiʼooʼ u yool etel abʼeeʼ. Kʼochol u kaʼa a tiempo ti bʼel u kaʼa kaʼ likʼsabʼäl ti bʼilliones a kimen umen Jesusu tiʼi kaʼ u yilooʼ u kiʼil a kuxtal ti bʼebʼeel tuwich a kichʼpan yokʼolkabʼ. U yadʼaj Jesus ti «[tulakal bʼoon a kʼajooltzil umen a Dʼioso]» —bʼel u kaʼa kuxkunbʼul, kaʼax tubʼenooʼ umen kristiyaano.—Juan 5:28, 29–NWT.
MAS KAMBʼALTETO
A Jesusu yan tiʼi a podʼeer tiʼi kaʼ u likʼsooʼ a kimene y bʼel u kaʼa u bʼeteʼ. Kambʼaltelik bʼiki ti jedʼeʼek u jetzʼkuntik a wool kʼuʼ a tan u yadʼik a Bʼibʼle tupektzil adʼaaʼ y bʼiki ti jedʼeʼek u tzʼeek tech a bʼaʼal a kiʼ kaʼ a woolteje.
4. U yeʼaj Jesus ti jedʼeʼek u paatal u kuxkinte a Kimene
Mas kambʼalte kʼuʼ u bʼetaj a Jesus tiʼi u ʼamiingoj leʼek aj Lazarojo. Xokeʼex a Juan 11:14, 38-44, kaʼtun tzikbʼalteʼex a kʼaatchiʼooʼ adʼaʼa:
Top jaj wa ti kimi aj Lazarojo?—Ila a versicolo 39.
Wa kuchi bʼini ti kaʼan aj Lazaro tupach ti kimiji, bʼel wa kuchi u kaʼa ti kaʼ talesabʼäl ti kuxtal wayeʼ tuwich yokʼolkabʼ umen a Jesusu? Kʼuʼ a tukul?
5. Yaabʼ a kimen bʼelooʼ u kaʼa likʼsabʼälä!
Xokeʼex a Salmo 37:29, kaʼtun tzikbʼalteʼex a kʼaatchiʼ adʼaʼa:
Tubʼaj bʼelooʼ u kaʼa ti kuntal tulakal bʼoon a bʼelooʼ u kaʼa likʼsabʼälä?
Yaabʼ mak a bʼelooʼ u kaʼa ti kaʼ kuxtal umen a Jesusu. Maʼ chen jadʼiʼ a tanooʼ u bʼetik kʼuʼ u kʼati a Jehovah. Xokeʼex a Hechos 24:15, kaʼtun tzikbʼalteʼex a kʼaatchiʼ adʼaʼa:
Mak a kʼati a kaʼ ilaʼ kakaʼ talak ti kuxtal?
Tukle ti bʼaalaʼ: A Jesusu maʼax yaj ti jedʼeʼek u likʼsikooʼ a kimene jabʼix ti maʼax yaj ti jedʼeʼek u likʼsik u mejen juntuul a tattzil ti tan u wäyälä
6. Leʼek ti kaʼ likʼsabʼälooʼ u kaʼa a kimene jedʼeʼek u tzʼeek u kiʼil a wool y jedʼeʼek u tzʼeek a bʼaʼal a kiʼ kaʼ a woolteje
Leʼek a kuentaj a yan ichil a Bʼibʼle tupektzil kʼuʼ a uchi tiʼi u mejen aj Jairojo, walak u kiʼkuntikooʼ u yool y chichkuntikooʼ u yool adʼoʼooʼ a yajooʼ u yoolo. Jaj ti uchij abʼeeʼ xokeʼex u pektzil ichil a Lucas 8:40-42, 49-56.
ʼAantes u kaʼ kuxkintik u yix chuʼ aj Jairojo, a Jesusu u yadʼaj tiʼi: «Maʼ u jacʼül a wool. Tzʼa a wool tin pach.» (Ila a versicolo 50.) Leʼek u pektzil ti kaʼ bʼelooʼ u kaʼa ti likʼsabʼäl a kimene, bʼiki ti jedʼeʼek u yaantikech . . .
leʼek ti kimik a mak tech a yaj a wuyiji?
leʼek ti keʼen a kuxtal ich sabʼeentzil?
Chaʼanteʼex a VIDʼEO, kaʼtun tzikbʼalteʼex a kʼaatchiʼ adʼaʼa.
Bʼiki ti aantabʼooʼ u naʼ y u tat ix Phelicity, umen kaʼ likʼsabʼälooʼ u kaʼa a kimene?
YAN MAK WALAK U YADʼIK: «Maʼ in weel wa jaj ti kaʼ likʼilooʼ u kaʼa a kimene.»
Bʼiki a tukul?
Kʼuʼ ti scripturajil a jedʼeʼek a jätzik tiʼi kaʼ a yeeʼ ti jaj ti kaʼ likʼilooʼ u kaʼa a kimene?
KʼUʼ A KÄNAJA
A Bʼibʼle tan u promesaartik ti bʼilliones a kimenooʼ bʼelooʼ u kaʼa ti kaʼ kuxtal. A Jehovah u kʼati kakaʼ kuxakooʼ, u tzʼaj a podʼeer tiʼi Jesus kaʼ u likʼsej a kimene.
Tzikbʼalbʼäl kʼuʼ ti känaja
Bʼiki u yool a Jehovah etel a Jesus ti kaʼ bʼelooʼ u kaʼa u likʼes a kimenooʼo?
Leʼek a bʼilliones a kaʼ likʼsabʼälooʼ u kaʼa, tubʼaj bʼelooʼ u kaʼa ti kuntal? Waye wa yokʼolkabʼ, waxan ti kaʼan? Kʼuʼkaʼa bʼoobʼeʼ tatuklik?
Kʼuʼ u tzʼaj ichil a wool ti jedʼeʼek u kaʼ likʼsabʼälooʼ bʼoon a kimenooʼ tiʼitoʼono?
MAS ILATOJ
Kambʼalte kʼuʼ a jedʼeʼek a bʼetik tiʼi kaʼ a manes a yajʼolala.
«Aantabʼäl Tiʼijooʼ a Tanooʼ u Yajʼolala» (Awake! No. 3 2018)
Leʼek kʼuʼ a yan ich Bʼibʼle, top jedʼeʼek wa u yaantik a mak a tan u yajʼolala?
Bʼiki ti jedʼeʼek u mansikooʼ a yajʼolal a tzʼubʼooʼo leʼek kaʼ u sätooʼ a mak tiʼiji?
Yan wa mak a bʼelooʼ u kaʼa likʼsabʼäl kaʼ xikooʼ ti kaʼana? Mak a maʼ bʼelooʼ u kaʼa likʼsabʼälä?
«Kʼuʼ u Nuʼkul ti kaʼ Likʼsabʼälooʼ u Kaʼa a Kimene?» (Web article)