KAMBʼAL 23
Yaabʼ a Kiʼkiʼtʼanbʼäl a Bʼel a Kaʼa a Kʼämäʼ wa kaʼ Uchukech ti Okjaʼ!
A Jesusu u yadʼaj ti leʼek aj chukul tzʼokʼsaja kʼabʼeet kaʼ uchuk u okjaʼ. (Xoko a Mateo 28:19, 20–NWT.) Kʼuʼ u nuʼkul a okjaʼa? Tiʼi kaʼ uchuk u okjaʼ a maka kʼuʼ a tzaj u bʼetiki?
1. Kʼuʼ u nuʼkul a okjaʼa?
Leʼek a tʼan «ocjaʼ» teʼ jokʼol ichil a tzikbʼal Griegojo. U nuʼkul abʼeeʼ «kaʼ tzʼämbʼäk» yit jaʼ. A Jesusu uchaʼanilik u okjaʼ, ichil a nojaʼ Jordan u kʼabʼaʼ, tzʼämbʼi kaʼtun «joqʼui [...] ichil a jaʼa.» (Marcos 1:9, 10) Bʼoobʼeʼiliktun aj chukul tzʼokʼsaj ti walakooʼ u okjaʼa, tu tuluubʼal walakooʼ u tzʼämbʼäl ich jaʼ.
2. Leʼek ti uchuk u okjaʼ a maka kʼuʼ a tan u yeʼiki?
Leʼek ti uchuk u okjaʼ a maka, tan u yeʼik ti u tzʼaj u kuxtal tiʼi Jehovah. Bʼiki ti walak u dʼedʼikaartik u bʼajil a maka? ʼAantes u okjaʼ, bʼel u kaʼa u yadʼäʼ tiʼi Jehovah ich payajchiʼ ti u kʼati u bʼeteʼ kʼuʼ u kʼati a Dʼios ti bʼebʼeel. U promesaartajilik ichil u payajchiʼ ti chen Jehovah a bʼel u kaʼa u tzʼaaʼ u yanili y bʼel u kaʼa u tzʼaaʼ u tzʼokʼsaj primero ichil u kuxtal. Leʼek a mak abʼeeʼ «yan u pʼütic u betic cʼuʼ a quiʼ tu [wichi y] . . . quiʼ caʼ talac tin [pach], cu tʼan a Jesus.» Ti bʼoobʼeʼe bʼel u kaʼa u tzʼokes u kaʼansaj a Jesusu y bʼel u kaʼa u täkʼäänte u ejemploj. (Mateo 16:24) Leʼek kaʼ u tzʼaaʼ u kuxtal a juntuul mak tiʼi Jehovah y kaʼ uchuk u okjaʼ, u kiʼili mas naʼtzʼak tutzeel a Jehovah etelooʼ u yettzʼoksajil.
3. Tiʼi kaʼ uchuk u okjaʼ a maka kʼuʼ a tzaj u bʼetiki?
Tiʼi kaʼ a listaarte a bʼajil ti okjaʼ kʼabʼeet kaʼ a naʼtej u pektzil a Jehovah y kaʼ mukʼaʼanak a tzʼokʼsaj ichil. (Xoko a Hebreos 11:6.) Tanil a mas naʼtik u pektzil a Jehovah mas u chʼiil a yakunaj tiʼi. Leʼek a yakunaj tiʼi a Jehovah bʼel u kaʼa u jiseech a wadʼäʼ u pektzil tiʼi ulaakʼ mak y a kʼatijak a bʼenes a kuxtal jabʼix tukʼatiji. (2 Timoteo 4:2; 1 Juan 5:3) Wa tan u bʼetik juntuul mak «cʼuʼ a quiʼ u betabül u men a hermanojo, [...] Ti baaloʼo, top quiʼ u yool a Noochtzil [tiʼi].» Umen tun abʼeeʼ u kʼatijak u tzʼaaʼ u kuxtal tiʼi a Dʼioso y bʼel u kaʼa ti okjaʼ.—Colosenses 1:9, 10.a
MAS KAMBʼALTETO
Ila kʼuʼ a jedʼeʼek ti känik etel bʼiki ti uchi u okjaʼ a Jesusu y bʼiki ti jedʼeʼek u listaartik u bʼajil a juntuul mak tiʼi kaʼ uchuk u okjaʼ.
4. Jedʼeʼek ti kambʼal etel bʼiki ti uchi u yokjaʼ a Jesusu
Xokeʼex a Mateo 3:13-17–NWT tiʼi kaʼ a naʼtej u pektzil bʼiki ti uchi u okjaʼ a Jesusu. Kaʼtun tzikbʼalteʼex a kʼaatchiʼooʼ adʼaʼa:
Neneʼ wa a Jesus ti uchi u yokjaʼa?
Bʼiki ti uchi u okjaʼ? Chen wa chʼulbʼi u pol etel jaʼ?
Leʼek ti jobʼi ti okjaʼ a Jesusu kaji u bʼeteʼ a meyaj a tzʼabʼi tiʼi umen a Dʼioso. Xokeʼex a Lucas 3:21-23–NWT etel a Juan 6:38, kaʼtun tzikbʼalteʼex a kʼaatchiʼ adʼaʼa:
Tupach ti uchi u yokjaʼ a Jesusu, kʼuʼ ti meyajil a primero kaji u tzʼaaʼ ichil u kuxtal kaʼ u bʼeteʼ?
5. Jedʼeʼek a paatal ti okjaʼ
Leʼek kaʼ ti primero wuyij u pektzil a okjaʼa y u tzʼabʼäl ti kuxtal tiʼi a Dʼioso, uchak ti tuklik ti maʼ jedʼeʼek ti bʼetik. Pero jedʼeʼek u chichtal a wool a bʼeteʼ a tukul ti okjaʼ tanil a mas kambʼaltik kʼuʼ a yan ich Bʼibʼle. Tiʼi kaʼ a wilaʼ a mak a bʼoobʼeʼlik u yoolo, chaʼanteʼex a VIDʼEO.
Xokeʼex a Juan 17:3 etel a Santiago 1:5, kaʼtun tzikbʼalteʼex a kʼaatchiʼ adʼaʼa:
Kʼuʼ jedʼeʼek u yaantik a mak tiʼi kaʼ liistojak ti okjaʼ?
Walak ti dʼedʼikaartik ti bʼajil tiʼi Jehovah tanil ti wadʼik tiʼi ich payajchiʼ ti kʼati ti tzʼaaʼ u yanil ti bʼebʼeel
Leʼek ti uchukoʼon ti okjaʼa tan ti yeʼik tiʼijooʼ a mak a tanooʼ u chaʼana, ti tzʼaj ti kuxtal tiʼi a Dʼioso
6. Leʼek ti uchukoʼon ti okjaʼa walak ti okol ichil u famiilia a Jehovah
Leʼek ti uchukoʼon ti okjaʼa, walak ti okol ichil u famiilia a Jehovah a yan tupeteebʼ a yokʼolkʼabʼa. Kaʼax jujumpaay tubʼaj talaʼanoʼon, jujumpaay ti tan ti chʼisabʼäl pero ket a walak ti tzʼokʼsiki y walak ti bʼensik ti kuxtal jabʼix kaʼ u kʼati a Jehovah. Xokeʼex a Salmo 25:14 etel a 1 Pedro 2:17, kaʼtun tzikbʼalteʼex a kʼaatchiʼ adʼaʼa:
Leʼek ti uchuk u okjaʼ juntuul a maka, bʼikijak u yetʼokil etel a Jehovah etel u yettzʼokʼsajil?
YAN MAK WALAK U YADʼIK: «Maʼ liistojaken ti okjaʼi.»
Wa bʼoobʼeʼ a wool, jedʼeʼek toj wa a tzʼeek ichil a wool ti jedʼeʼek a okjaʼ?
KʼUʼ A KÄNAJA
A Jesusu u kaʼansaj ti leʼekooʼ aj tzʼokʼsaja kʼabʼeet kaʼ uchukooʼ u okjaʼ. ʼAantes u okjaʼ a juntuul maka, tzaj u mukʼaʼankuntik u tzʼokʼsaj ichil a Jehovah. Kaʼ u bʼenes u kuxtal jabʼix tukʼati a Jehovah y kaʼ u dʼedʼikaarte u kuxtal tiʼi.
Tzikbʼalbʼäl kʼuʼ ti känaja
Kʼuʼ u nuʼkul a okjaʼa y kʼuʼkaʼa kʼabʼeet kaʼ uchuk a okjaʼ?
Leʼek ti walak ti okjaʼa kʼuʼ a tan ti yeʼiki?
ʼAantes u dʼedʼikaartik u bʼajil a juntuul maka y tiʼi ka uchuk u okjaʼa. Kʼu a tzaj u bʼetiki?
MAS ILATOJ
Kambʼalte top kʼuʼ u nuʼkul a okjaʼa.
Tzʼaj ti kuentaj kʼuʼtak a kʼabʼeet kaʼ u bʼeteʼ a mak tiʼi kaʼ uchuk u okjaʼ.
«Leʼek ti Kʼochaʼantawich y Yaj a Wuyi a Jehovah Bʼel a Kaʼa ti Okjaʼ» (The Watchtower, March 2020)
Xoko u pektzil kʼuʼ u jisaj juntuul a winik kaʼ uchuk u okjaʼ.
«U Kʼatooʼ kaʼ in Probʼaarte a Jaj Tin Bʼajili» (The Watchtower, February 1, 2013)
Tzʼaj ti kuentaj kʼuʼkaʼa kiʼ kaʼ a tzʼaaʼ ichil a wool a okjaʼa y bʼiki kaʼ a listaarte a bʼajil tiʼi.
«Uchuken wa ti Okjaʼ?» (Questions Young People Ask—Answers That Work, Volume 2, chapter 37)
a Wa uchaʼan u okjaʼ a mak ichil ulaakʼ a kʼunaja kʼabʼeet kaʼ uchuk u okjaʼ tukayeʼil. Kʼuʼkaʼa? Umen maʼ jaj a walak u kaʼansik u kʼunaja.—Ila a Hechos 19:1-5 etel a Kambʼal 13.