KAMBʼAL 03
Jedʼeʼek wa a Tzʼokʼsik kʼuʼ a Yan Ichil a Bʼibʼle?
Yaabʼ a tukul y promesaj a yan ich Bʼibʼle. Jedʼeʼek wa a tzʼokʼsik kʼuʼ a yan ich jumpʼeel uchbʼen juʼumu? Uchak a kʼati kuchi a naʼtej pero tzajtoj a tuklik u pach. Top jedʼeʼek wa tzʼokʼsik kʼuʼ a walak u promesartik a Bʼibʼle tupektzil ti jedʼeʼek u kiʼtal a kuxtal aleebʼe y ti bʼebʼeel? Yaabʼ u tzʼaʼooʼ u yool ichil a promesaj abʼeeʼ y jedʼeʼek ti inchech juntuul. Kambʼalte bʼiki.
1. Top jaj wa kʼuʼ a tzʼiibʼaʼan ichil a Bʼibʼle?
Leʼek kʼuʼ a tzʼiibʼaʼan ichil a Bʼibʼle «laj jaj y toj.» (Eclesiastes 12:10) Jaj ti uchaʼan y jaj ti yanajaʼanooʼ a mak a walak u yadʼik u pektzil ichil. (Xoko a Lucas 1:3; 3:1, 2.) Yanooʼ a mak a yanooʼ u wichil u kiʼ estudiartajooʼ u pach a Bʼibʼle. Bʼinooʼ u yilaʼ ti laj jaj a jaabʼ a tzʼiibʼaʼan ichili. Y ti laj jaj u pektzil a jenteje y a lugarooʼ a yan ichili.
2. Kʼuʼkaʼa jedʼeʼek ti nojʼooltik a Bʼibʼle kaʼax uchi tzʼiibʼaʼanäk?
A Bʼibʼle, ak walak u yadʼik kʼuʼ a maʼax mak u yeelte bʼiki ti yana. A junpʼeel ejemplojo, leʼek bʼiki ti yan a yokʼolkabʼa. Leʼek mak walakooʼ u kambʼaltik u pach a science (ciencia). Maʼ kuchi walakooʼ u tzʼokʼsik kʼuʼ a tzʼiibʼaʼan ichil a Bʼibʼle tupektzil a yokʼolkabʼa. Pero bʼinooʼ u yilaʼ ti jaj kʼuʼ a walak u yadʼik a Bʼibʼle. Jedʼeʼek a «nojʼooltik, aleebʼe y ti bʼebʼeel.»—Salmo 111:8.
3. Kʼuʼkaʼa jedʼeʼek ti tzʼokʼsik kʼuʼ a tan u yadʼik a Bʼibʼle tupektzil kʼuʼ a bʼeltoj u kaʼa ti uchulu?
Leʼek a profeciajooʼa a yan ich Bʼibʼle walak u yadʼik u pektzil «a bʼaʼal a maʼax toj uchuku.» (Isaias 46:10) ʼAantes u uchul jumpʼeel a bʼaʼala, laj toj ti walak u yadʼik bʼiki ti bʼel u kaʼa ti uchul. Adʼajaʼanilik umen bʼikijak a kuxtal ichil a yokʼolkabʼ aleebʼe. Ichil a kambʼal adʼaaʼ, bʼel ti kaʼa ti tzʼaaʼ ti kuenta a profeciajooʼ a yan ichil a Bʼibʼle. Leʼek bʼiki ti jajajooʼo bʼel u ku sates a wool!
MAS KAMBʼALTETO
Ila bʼiki ti leʼek kʼuʼ a walak u yadʼik a Bʼibʼle jumbʼel etel kʼuʼ a walak u käxtikooʼ ich science (ciencia). Tzʼaj ti kuenta tzʼeekak a profeciajooʼ a yan ich Bʼibʼle.
4. Leʼek a science (ciencia) jumbʼel etel kʼuʼ a walak u yadʼik a Bʼibʼle
Yaabʼooʼ a mak uchiji walakooʼ u tzʼokʼsik ti yan kʼuʼ tan u mächik a yokʼolkabʼa. Chaʼanteʼex a VIDʼEO.
Ila kʼuʼ a tzʼiibʼaʼan ichil u juʼum a Job manal 3,500 jaabʼ. Xokeʼex a Job 26:7, kaʼtun tzikbʼalteʼex a kʼaatchiʼ adʼaʼa:
Kʼuʼkaʼa jedʼeʼek u satesik a wool ti bʼini u yadʼäʼ Bʼibʼle ti «maʼax kʼuʼ» a wich chʼuykaʼal a yokʼolkabʼa?
Ichil toj a jaabʼ 1800 bʼini ti kiʼ chʼaʼtojbʼol bʼiki ti yan a jaʼa. Pero ila kʼuʼ a uchbʼen tzʼiibʼaʼan ich Bʼibʼle. Xokeʼex a Job 36:27, 28, kaʼtun tzikbʼalteʼex a kʼaatchiʼooʼ adʼaʼa:
Kʼuʼ a kiʼtawich etel kʼuʼ a tan u yadʼik a Bʼibʼle tupektzil bʼiki ti yan a jaʼa?
Tan wa u mukʼaʼankuntik a tzʼokʼsaj a scripturaj a xoka ichil a Bʼibʼle?
5. A Bʼibʼle walak u yadʼiktoʼon kʼuʼ a bʼel u kaʼa ti uchulu
Xokeʼex a Isaias 44:27–45:2, kaʼtun tzikbʼalteʼex a kʼaatchiʼ adʼaʼa:
Kʼuʼtak u yadʼaj a Bʼibʼle 200 anios ʼaantes u jobʼsabʼäl a kaj Babilonia?
Bʼini naʼtabʼäl ti leʼek aj Cyrus u Reyil a Persia etelooʼ u soldʼadʼo u choʼaj a kaj Babilonia ichil a jaabʼ 539 B.C.E.b U paantajooʼ u yok a jaʼ a keʼen tuxoy a kaja. Tupach abʼeeʼ okooʼ ichil a kaj ti jebʼaʼan a koto, maʼ uchooʼ u pʼisbʼaj. Mas de 2,500 jaabʼ aleebʼe a Babilonia chen jumbʼuuy ti tunich ti pʼaati. Ilbʼil kʼuʼ u yadʼaj a Bʼibʼle.
Xokeʼex a Isaias 13:19, 20, kaʼtun tzikbʼalteʼex a kʼaatchiʼ adʼaʼa:
Leʼek kʼuʼ a uchi tiʼi a kaj Babiloniaja bʼiki ti tan u yeʼik ti jajaji a profecia?
Tak Iraq jedʼeʼek a wilik bʼiki ti pʼaati a kaj Babilonia
6. Ak uchi adʼajaʼan umen Bʼibʼle kʼuʼ a tan ti wilik u uchul aleebʼe
A Bʼibʼle u yadʼaj ti «nützʼünac u jobol a yocʼolcaba». (2 Timoteo 3:1) Ila bʼiki kaʼ u yadʼaj Bʼibʼle kʼuʼ a bʼel u kaʼa ti uchulu.
Xokeʼex a Mateo 24:6, 7, kaʼtun tzikbʼalteʼex a kʼaatchiʼ adʼaʼa:
Kʼuʼtak u yadʼaj a Bʼibʼle a bʼel u kaʼa ti uchul ti nätzʼänak u jobol a yokʼolkabʼa?
Xokeʼex a 2 Timoteo 3:1-5, kaʼtun tzikbʼalteʼex a kʼaatchiʼooʼ adʼaʼa:
Bʼiki kaʼ u yadʼaj Bʼibʼle bʼikijakooʼ u modʼo a kristiyaano ti nätzʼänak u jobol a yokʼolkabʼa?
Bʼikiʼiltak a walak a wilik incheche?
YAN MAK WALAK U YADʼIK: «Chen tus y kuenta a yan ichil a Bʼibʼle.»
Kʼuʼ u mas tzʼaj ichil a wool, ti jaj kʼuʼ a walak u yadʼik a Bʼibʼle?
KʼUʼ A KÄNAJA
Profeciajooʼ, science (ciencia), leʼek kʼuʼ a manaʼan uchiji, u yeʼatoʼon ti jedʼeʼek ti tzʼokʼsik a Bʼibʼle.
Tzikbʼalbʼäl kʼuʼ ti känaja
Jaj wa kʼuʼ a yan ichil a Bʼibʼle, jabʼix chen kuxkinbʼil kuenta?
Kʼuʼtak a walak u yadʼik a science (ciencia), a ket etel kʼuʼ a walak u yadʼik a Bʼibʼle?
Bʼiki a tukul, walak wa u yadʼik Bʼibʼle kʼuʼ a bʼeltoj u kaʼa ti uchulu? Kʼuʼkaʼa bʼoobʼeʼ ta tuklik?
MAS ILATOJ
Walak wa u yadʼik a maʼ toj a Bʼibʼle tupektzil a science (ciencia)?
«Jumbʼel wa kʼuʼ a walak u yadʼik a science (ciencia) etel a Bʼibʼle?» (Web article)
Kʼuʼ a uchul u kaʼa ti «nützʼünac u jobol a yocʼolcaba»?
«6 Pʼeel a Profecia a Yan Ich Bʼibʼle a Tan a Wilik u Uchul» (The Watchtower, May 1, 2011)
Kambʼalte bʼiki ti jajaji a profecia u yadʼaj a Bʼibʼle tupektzil u Gobʼerno a Griegojo.
Tzʼaj ti kuenta bʼiki ti jelbʼi u tukul juntuul a winik yokʼlal a Bʼibʼle umen a profecia a yan ich Bʼibʼle.
«Ti Kulaji Walak in Tuklik, ti maʼ Yan a Dʼioso» (The Watchtower No. 5 2017)
a A profeciaja jumpʼeel mensaaje a talaʼan etel Dʼios tupektzil kʼuʼ a bʼel u kaʼa ti uchulu.
b U nuʼkul a B.C.E. «540 anios ʼaantes u kuxtal a Jesus yokʼolkabʼ» leʼek tun u nuʼkul a C.E. «tupach ti kuxaji a Jesus yokʼolkabʼ.»