Bʋ-kaoodbã sebre

13 Israyɛll nebã leb n maana sẽn yaa wẽng a Zeova nifẽ,+ t’a Zeova bas-b Filisti nebã nugẽ+ yʋʋm pis-naase.

2 Wakat kãnga, Zora+ rao a ye sẽn yaa Dan buudã+ ned n da be t’a yʋʋr boondẽ t’a Manowa.+ A pagã ra yaa kiri, n pa tar biig ye.+ 3 La a Zeova malɛkã wa n vẽnega a meng ne pagã n yeel-a: “Kelge, fo yaa kiri, n pa tar biig ye. La fo na n dɩka pʋga, n dog bi-ribla.+ 4 La bɩ f gũus n da wa yũ divẽ wall rãam buud baa a ye,+ la f ra rɩ bõn-dẽgd ye.+ 5 Ade! Fo na n dɩka pʋg n dog bi-ribla. Barg pa segd n tik a zug ye.+ Bala biigã na n yɩɩ Wẽnnaam Nazireyẽ,* a rogmã tɛka.* A na n sɩnga Israyɛll nebã fãagr Filisti nebã nugẽ.”+

6 La pagã kẽngame n tɩ togs a sɩdã yaa: “Wẽnnaam rao n wa mam nengẽ. A yalẽ wã yaa wa Wẽnnaam malɛka, n kẽesd rabeem wʋsgo. Mam pa sok-a a sẽn yitẽ, a me pa togs maam a yʋʋr ye.+ 7 La a yeela maam yaa: ‘Ade! Fo na n dɩka pʋg n dog bi-ribla. La bɩ f ra yũ divẽ wall rãam buud baa a ye, la f ra rɩ bõn-dẽgd ye. Bala biigã na n yɩɩ Wẽnnaam Nazireyẽ, a rogmã tɛk* n tãag a kũum.’”

8 A Manowa yõka a Zeova sɛɛg n yeele: “Y kabre, Zeova. M bõos tɩ y kɩt tɩ Wẽnnaam raoã yãmb sẽn tʋmã lebg n wa togs tõnd d sẽn segd n maan to-to ne biigã sẽn na n dogã.” 9 Dẽ, Wẽnnaam kelga a Manowa, n kɩt tɩ Wẽnnaam malɛkã lebg n wa pagã nengẽ, a sẽn wa n zĩ weoogẽ. La a sɩd a Manowa ra pa be ne-a ye. 10 Pagã zoee tao-tao n tɩ yeel a sɩdã yaa: “Gese! Rao ning sẽn da wa mam nengẽ nindaarẽ wã le waame.”+

11 Dẽ, a Manowa yikame n tũ a pagã. A taa raoã nengẽ n sok-a yaa: “Yãmb la rao ning sẽn gom ne mam pagã bɩ?” T’a leoke: “Yaa maam.” 12 Rẽ la a Manowa yeel-yã: “Bɩ yãmb sẽn yeelã pidsi! Biigã vɩɩm na n yɩɩ wãn-wãna, la tʋʋm-bʋg la a na n tʋme?”+ 13 Dẽ, a Zeova malɛkã leoka a Manowa yaa: “Fo pagã segd n zãaga a meng ne bũmb ning fãa mam sẽn yeel-a wã.+ 14 A pa segd n dɩ bũmb baa a ye sẽn maan ne viyn tɩɩg biis ye. A pa segd n yũ divẽ wall rãam buud baa a ye,+ la a pa segd n dɩ bõn-dẽgd ye.+ Yẽ segd n tũu bũmb ning fãa mam sẽn yeel-a wã.”

15 A Manowa yeela a Zeova malɛkã yaa: “M bõos tɩ y yals tɩ m kʋ bʋ-polle, n segl n kõ-yã.”+ 16 T’a Zeova malɛkã leok a Manowa: “Mam sã n yals me, m pa na n dɩ fo rɩɩbã ye. La fo sã n dat n kõ a Zeova maoong sẽn yõogd bugum, bɩ f kõ-a.” A Manowa ra pa mi tɩ raoã yaa a Zeova malɛkã ye. 17 Rẽ la a Manowa sok a Zeova malɛkã yaa: “Yãmb yʋʋr la a bõe,+ tɩ y sẽn yeelã sã n pids bɩ d waoog-yã?” 18 La a Zeova malɛkã leoka a Manowa: “Bõe yĩng tɩ fo rat n bãng mam yʋʋre? Mam yʋʋrã yaa yel-solemde.”

19 Dẽ, a Manowa rɩka bʋ-pollã ne kood biis kũunã, n maan maoong pĩigã zug n kõ a Zeova. La a Manowa ne a pagã sẽn wa n getẽ wã, Wẽnnaam maana bũmb sẽn ling-b wʋsgo. 20 Bugmã sẽn wa n wit tẽn-kugrã zug n tãood n kuiis yĩngrã, a Zeova malɛkã tũu tẽn-kugrã bug-witmã n dʋ saasẽ, t’a Manowa ne a pagã ra getẽ. Zĩig pʋgẽ, b lʋɩɩme n fõgen b nens tẽnga. 21 A Zeova malɛkã pa le vẽneg a meng ne a Manowa la a pagã ye. Dẽ, a Manowa bãngame tɩ raoã ra yaa a Zeova malɛkã.+ 22 A Manowa yeela a pagã yaa: “Hakɩɩka, tõnd na n kiime! Bala yaa Wẽnnaam la tõnd sẽn yã wã.”+ 23 La a pagã yeela yẽ yaa: “A Zeova sã n da rat n kʋ tõndo, a ra pa na n deeg maoong sẽn yõogd bugmã+ ne kood biis kũunã tõnd sẽn kõ-a wã ye. Yẽ ra pa na n wilg tõnd bõn-kãensã fãa, la a ra pa na n togs tõnd bõn-kãensã baa a yembr me ye.”

24 Pagã wa n doga bi-ribla, n pʋd a yʋʋr t’a Sãmsõ.+ La biigã sẽn wa n bɩtẽ wã, a Zeova ra ningd-a-la barka. 25 A Zeova vʋʋsmã sɩnga a+ zug sigb Mahane-dan+ sẽn be Zora ne Ɛstawollã+ sʋka.