Bʋ-kaoodbã sebre

8 La Efrayim buudã neb yeela a Zedeyõ yaa: “Bõe la fo sẽn maan tõndã? Bõe yĩng tɩ fo kẽng n tɩ zab ne Madiyã nebã n pa bool tõndo?”+ La bãmb zaba yẽ sõma.+ 2 La yẽ leoka bãmb yaa: “Mam sẽn maanã yaa bõe yãmb sẽn maanã taoore? Efrayim buudã+ neb viyn yiisgã pa são Abiyezɛɛr nebã+ viyn wobrã sɩda? 3 Yɩɩ yãmb nugẽ la Wẽnnaam ning Madiyã nanambs a Orɛɛb ne Zeebe.+ Dẽ wã, mam sẽn maanã yaa bõe yãmb sẽn maanã taoore?” A sẽn gom ne bãmb woto, b sũyã sigame.

4 A Zedeyõ kẽnga Zʋrdẽ kʋɩlgẽ wã n tɩ rʋʋg-a. Yẽ ne rap kobs-tã wã sẽn da be ne yẽ wã ra yaame, la b kell n diga b bɛɛbã. 5 Dẽ, yẽ yeela Sukot nebã yaa: “M bõos tɩ y kõ nebã sẽn pʋgd maamã buri, bala b yaame tɩ mam yaool n digd Madiyã rĩm-dãmb a Zeba ne a Zalmuna.” 6 La Sukot nanambsã yeelame yaa: “Bõe yĩng tɩ d na n kõ fo tãb-biisã buri? Fo zoe n yõka a Zeba ne a Zalmuna la?” 7 T’a Zedeyõ leok-ba: “Yãmb sẽn gom woto wã, a Zeova sã n ning a Zeba ne a Zalmuna mam nugẽ, m na n pãba yãmb ne we-raoogã gõose.”+ 8 A Zedeyõ yii be n kẽng Penuwɛlle, n tɩ kos bãmb me woto. La Penuwɛll nebã leoka yẽ wa Sukot nebã sẽn leok-a to-to wã. 9 T’a yeel Penuwɛll nebã yaa: “Mam sã n lebg n wa ne laafɩ, mam na n luba yãmb gasgã.”+

10 A Zeba ne a Zalmuna ra bee Karkoor ne b tãb-biisã, na maan rap tus-piig la a nu. Yaa Yaang nebã tãb-biisã fãa+ sẽn kellã sõore, bala bãmb tus-koabg la pisi sẽn da tar sʋʋs la b kʋ-yã. 11 A Zedeyõ kell n tũu sẽn be-b fu-rotẽ wã sorã, sor ning sẽn be Noba ne Yogbeha+ yaangã, n tɩ zab ne b tãb-sikã neb sẽn da pa tẽed yellã. 12 A Zeba ne a Zalmuna sẽn yaa Madiyã rĩm-dãmb a yiibã zoeeme, la a Zedeyõ pʋgl-b lame n tɩ yõg-ba. Rẽ kɩtame tɩ tãb-sikã nebã fãa zoe n sãeege.

13 A Zowaas biig a Zedeyõ yii zabrẽ wã, n dɩk sor ning sẽn dabd Herɛɛsã, n lebg n watẽ. 14 Sorã zugu, a yõka Sukot bi-bɩɩg n sok-a sogsgo. Dẽ, bi-bɩɩgã gʋlsa Sukot nanambsã ne b kãsem-dãmbã yʋy n kõ-a. Ra yaa rap pis-yopoe la a yopoe. 15 Dẽ, yẽ kẽnga Sukot rapã nengẽ n tɩ yeele: “Ad a Zeba ne a Zalmuna, neb nins poorẽ yãmb sẽn bao mam noor n soke: ‘Bõe yĩng tɩ d na n kõ fo tãb-biisã sẽn yɛ wã buri? Fo zoe n yõka a Zeba ne a Zalmuna la?’”+ 16 A pãba Sukot kãsem-dãmbã ne we-raoogã gõose, n wilg-b yam.+ 17 La yẽ tɩ luba Penuwɛll+ gasgã, la a kʋ tẽngã rapã.

18 A soka a Zeba ne a Zalmuna yaa: “Rap nins yãmb sẽn kʋ Taboorã ra yaa wãn-wãna?” Tɩ b leoke: “B ra wõnda foom, b ned kam fãa wõnda na-biiga.” 19 Rẽ la a Zedeyõ yeel-yã: “Ra yaa mam ba-biisi, mam ma wã kamba. M wẽen ne a Zeova sẽn vɩ wã tɩ yãmb sã n da pa kʋ-ba, m da na n bas-y lame.” 20 Rẽ poore, a yeela a bi-kãseng a Zetɛɛr yaa: “Yik n kʋ-ba!” La a Zetɛɛr pa wõog a sʋʋgã ye. A ra zoeta rabeem, bala a ra nan yaa bi-bɩɩga. 21 La a Zeba ne a Zalmuna yeelame: “Fo mengã yik n kʋ-do, bala rao pãng n wilgd a raoodo.”* Dẽ, a Zedeyõ yikame n kʋ a Zeba ne a Zalmuna,+ la a wʋk b fan-teedã sẽn wõnd kiuug n be b yʋgma wã yubliẽ wã.

22 Rẽ poore, Israyɛll nebã yeela a Zedeyõ yaa: “Yɩ tõnd naaba, foo ne f kambã la f yagensã, bala fo fãaga tõnd Madiyã nebã nugẽ.”+ 23 La a Zedeyõ leoka bãmb yaa: “Mam pa na n yɩ yãmb naab ye. Mam biig me pa na n yɩ yãmb naab ye. Yaa a Zeova n na n yɩ yãmb naaba.”+ 24 A Zedeyõ paasame: “M bõos n kos-y bũmbu: Yãmb ned kam fãa kõ maam yõor tʋb-long te-zɛɛdem ning a sẽn paamã pʋgẽ.” (Bãmb sẽn tõog b rãmbã ra tara sãnem tʋb-lond b yõyẽ wã, bala b yaa Ismayɛll buudã neba.)+ 25 Bãmb leokame: “Yell kae ye. Tõnd na n kõo foo.” Woto, bãmb tẽega fu-woko, tɩ ned fãa wa rɩgl a yõor tʋb-long a sẽn paam te-zɛɛdmã pʋgẽ. 26 A Zedeyõ sẽn kos sãnem yõor tʋb-lond ninsã zɩslem taa sãnem sɩkl* tusr la kobs-yopoe, fan-teedã sẽn wõnd kiuugu, tʋb-lond a taabã, lẽ* gĩs futã sẽn yaa miuug-miuug Madiyã rĩm-dãmbã sẽn da yerã, la fan-teed nins sẽn da be yʋgma wã yubliẽ wã sẽn pa naage.+

27 A Zedeyõ rɩka rẽ n maan efoode,*+ n yɛdg a tẽngẽ wã Ofra.+ Be, Israyɛll nebã fãa sɩnga efoodã pʋʋsg wa wẽnnaam.*+ La bõn-kãng yɩɩ bẽdg a Zedeyõ ne a zakã rãmb yĩnga.+

28 Woto, Israyɛll nebã sooga Madiyã nebã,+ la bãmb pa le bao zabr ne Israyɛll nebã ye.* Tẽngã zĩnda bãan* yʋʋm pis-naase, a Zedeyõ yõor tɛka.+

29 Dẽ, a Zowaas biig a Zerubaal+ lebg n kuila a yir n tɩ zĩnd be.

30 A Zedeyõ paama kamb pis-yopoe,* bala yẽ ra tara pagb wʋsgo. 31 A pʋg-rɩkdgã* sẽn da be Sikɛmmã roga bi-ribl n kõ-a, la yẽ pʋda a yʋʋr t’a Abimelɛke.+ 32 La a Zowaas biig a Zedeyõ vɩɩmdame n kaoos n yaool n ki. Bãmb mum-a-la a ba a Zowaas yaoogẽ wã, Ofra sẽn be Abiyezɛɛr nebã+ soolmẽ wã.

33 A Zedeyõ kũumã poor bala, Israyɛll nebã leb n tũu Baal-dãmba,*+ n yãk a Baal-berit t’a lebg bãmb wẽnnaam.+ 34 Israyɛll nebã pa tẽeg bãmb Wẽnnaam a Zeova+ sẽn da fãag bãmb b bɛɛbã fãa sẽn da karg n gũbg-bã nugẽ wã yell ye.+ 35 Bãmb pa maan a Zerubaal bɩ a Zedeyõ zakã rãmb neere, n dol-a bõn-sõma nins a sẽn maan n kõ Israyɛll nebã yĩng ye.+