Ezekɩyɛll sebre

18 A Zeova le goma ne maam n yeele: 2 “Yel-bũnd ning yãmb sẽn wẽed Israyɛll soolmẽ wã võor yaa bõe? Yãmb yetame: ‘Yaa ba-rãmbã n dɩ viyn biis sẽn yaa miisga, tɩ kambã yẽn deeg n zãabe.’+

3 “A Zeova sẽn yaa Zu-soab sẽn ka to wã yeelame: ‘Mam wẽenda ne m meng tɩ yãmb pa na n ket n wẽed yel-bũn-kãngã Israyɛll ye. 4 Kelg-y-yã! Sɩɩsã fãa* yaa maam n so. Ba sɩɩg ne biig sɩɩg fãa yaa maam n so. Sɩɩg* ning sẽn maand yel-wẽna, yaa sɩ-kãng n na n ki.

5 “‘Mams-y wa rao sẽn na n yaa nin-tɩrga, n maand sẽn yaa tɩrg la sẽn zemse. 6 A pa rɩt maand b sẽn kõ bõn-naands tãensã zut ye.+ A pa pʋʋsd Israyɛll buudã bõn-naandsã sẽn yaa bõn-yoodã* ye. A pa rẽgemd a to paga,+ wall a kẽ ne pag a pekr wakat ye.+ 7 A pa namsd ned baa a yembr ye.+ La a lebsda bũmb ning sam-soab sẽn gãneg n deeg samdã.+ A pa fãad ned baa a yembr ye.+ La a yãkda a meng rɩɩb n kõt kom sẽn tar a soaba,+ la a kõt sẽn yaa-a beel fuugu.+ 8 A pa pengd ned n dogl yõod ye.+ La a yõkda a meng n pa maand sẽn pa tɩrg ye.+ A kaooda ned ne a to bʋʋd tɩrga.+ 9 A tũuda mam noyã, la a sakd mam tõodã sẽn na yɩl n ket n maand sɩda. Ned a woto yaa tɩrga. Sãmbg sẽn kae, a na n kell n vɩɩmdame.’+ Yaa a Zeova sẽn yaa Zu-soab sẽn ka to wã n yeele.

10 “‘La mams-y wa a sẽn na n dog biig sẽn yaa fãad+ wall nin-kʋʋda,*+ pa rẽ bɩ sẽn maand bũmb a ye bõn-kãensã sʋka. 11 Baa a ba wã sẽn pa maan bõn-kãensã baa a ye wã, yẽ rɩta maand b sẽn kõ bõn-naands tãensã zutu, a rẽgemda a to paga, 12 a namsda nimbãan-nebã la naong rãmbã,+ a fãada neb teedo, a pa lebsd bũmb sam-soab sẽn gãneg n deeg samde, a pʋʋsda bõn-naandsã sẽn yaa bõn-yoodã,+ a tʋmda tʋʋm-wẽnse,+ 13 la a pengd n dogend yõodo.+ Woto wã, biigã pa na n kell n vɩɩmd ye. Hakɩɩka, b na n kʋ-a lame, bõn-wẽns nins fãa a sẽn maanã yĩnga. A zɩɩmã taal na n zĩnda a meng zugu.

14 “‘La mams-y wa rao sẽn na n tar biiga, t’a get yel-wẽn nins fãa a ba wã sẽn maandã. Baa a sẽn ne rẽ wã, a pa maand bũmb a woto ye. 15 A pa rɩt maand b sẽn kõ bõn-naands tãensã zut ye. A pa pʋʋsd Israyɛll buudã bõn-naandsã sẽn yaa bõn-yoodã ye. A pa rẽgemd a to pag ye. 16 A pa namsd ned baa a yembr ye. A pa talld bũmb sam-soab sẽn gãneg n deeg samd ye. A pa fãad ned bũmb ye. A yãkda a meng rɩɩb n kõ kom sẽn tar a soaba, la a kõt sẽn yaa-a beel fuugu. 17 A yõkda a meng n pa weoogd naong soab ye. A pa pengd ned n dogl yõod ye. A sakda mam tõodã, la a tũud mam noyã. Ned a woto pa na n ki a ba wã kongr yĩng ye. Sãmbg sẽn kae, a na n kell n vɩɩmdame. 18 La a ba wã sẽn da maand zãmbo, n da fãad a ba-biiga, la a ra maand sẽn yaa wẽng a nebã sʋkã, a na n kii a kongrã yĩnga.

19 “‘La yãmb na n sokame yaa: “Bõe yĩng tɩ biigã pa tar taal a ba wã kongr yĩnga?” Sẽn mik tɩ biigã maana sẽn yaa tɩrg la sẽn zemse, n sak mam noyã fãa la a tũ-bã, a na n kell n vɩɩmdame.+ 20 Sɩɩg* ning sẽn maand yel-wẽna, yaa sɩ-kãng n na n ki.+ Biig pa na n tall taal a ba kongr yĩng ye. Ba me pa na n tall taal a biig kongr yĩng ye. Mam na n kaoo nin-tɩrg bʋʋd wa sẽn zems a tɩrlmã, la m kao nin-wẽng bʋʋd wa sẽn zems a wẽnemã.+

21 “‘Nin-wẽng sã n bas yel-wẽn nins fãa a sẽn maandã, n sakd mam noyã la a maand sẽn yaa tɩrg la sẽn zemse, a na n kell n vɩɩmdame. A pa na n ki ye.+ 22 Mam pa na n sɩbg-a yel-wẽn nins a sẽn maanã baa a ye poorẽ ye.+ A na n kell n vɩɩmdame, a sẽn maand sẽn yaa tɩrgã yĩnga.’+

23 “A Zeova sẽn yaa Zu-soab sẽn ka to wã sokame yaa: ‘Mam maanda sũ-noog ne nin-wẽng kũum bɩ?+ Mam daabã pa a toeem a manesmã n kell n vɩɩmd sɩda?’+

24 “‘La nin-tɩrg sã n bas a tɩrlmã n maand sẽn yaa wẽnga,* a sã n maand bõn-wẽns nins fãa nin-wẽng sẽn maandã, a na n vɩɩmdame sɩda? Mam pa na n le tẽeg a tʋʋm-tɩrsã baa a yembr yell ye.+ A sẽn pa maan sɩdã, n paas yel-wẽn nins a sẽn maanã yĩnga, a na n kiime.+

25 “‘La yãmb na n yeelame yaa: “A Zeova manesmã pa tɩrg ye.”+ Yãmb a Israyɛll buudã neba, m bõos tɩ y kelge! Yaa mam manesmã n pa tɩrg bɩ?+ Pa yãmb manesmã n pa tɩrg sɩda?+

26 “‘Nin-tɩrg sã n bas a tɩrlmã n maand sẽn yaa wẽnga, n wa ki rẽ yĩnga, yaa wẽng ning a sẽn maanã yĩng la a sẽn ki wã.

27 “‘Nin-wẽng sã n bas a wẽnemã a sẽn maandã, n sɩng sẽn yaa tɩrg la sẽn zems maanego, a na n kogla a vɩɩmã.*+ 28 A sã n bãng tɩ bũmb nins a sẽn maandã pa sõma n base, a na n kell n vɩɩmdame. A pa na n ki ye.

29 “‘La Israyɛll buudã neb na n yeelame yaa: “A Zeova manesmã pa tɩrg ye.” Yãmb a Israyɛll buudã neba, sɩd-sɩda, yaa mam manesmã n pa tɩrg bɩ?+ Pa yãmb manesmã n pa tɩrg sɩda?’

30 “‘Woto wã, yãmb a Israyɛll buudã neba, mam na n kaoo yãmb ned kam fãa bʋʋd wa sẽn zems a manesem.’+ Yaa a Zeova sẽn yaa Zu-soab sẽn ka to wã n yeele. ‘Toeem-y-yã, toeem-y zãng n bas y yel-wẽnã fãa, sẽn na yɩl tɩ b ra le yɩ bũmb* sẽn kɩtd tɩ y tar taal ye. 31 Bas-y yel-wẽn nins fãa y sẽn maandã,+ la y bao sũ-paall la yam-paalle.*+ Bala yãmb a Israyɛll buudã neba, bõe yĩng tɩ y segd n ki?’+

32 “‘Mam pa maand sũ-noog ne ned baa a ye kũum ye.’+ Yaa a Zeova sẽn yaa Zu-soab sẽn ka to wã n yeele. ‘Woto wã, toeem-y n kell n vɩɩmde.’”+