Zeremi sebre
33 A Zeova goma ne a Zeremi naoor a yiib-n-soaba. Rẽ tɩ b ket n pag-a-la Gũudbã samandẽ.+ A yeelame: 2 “A Zeova sẽn yaa tẽngã Naandã, a Zeova sẽn yaa soab ning sẽn maan tẽngã la a lugl-a kãn-kãe wã, soab ning yʋʋr sẽn yaa a Zeova wã yeelame: 3 ‘Bool maam tɩ m na n leok-f lame. M na n yɩɩ tao-tao n togs-f bõn-kãsems f sẽn pa mi, la võor wʋmb sẽn yaa toogo.’”+
4 “Ad Israyɛll Wẽnnaam a Zeova sẽn yeel tẽn-kãngã rotã la Zida rĩm-dãmbã rot wɛɛngẽ, rot nins b sẽn tus n lub n na n kogl b mens b sẽn gũbg-bã la zabrã yĩngã wɛɛngẽ,+ 5 la neb nins sẽn wat n na n zab ne Kalde nebã wɛɛngẽ. Yaa neb nins sẽn pids zĩ-kãensã ne kũ-rãmb sẽn yaa neb mam sẽn kʋ m sũ-puugrã la m sũ-yikrã pʋgẽ wã, neb nins wẽnem sẽn kɩt tɩ mam solg m neng ne tẽn-kãnga wã: 6 ‘Mam na n sãoog-a lame n kɩt t’a le paam laafɩ.+ Mam na n sãooga nin-buiidã, la m kõ-b bãan la sɩd wʋsgo.+ 7 Mam na n talla Zida la Israyɛll neb nins sẽn be yembdã n lebg n wa.+ Mam na n le kõ-b-la pãng wa sɩngrẽ wã.+ 8 Mam na n yɩlg-b lame n yiis yel-wẽn nins b sẽn maan n beeg maamã taalã fãa.+ Mam na n kõ-b-la sugr tɩ b ra le tall taale, yel-wẽnã la beegr nins fãa b sẽn maan n beeg maamã yĩng ye.+ 9 Tẽn-kãngã yʋʋrã na n kɩtame tɩ m maan sũ-noogo. A na n kɩtame tɩ dũniyã neb nins fãa sẽn na n wʋm bõn-sõma nins fãa mam sẽn kõ-a wã+ pẽg maam la b kõ-m ziiri. B na n yɛɛsame la b rig rabeem,+ bõn-sõma nins mam sẽn na n kõ-a wã, la bãan ning mam sẽn na n kõ-a wã yĩnga.’”+
10 “Ad a Zeova sẽn yeele: ‘Zĩ-kãngã yãmb sẽn na n yeel t’a yaa zĩ-vɩʋʋgo, tɩ ned wall yir dũng pa be a pʋgẽ wã, rat n yeel tɩ Zida tẽnsã la Zerizalɛm soayã sẽn yaa vɩɩd tɩ ned wall yir dũng pa le be be wã pʋgẽ, b na n le wʋma 11 kɩdeng la sũ-noog rãamde,+ pʋg-paal ne pʋg-paal sɩd koɛɛga, la b wʋm neb nins sẽn yete: “Pʋʋs-y-yã a Zeova sẽn yaa tãb-biis naabã barka, bala a Zeova yaa sõma.+ A maan-neerã paada wakat fãa!”’+
“‘B na n talla bark pʋʋsg maand n wa a Zeova roogẽ wã,+ bala mam na n talla soolmã neb nins sẽn be yembdã n lebg n wa wa sɩngrẽ wã.’ Yaa a Zeova n yeele.”
12 “Ad a Zeova sẽn yaa tãb-biis naabã sẽn yeele: ‘Zĩ-kãngã sẽn yaa vɩʋʋg tɩ ned wal yir dũng pa be a pʋgẽ wã, la a tẽnsã fãa pʋsẽ, rũms wãbneg zĩis na n le zĩndame tɩ rũm-kɩɩmbã tõe n kɩt tɩ b rũmsã gãand be n vʋʋse.’+
13 “‘Tẽns nins sẽn be soolmã zĩig ning sẽn yaa tãensã, tẽns nins sẽn be tẽn-nabrẽ wã, goabg tẽnsẽ wã, Bẽnzame soolmẽ wã, Zerizalɛm tẽn-kɩremsẽ wã,+ la Zida tẽnsẽ wã,+ rũm-kɩɩmbã na n le paam n sõda b rũmsã yɛsa.’ Yaa a Zeova n yeele.”
14 “‘Wakat n wate, tɩ mam na n pids pʋlem-nood nins mam sẽn pʋlem Israyɛll ne Zida nebã wɛɛngẽ wã.’ Yaa a Zeova n yeele.+ 15 ‘Wakat kãnga, mam na n kɩtame tɩ yageng* sẽn yaa tɩrg yi a Davɩɩd pendẽ wã.+ A na n kaoo bʋʋd ne tɩrlem, la a maand sẽn yaa tɩrg soolmã pʋgẽ.+ 16 Wakat kãnga, Zida na n paama fãagre,+ tɩ Zerizalɛm zĩnd bãane.+ Ad b sẽn na n boond tẽngã ne yʋʋr ninga: A Zeova yaa tõnd tɩrlem.’”+
17 “Ad a Zeova sẽn yeele: ‘B pa na n tol n kong a Davɩɩd pendã ned sẽn na n zĩnd Israyɛll naam geerã zug ye.+ 18 Maan-kʋʋdbã sẽn yaa Levi buudã nebã me pa na n tol n kong ned sẽn na n yals mam taoor n kõ maand sẽn yõogd bugum, n yõog kood biis kũuni, la a kõ maand ye.’”
19 A Zeova le goma ne a Zeremi n yeele: 20 “Ad a Zeova sẽn yeele: ‘Yãmb sã n tõog n sãam kaool ning mam sẽn maan wĩndgã wɛɛngẽ, la kaool ning mam sẽn maan yʋngã wɛɛngẽ wã, n gɩdg wĩndg la yʋng tɩ b pa wa b wakate,+ 21 yaa rẽ poor bal la kaool ning mam sẽn maan ne m tʋm-tʋmd a Davɩɩdã na n tõog n sãame,+ t’a pa le paam yageng sẽn na n zĩnd a geerã zug n yɩ rĩm n dɩ naam ye.+ Yaa woto me ne kaool ning mam sẽn maan ne maan-kʋʋdbã sẽn yaa Levi buudã nebã sẽn yaa mam tʋm-tʋmdbã.+ 22 Mam na n kɩtame tɩ m tʋm-tʋmd a Davɩɩd yagensã, ne Levi buudã neb sẽn tʋmd mam tʋʋmã lebg wʋsg wa saasẽ ãdsã* sẽn pa tõe n sõd n sa wã, la wa mogrã bĩisr sẽn pa tõe n makã.’”
23 A Zeova le goma ne a Zeremi n yeele: 24 “Fo pa wʋmd nin-kãensã sẽn yet t’a ‘Zeova na n daaga buud a yiibã a sẽn yãkã n basã’ sɩda? Sẽn paase, b paoogda mam nin-buiidã, n pa le get-b wa buud ye.
25 “Ad a Zeova sẽn yeele: ‘Mam sẽn lugl kaool ning mam sẽn maan wĩndgã la yʋngã wɛɛngẽ kãn-kãe to-to wã,+ la m lugl noy kãn-kãe saasã la tẽngã yĩngã,+ 26 woto me, mam pa na n tol n bas a Zakoob yagensã la m tʋm-tʋmd a Davɩɩde, n pa yãk a yageng t’a rɩ naam a Abrahaam, a Izaak ne a Zakoob yagensã zut ye. Bala mam na n tigma b neb nins sẽn yaa yembsã n tall n wa,+ la m zoe b nimbãanega.’”+