Yɩɩn-sõamyã sebre

37 Ra yik f sũur nin-wẽnsã yĩnga,

wall f maan sũ-kiir ne tʋʋm-wẽns-maandbã ye.+

 2 B na n kʋɩɩ tao-tao wa moodo,+

la b zelg wa mo-maasa.

 3 Teeg a Zeova, la f maan sẽn yaa sõma.+

Zĩnd tẽngã zugu,* la f maan sɩda.+

 4 Maan sũ-noog wʋsg a Zeova yĩnga,*

t’a na n kõo foo f sũurã sẽn date.

 5 Bas t’a Zeova wilg-f sore.+

Teeg-a, t’a na n sõng-f lame.+

 6 A na n kɩtame tɩ f tɩrlmã yãg wa sõor pukri,

la a kɩt tɩ tʋʋm-tɩrs nins f sẽn tʋmã yãg wa wĩnto-sʋk wĩntoogo.

 7 Sĩnd a Zeova taoore,+

n gũ-a ne f sũur fãa.*

Ra yik f sũur ne ned

sẽn tõogd n pidsd a mag-wẽns ye.+

 8 Bas sũ-yikri, la f bas sũ-puugri.+

Ra yik f sũur n wa maan wẽng ye.

 9 Bala b na n menesa nin-wẽnsã,+

la neb nins sẽn teeg a Zeova wã na n sooga tẽngã.+

10 Keta bilf bala, tɩ nin-wẽnsã pa na n le beẽ ye.+

Fo na n gesa zĩig ning b sẽn da be wã,

la fo pa na n yã-b ye.+

11 La sik-m-mens rãmbã na n sooga tẽngã.+

B na n paama sũ-noog wʋsgo, laafɩ wã sẽn na n yɩ wʋsgã yĩnga.+

12 Nin-wẽng magdame n na n maan nin-tɩrg wẽnga.+

A wãbda a yẽna, a sũurã sẽn yik ne nin-tɩrgã yĩnga.

13 La a Zeova na n la-a lame,

bala a miime tɩ nin-wẽngã daar na n taame.+

14 Nin-wẽnsã wõogda b sʋʋs la b yãagd b tãbdo,

n na n kʋ b sẽn namsd b rãmbã la naong rãmbã,

la b kʋ sẽn maand-b sẽn yaa tɩrgã.

15 La b sʋʋsã na n wẽneg n kõsa b sũyã.+

B na n kaoo b tãbdã.

16 Nin-tɩrg sã n tar bilfu, sãoo

nin-wẽns wʋsg sẽn tar zembala.+

17 Bala nin-wẽnsã kams na n kaoome,

la a Zeova na n teela nin-tɩrsã.

18 A Zeova mii bũmb ning sẽn paamd sẽn pa tar-b taalã.*

B rogem-pʋɩɩrã na n kaoosa wakat fãa.+

19 B pa na n paam yãnd yel-beed wakat ye.

Kom sasa, b na n paama rɩɩb wʋsgo.

20 La nin-wẽnsã na n sãamame.+

A Zeova bɛɛbã na n menema wa rũms wãbneg zĩig neerem sẽn menemd to-to wã.

B na n menema wa bug-zõose.

21 Nin-wẽng pengdame, la a pa lebsd ye.

La nin-tɩrg yaa nimbãan-zoɛta, la kõata.+

22 Wẽnnaam sẽn ning b rãmb barkã n na n soog tẽngã,

la a sẽn kãab b rãmb wẽngã na n sãamame.+

23 A Zeova sũur sã n noom ne ned na-kẽndre,+

a wilgda a soabã sore.+

24 Baa a soabã sã n lake, a pa na n lʋɩ a nengã zug ye.+

Bala a Zeova gãda a nugã.*+

25 Mam da yaa bi-bɩɩga, la masã mam kʋʋlame,

la mam zɩ n yã tɩ b raag nin-tɩrg n base,+

wall nin-tɩrg kamb sẽn bõosd rɩɩb* ye.+

26 Wakat fãa, a sakdame n pengdẽ.+

Wẽnnaam na n ninga a kambã barka.

27 Bas wẽnga, la f maan sẽn yaa sõma,+

tɩ rẽ la f na n vɩɩmd wakat sẽn kõn sa.

28 Bala a Zeova nonga tɩrlem.

A pa na n daag sẽn maand-b sɩd ne-a wã n bas ye.+

B na n paama koglg wakat fãa,+

la b na n menesa nin-wẽnsã kamb la b yagense.+

29 Nin-tɩrsã na n sooga tẽngã.+

B na n vɩɩmda a zug wakat sẽn kõn sa.+

30 Nin-tɩrg noor kõta yam,*

t’a zɩlemdã gomd tɩrlem yelle.+

31 A Wẽnnaamã tõog bee a sũurẽ wã.+

A sã n wa kẽnda, a naoã pa na n salg ye.+

32 Nin-wẽng maaga a yĩng n get nin-tɩrga,

n baood-a n na n kʋ.

33 La a Zeova pa na n bas-a nin-wẽngã nugẽ,+

wall a ning-a taal b sã n wa kaood a bʋʋd ye.+

34 Teeg a Zeova, la f tũ a sorã,

tɩ rẽ la a na n zẽk foo tɩ f soog tẽngã.

35 Mam yãa nin-toaaga, nin-wẽng

sẽn yɛdgd wa tɩɩg sẽn be zĩig ning a sẽn yi wã t’a vãadã yaa wʋsgo.+

36 La zĩig pʋgẽ, a menemame n pa le beẽ ye.+

Mam da tara a gẽesgo, la b pa le tõe n yã-a ye.+

37 Maag f yĩng n ges burkĩna,

la f ra bas nin-tɩrg+ gesg ye.

Bala bãan n gũud nin-kãnga.+

38 La b na n sãama kɩɩsdbã fãa.

Nin-wẽnsã baasg na n yɩɩ sãoongo.+

39 Nin-tɩrsã fãagr yita a Zeova nengẽ.+

A yaa nin-tɩrsã pãng zĩig yel-pakr wakate.+

A na n kɩtame tɩ b põs nin-wẽnsã nusẽ la a fãag-ba,

bala b wa n soonda a nengẽ.+