Zeremi sebre
37 A Zoziyas biig a Sedesiyaas+ ledga a Zowakim biig a Koniya*+ n sɩng naam dɩɩbo, bala Babilon rĩm a Nebukadnezaar* kɩtame t’a lebg rĩm Zida soolmẽ wã.+ 2 La yẽ ne a tʋm-tʋmdbã la soolmã nin-buiid pa kelg a Zeova goamã no-rɛɛs a Zeremi sẽn taas-bã ye.
3 Rĩm a Sedesiyaas tʋma a Selemiya biig a Yehukall+ ne maan-kʋʋd a Maaseya biig a Sofoni+ no-rɛɛs a Zeremi nengẽ, tɩ b tɩ yeel yaa: “D bõos tɩ f pʋʋs tõnd Wẽnnaam a Zeova tõnd yĩnga.” 4 Rẽ t’a Zeremi ra kẽnda a yam nin-buiidã sʋka, bala b ra nan pa yõk-a n ning bãens roogẽ ye.+ 5 Wakat kãnga, a Farawõ tãb-biisã yii Ezɩpti,+ tɩ Kalde nebã sẽn da gũbg Zerizalɛm n na n zabã wʋme. Rẽ n so tɩ b loog n bas Zerizalɛm.+ 6 Dẽ, a Zeova goma ne no-rɛɛs a Zeremi n yeele: 7 “Ad Israyɛll Wẽnnaam a Zeova sẽn yeele: ‘Ad yãmb sẽn segd n tɩ togs Zida rĩmã sẽn tʋm yãmb tɩ y wa sok maamã bũmb ningã: “Na n wa yɩɩ tɩlɛ t’a Farawõ tãb-biisã sẽn wat n na n sõng yãmbã lebg n leb b soolmẽ wã, Ezɩpti.+ 8 La Kalde nebã na n lebg n wa zaba ne tẽn-kangã n deeg-a, la b yõog-a bugum.”+ 9 Ad a Zeova sẽn yeele: “Ra belg-y y mens* n yetẽ: ‘Sãmbg sẽn kae, Kalde nebã na n loog n basa tõnd’ ye. Bala b pa na n loog ye. 10 Baa yãmb sã n tõog n kʋ Kalde tãb-biisã fãa sẽn zabd ne yãmbã, tɩ yaa b neb nins sẽn poglã bal n kete, b na n yika b fu-rotẽ wã n yõog tẽn-kãngã bugum.”’”+
11 Kalde tãb-biisã sẽn wa n loog n bas Zerizalɛm a Farawõ tãb-biisã yĩngã,+ 12 a Zeremi yika Zerizalɛm n na n kẽng Bẽnzame soolmẽ wã,+ n tɩ reeg a pʋɩɩr a nebã sʋka. 13 La no-rɛɛs a Zeremi sẽn wa n ta Bẽnzame rignoorã, a Hananiya biig a Selemiya biig a Iriya sẽn yaa tãb-biis naab ning sẽn get gũudbã yellã yõk-a lame n yeele: “Fo rat n yiime n tɩ naag Kalde nebã!” 14 La a Zeremi yeelame yaa: “Pa sɩd ye! Mam pa rat n tɩ naag Kalde nebã ye.” La a Iriya pa kelg-a ye. A yõka a Zeremi n tɩ kõ nanambsã. 15 Nanambsã sũy yika wʋsg ne a Zeremi,+ tɩ b pãb-a la b pag-a+ seb-gʋlsd a Yehonatan roogã b sẽn maan tɩ lebg bãens roogã pʋgẽ. 16 B kẽesa a Zeremi bãensã roogẽ,* roog a ye sẽn yaa bok b sẽn tu pʋgẽ, t’a pa be rasem wʋsgo.
17 Rẽ poore, rĩm a Sedesiyaas tʋmame tɩ b tall-a n wa, t’a soos n sok-a a zakẽ wã*+ yaa: “A Zeova togsa foo gomd bɩ?” T’a Zeremi leok yaa: “N-ye!” La a paase: “B na n dɩka yãmb n ning Babilon rĩmã nugẽ!”+
18 Sẽn paase, a Zeremi soka rĩm a Sedesiyaas yaa: “Bõe la mam maan n beeg yãmb ne y tʋm-tʋmdbã la nin-buiidã, tɩ yãmb yõk maam n ning bãensã roogẽ? 19 Yãmb no-rɛɛsdbã sẽn da togs yãmb bãngr-goam n yeel tɩ ‘Babilon rĩmã pa na n wa zab ne yãmb la ne soolem-kãnga wã’ bee yɛ?+ 20 Masã, m dĩma, m bõos tɩ y kelge. M bõos tɩ y sak m kosgã. Ra lebs-y maam seb-gʋlsd a Yehonatan roogẽ wã ye.+ Sã n pa rẽ, m na n kii be.”+ 21 Dẽ, rĩm a Sedesiyaas kõo noor tɩ b pag a Zeremi Gũudbã samandẽ.+ Beoog sẽn vẽeg fãa, b ra tallda bur-gilg n yi bur-wẽedbã sor zug n wa kõ-a,+ hal tɩ tẽngã burã fãa wa sa.+ A Zeremi kell n paa Gũudbã samandẽ.