Zeremi sebre
41 Kiuug a yopoe-n-soabã pʋgẽ, a Elisama biig a Netaniya biig a Ismayɛll+ sẽn yaa na-roogã ned la rĩmã nin-kãseng a yembrã waa a Ahikam biig a Gedaliya nengẽ Mizpa,+ ne rap piiga. B sẽn wa n naag taab n dɩt Mizpa wã, 2 a Netaniya biig a Ismayɛll ne rap piigã sẽn da be ne-a wã yikame n kʋ a Safan biig a Ahikam biig a Gedaliya ne sʋʋga. Woto, b kʋʋ ned ning Babilon rĩmã sẽn da yãk t’a soog soolmã. 3 Sẽn paase, a Ismayɛll kʋʋ Zʋɩf-rãmb nins fãa sẽn da be ne a Gedaliya Mizpa wã, n paas Kalde sodaas nins sẽn da be be wã.
4 B sẽn kʋ a Gedaliya wã vẽkembeoogo, nand tɩ ned bãng rẽ, 5 neb pis-nii n yi Sikɛm+ la Sɩlo+ ne Samari+ n wa. B ra põnga b toeemsã, n pãrs b futã la b bog b yĩnsã,+ n zãad kood biis kũun la wisd sẽn yaa pɛɛlg n na n tall n kẽng a Zeova roogẽ wã.+ 6 Dẽ, a Netaniya biig a Ismayɛll yii Mizpa n na n tɩ seg-ba, n yãbd la a kẽnda. A sẽn wa n seg-bã, a yeel-b lame: “Wa-y-yã a Ahikam biig a Gedaliya nengẽ.” 7 La b sẽn kẽ tẽngã pʋgẽ wã, a Netaniya biig a Ismayɛll ne a rapã kʋ-b lame, n lob bulgã pʋgẽ.
8 La b sʋkã neb piig n yeel a Ismayɛll yaa: “Ra kʋ tõnd ye. Bala tõnd solga bɩle, orze,* kaam la sɩɩd weoogẽ wã.” Rẽ n so t’a pa naag bãmb n kʋ ne b saam-biisã ye. 9 A Ismayɛll loba neb nins fãa a sẽn kʋ wã bul-kẽeng pʋgẽ, bulg ning rĩm a Aaza sẽn tu Israyɛll rĩm a Baasa yĩngã.+ Yɩɩ bul-kãng la a Netaniya biig a Ismayɛll sẽn pids ne neb nins a sẽn kʋ wã.
10 A Ismayɛll yõga neb nins fãa sẽn ket Mizpa wã.+ Yaa rĩmã kom-pugli wã la Mizpa neb nins sẽn ketã, neb nins gũudbã naab a Nebuzaradan sẽn da ning a Ahikam biig a Gedaliya nugẽ wã.+ A Netaniya biig a Ismayɛll yõg-b lame n dɩk sor n dabd Amon nebã+ nengẽ.
11 A Kareya biig a Zohanan+ ne tãb-biisã nanambsã fãa sẽn wʋm bõn-wẽng ning a Netaniya biig a Ismayɛll sẽn maanã, 12 b peega rapã fãa n na n tɩ zab ne a Netaniya biig a Ismayɛlle. B tɩ paam-a-la Gabawõ koomã sẽn yaa wʋsgã* noore.
13 Neb nins fãa sẽn da be ne a Ismayɛllã sẽn yã a Kareya biig a Zohanan ne tãb-biisã nanambs sẽn be ne-a wã, b kɩdma sũ-noogo. 14 Dẽ, neb nins fãa a Ismayɛll sẽn da yõg Mizpa+ wã lebg n kẽnga a Kareya biig a Zohanan nengẽ. 15 La a Netaniya biig a Ismayɛll ne a rap a nii zoeeme n kẽng Amon nebã nengẽ, t’a Zohanan pa paam-b ye.
16 A Kareya biig a Zohanan ne tãb-biisã nanambs nins fãa sẽn da be ne yẽ wã peega Mizpa neb nins sẽn ketã, neb nins b sẽn fãag a Netaniya biig a Ismayɛll nugẽ, a sẽn kʋ a Ahikam biig a Gedaliya+ wã poorã. B talla rapã, sodaasã, pagbã, kambã la na-yirã tʋm-tʋmdbã n yi Gabawõ. 17 B kẽngame n tɩ sig a Kimham gãag zĩigã sẽn pẽ Betlehɛmmã,+ n magd n na n kẽng Ezɩpti,+ 18 Kalde nebã yĩnga. Bala b ra zoeta Kalde nebã, a Netaniya biig a Ismayɛll sẽn kʋ a Ahikam biig a Gedaliya sẽn yaa ned ning Babilon rĩmã sẽn da yãk t’a soog soolmã yĩnga.+