Bʋ-kaoodbã sebre

11 Galaad rao a Zɛfte+ ra yaa zabr gãndaoogo. Yẽ ra yaa pʋg-yoodr biiga, t’a ba wã yʋʋr la a Galaade. 2 La a Galaad pagã me roga kom-dibli a taab n kõ-a. A pagã kom-dibli wã sẽn wa n bɩ wã, b riga a Zɛfte n yeel-a yaa: “Fo pa na n paam pʋɩɩr tõnd ba wã zakẽ ye. Bala fo yaa pag a to biiga.” 3 Woto, a Zɛfte zoe n zãaga ne a ba-biisã n tɩ zĩnd Toob soolmẽ wã. La neb sẽn ka tʋʋm n wa n naag-a, n da tũud-a.

4 Sẽn kaoos bilfu, Amon nebã yika zabr ne Israyɛll nebã.+ 5 Amon nebã sẽn wa n zabd ne Israyɛll nebã, Galaad kãsem-dãmbã kẽnga Toob soolmẽ wã tao-tao n na n tɩ tall a Zɛfte n wa. 6 B yeela a Zɛfte yaa: “Wa yɩ tõnd tãb-biisã taoor soab tɩ d tõog n zab ne Amon nebã.” 7 La a Zɛfte leoka Galaad kãsem-dãmbã yaa: “Pa yãmb n kisg maam hal wʋsgo, n dig-m n yiis m ba wã zakẽ la?+ Yãmb sẽn be yel-pakr pʋgẽ masã wã la y baood mam zĩiga?” 8 Tɩ Galaad kãsem-dãmbã leok a Zɛfte: “Yaa rẽ la tõnd sẽn lebg n wa fo nengẽ wã. Fo sã n tũ tõnd n tɩ zab ne Amon nebã, fo na n lebga tõnd naaba, n soog Galaad nebã fãa.”+ 9 Rẽ la a Zɛfte yeel Galaad kãsem-dãmbã yaa: “Yãmb sã n tall maam n kuil tɩ m tɩ zab ne Amon nebã t’a Zeova sõng-m tɩ m tõog-ba, maam n na n sɩd lebg yãmb naaba!” 10 La Galaad kãsem-dãmbã yeela a Zɛfte yaa: “Bɩ a Zeova yɩ tõnd kaseto,* tõnd sã n pa maan wa fo sẽn yeelã.” 11 Woto, a Zɛfte tũu Galaad kãsem-dãmbã, tɩ nin-buiidã kɩt t’a lebg b naaba, la b tãb-biisã taoor soaba. La a Zɛfte lebs n togsa a goamã fãa a Zeova taoor Mizpa.+

12 Rẽ poore, a Zɛfte tʋma koe-taasdb Amon nebã rĩmã+ nengẽ tɩ b tɩ yeel-a: “Bõe la mam maan foo* tɩ fo wa zabd ne mam soolmã?” 13 Amon nebã rĩm leoka a Zɛfte koe-taasdbã yaa: “Yaa Israyɛll nebã sẽn deeg mam tẽngã b sẽn wa n yi Ezɩpt n wa wã,+ sẽn sɩng ne Arno kʋɩlgã+ n tãag Zabok ne Zʋrdẽ kʋɩlsã.+ Masã, bɩ y lebs-a ne laafɩ.” 14 La a Zɛfte lebs n tʋma koe-taasdbã Amon nebã rĩmã nengẽ, 15 tɩ b tɩ yeel-a yaa:

“Ad a Zɛfte sẽn yeele: ‘Israyɛll nebã pa reeg Mowaab+ la Amon nebã+ tẽng ye. 16 Bala Israyɛll nebã sẽn yi Ezɩpt n wa wã, b pasga we-raoogã n yi Mog-miuugẽ wã+ n sãag n ta Kadɛɛse.+ 17 Dẽ, Israyɛll nebã tʋma koe-taasdb Edom rĩmã+ nengẽ tɩ b tɩ yeel-a: “D bõos tɩ f bas tɩ d pasg f soolmã.” La Edom rĩmã pa kelg bãmb ye. B tʋma koɛɛg Mowaab rĩmã+ me nengẽ, la yẽ me pa sak ye. Woto, Israyɛll nebã kell n paa Kadɛɛse.+ 18 B sẽn wa n pãrgd we-raoogã, b gila Edom+ ne Mowaab soolmã. B kẽna Mowaab+ soolmã yaanga, n tɩ tilg b sikã Arno kʋɩlgã soolmẽ. Bãmb pa gãng Mowaab toadgã ye.+ Bala Arno kʋɩlgã n da yaa Mowaab soolmã toadga.

19 “‘Rẽ poore, Israyɛll nebã tʋma koe-taasdb a Siyon sẽn yaa Amoor nebã rĩm n dɩt naam Hɛsbonnã nengẽ, tɩ b tɩ yeel-a yaa: “D bõos tɩ f bas tɩ d pɩʋʋg f soolmã n kẽng d zĩigẽ wã.”+ 20 La a Siyon pa kɩs Israyɛll nebã sɩd ye. Rẽ n sõ t’a pa sak tɩ b pɩʋʋg a soolmã ye. Woto wã, a tigma a tãb-biisã fãa n kẽng n tɩ tilg tãb-sik Zahaaz n na n zab ne Israyɛll nebã.+ 21 Dẽ, Israyɛll Wẽnnaam a Zeova ninga a Siyon ne a nebã fãa Israyɛll nebã nugẽ tɩ b tõog-ba. La Israyɛll nebã reega soolem ning fãa Amoor nebã sẽn da be wã.+ 22 Woto, bãmb deega Amoor nebã soolmã fãa, sẽn sɩng ne Arno kʋɩlgã n tãag Zabok kʋɩlgã, la sẽn sɩng ne we-raoogã n tãag Zʋrdẽ kʋɩlgã.+

23 “‘Yaa Israyɛll Wẽnnaam a Zeova n dig Amoor nebã n yiis Israyɛll nebã+ sẽn yaa a nin-buiidã taoore. Tɩ yãmb dat n dig-b n yiis masã? 24 Pa bũmb ning fãa fo wẽnnaam a Kemos+ sẽn kõt foo tɩ f soogã la f soogd sɩda? Yaa ned ning fãa tõnd Wẽnnaam a Zeova sẽn dig n yiis tõnd taoorã la tõnd me na n digi.+ 25 Fo sãoo Mowaab rĩm a Zipoor biig a Balak la?+ Rẽ yĩnga a zoe n baoo Israyɛll noore, wall a zab ne-a sɩda? 26 Israyɛll nebã sẽn zĩnd Hɛsbon ne tẽns nins a sẽn so wã,* Arowɛɛr ne tẽns nins a sẽn so wã,+ la tẽns nins fãa sẽn be Arno kʋɩlgã noorẽ wã yʋʋm kobs-tã wã, bõe yĩng tɩ yãmb zɩ n mak n na n lebs n deeg tẽn-kãens wakat kãnga?+ 27 Mam pa beeg foo ye. Fo sẽn zabd ne maamã, fo ka bʋʋm ye. Bɩ a Zeova sẽn yaa Bʋ-kaoodã+ bʋ yell ning sẽn be Israyɛll nebã ne Amon nebã sʋkã rũndã.’”

28 La Amon nebã rĩm pa sak n kelg koɛɛg ning a Zɛfte sẽn tʋm tɩ b tɩ taas-a wã ye.

29 A Zeova vʋʋsmã siga a Zɛfte.+ La yẽ pɩʋʋga Galaad ne Manase n kẽng Mizpe sẽn be Galaadã,+ n yi Galaad Mizpe wã n sãag Amon nebã nengẽ.

30 A Zɛfte pʋlma+ a Zeova n yeele: “Yãmb sã n ning Amon nebã mam nugẽ, 31 mam sã n yi Amon nebã nengẽ n lebg n wa ne laafɩ, ned ning sẽn na n yi mam zakã noor n seg maam na n lebga a Zeova rẽnda,+ la mam na n kõo yẽ t’a yɩ maoong sẽn yõogd bugum.”+

32 Woto, a Zɛfte kẽngame n tɩ zab ne Amon nebã, la a Zeova ninga bãmb yẽ nugẽ. 33 A Zɛfte kʋʋ bãmb hal wʋsgo. Yẽ sɩnga bãmb kʋʋb Arowɛɛr n ta Minit, rat n yeel tɩ tẽns pisi, n sãag n ta Abɛll-keramim. Dẽ, Israyɛll nebã tõoga Amon nebã, n soog-ba.

34 Rẽ fãa poore, a Zɛfte kuila a yir Mizpa.+ La ade! A bi-puglã n yi n na n seg-a, n wẽed bembeng* la a saoodẽ! Ra yaa a bi-yend tãa. Yẽ sẽn yãk a toogo, a ra pa tar bi-ribl bɩ bi-pugl ye. 35 A sẽn yã a bi-puglã, a kẽesa a futã n yeele: “Kayto, m biiga! Fo sãama mam sũur wʋsgo.* Bala fo lebga ned mam sẽn segd n yiisi. Mam yaaga m noor n gom ne a Zeova, la m pa tõe n lebs m noorã poorẽ ye.”+

36 La a bi-puglã leok-a lame: “M ba, yãmb sã n yaaga y noor n gom ne a Zeova, bɩ y maan maam wa yãmb sẽn pʋlmã,+ bala a Zeova sõnga yãmb tɩ y kʋ Amon nebã sẽn yaa y bɛɛbã n dok y sũuri.” 37 Rẽ poore, a yeela a ba wã yaa: “M kot-y lame tɩ y bas tɩ m maan bõn-kãngã: Bas-y-m kiis a yiib tɩ m kẽng tãensã zutu, tɩ maam ne m pʋg-sadem-taasã tɩ yãb m sẽn pa na n kẽ kãadmã yĩnga.”

38 T’a ba wã leok-a: “Kẽnge!” Woto, a kõ-a-la sor t’a na n kẽng n tɩ zĩnd tãensã zut kiis a yiibu, tɩ yẽ ne a pʋg-sadem-taasã yãb a sẽn pa na n kẽ kãadmã yĩnga. 39 Kiis a yiibã poore, a lebg n waa a ba wã nengẽ, t’a ba wã maan-a wa a sẽn da wẽenã.+ A pa tol n kẽ ne rao ye. La yãoã lebga minung* Israyɛlle: 40 Yʋʋmd-yʋʋmde, rasem a naas yʋʋmdã pʋgẽ, Israyɛll kom-pugli wã ra kẽnd n pẽgda Galaad rao a Zɛfte bi-puglã.