Ezekɩyɛll sebre
33 A Zeova goma ne maam n yeele: 2 “Ninsaal biiga, gom ne f buudã neb+ n yeel-b yaa:
“‘Mams-y wa mam sẽn na n kɩt tɩ zabr wa soolem pʋgẽ,+ tɩ soolem-kãng nebã fãa yãk ned n kɩt t’a lebg b gũuda. 3 A sã n yã bɛɛbã sẽn wat soolmẽ wã, a peebda baorg n keoog nin-buiidã.+ 4 Ned sã n wʋm baorgã rãamd n pa kelg keoogrã,+ tɩ bɛɛbã wa yãk a yõorã,* a zɩɩmã taal na n zĩnda a meng zugu.+ 5 A wʋma baorgã rãamde, la a pa kelg keoogrã ye. A zɩɩmã taal na n zĩnda a meng zugu. A sã n da kelg keoogrã, a ra na n fãaga a vɩɩmã.*
6 “‘La gũudã sã n yã bɛɛbã sẽn wat n pa peeb baorgã,+ tɩ nin-buiidã pa paam keoogre, bɛɛbã sã n wa yãk b nin-yɛng yõore,* nin-kãng na n kii a kongrã yĩnga, la mam na n ninga a zɩɩmã taal gũudã zugu.’*+
7 “Sã n yaa ne foom a ninsaal biiga, mam yãka foo tɩ fo yaa gũud Israyɛll buudã yĩnga. Fo sã n wʋm gomd sẽn yi mam noorẽ wã, fo segd n keoog-b lame n kõ-ma.+ 8 Mam sã n yeel nin-wẽng yaa: ‘Nin-wẽnga, hakɩɩka f na n kiime,’+ tɩ fo pa gom ne nin-wẽngã n keoog-a sẽn na yɩl t’a toeeme, a na n kii a kongrã yĩnga, bala a yaa nin-wẽnga.+ La mam na n ninga a zɩɩmã taal fo zugu. 9 La fo sã n keoog nin-wẽng n yeel t’a toeem a manesmã, t’a zãgs t’a kõn toeeme, a na n kii a kongrã yĩnga,+ la fo na n fãaga f vɩɩmã.*+
10 “Foom a ninsaal biiga, yeel Israyɛll buudã neb yaa: ‘Yãmb yeelame: “Tõnd kɩɩsgã la d yel-wẽnã zɩsa wʋsg d zutu, tɩ kɩt tɩ d faagdẽ.+ Woto wã, d na n yɩɩ wãn n kell n vɩɩmde?”’+ 11 Yeel-b yaa: ‘A Zeova sẽn yaa Zu-soab sẽn ka to wã yeelame: “M wẽenda ne m menga, tɩ mam pa maand sũ-noog ne nin-wẽng kũum ye.+ Mam daabã yaa nin-wẽng toeem a manesmã+ n kell n vɩɩmde.+ Toeem-y-yã! Toeem-y n bas-y y manesem-wẽngã.+ Yãmb a Israyɛll buudã neba, bõe yĩng tɩ y segd n ki?”’+
12 “Foom a ninsaal biiga, yeel f buudã neb yaa: ‘Nin-tɩrg sã n kɩɩse, a tɩrlmã pa na n fãag-a ye.+ Nin-wẽng sã n toeem n bas a wẽnemã, a wẽnemã pa na n kɩt t’a lak n lʋɩ ye.+ Nin-tɩrg sã n wa maan yel-wẽnde, a pa na n tõog n kell n vɩɩmd a tɩrlmã yĩng ye.+ 13 Mam sã n yeel nin-tɩrg yaa: “Hakɩɩka fo na n kell n vɩɩmdame,” t’a teeg a tɩrlmã n maan sẽn yaa wẽnga,*+ b pa na n tẽeg a tʋʋm-tɩrsã baa a yembr yell ye. A na n kii wẽngã a sẽn maanã yĩnga.+
14 “‘Mam sã n yeel nin-wẽng yaa: “Hakɩɩka fo na n kiime,” t’a toeem n bas a yel-wẽnã n maan sẽn yaa tɩrg la sẽn zemse,+ 15 a sã n lebs bũmb sam-soab sẽn gãneg ne-a n deeg samde,+ n yao bũmb a sẽn deeg ne pãnga,+ n tũud noy nins sẽn kõt vɩɩmã n pa maand wẽnga, a na n kell n vɩɩmdame.+ A pa na n ki ye. 16 B pa na n ning-a taal yel-wẽn nins a sẽn da maanã baa a ye poorẽ ye.+ A sẽn maand sẽn yaa tɩrg la sẽn zemsã yĩnga, a na n kell n vɩɩmdame.’+
17 “La fo buudã neb yeelame yaa: ‘A Zeova manesmã pa tɩrg ye.’ La sɩd-sɩda, yaa bãmb manesmã n pa tɩrga.
18 “Nin-tɩrg sã n bas a tɩrlmã n maan sẽn yaa wẽnga, a segd n kii rẽ yĩnga.+ 19 La nin-wẽng sã n bas a wẽnemã n maand sẽn yaa tɩrg la sẽn zemse, a na n kell n vɩɩmdame, a sẽn maand woto wã yĩnga.+
20 “La yãmb yeelame yaa: ‘A Zeova manesmã pa tɩrg ye.’+ Yãmb a Israyɛll buudã neba, mam na n kaoo yãmb ned kam fãa bʋʋd wa sẽn zems a manesem.”
21 Tõnd yembdã kẽngr yʋʋm piig la a yiib-n-soabã, kiuug piig soabã rasem a nu wã daare, rao n põs n yi Zerizalɛm n wa mam nengẽ+ n yeel yaa: “B reega tẽngã!”+
22 Rao ning sẽn põsã waoongã ket tɩ beoogã zaabre, a Zeova nugã zĩnda mam zugu. A kɩtame tɩ mam le tõe n gome, nand tɩ raoã wa mam nengẽ ne yibeoogã. Dẽ, mam da pa le yaa muk ye.+
23 A Zeova goma ne maam n yeele: 24 “Ninsaal biiga, neb nins sẽn be raboodẽ wã+ gomda Israyɛll soolmã yell n yetẽ yaa: ‘A Abrahaam ra yaa a ye bala, la a reega soolmã n sooge.+ La tõnd yaa wʋsgo. Hakɩɩka, b kõo tõnd soolmã tɩ d sooge.’
25 “Woto wã, yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb wãbda nemd ne a zɩɩm,+ n zẽkd y nens n get y bõn-naandsã sẽn yaa bõn-yoodã,* la y raagd zɩɩm wakat fãa.+ Rẽ wã, yãmb na n yɩɩ wãn n soog soolmã? 26 Yãmb teega y sʋʋsã.+ Yãmb tʋmda tʋʋm-wẽnse. Yãmb ned kam fãa rẽgemda a to paga.+ Rẽ wã, yãmb na n yɩɩ wãn n soog soolmã?”’+
27 “Ad fo sẽn segd n yeel-ba: ‘Ad a Zeova sẽn yaa Zu-soab sẽn ka to wã sẽn yeele: “Mam wẽenda ne m meng tɩ b na n kʋʋ neb nins sẽn be raboodẽ wã ne sʋʋse. Mam na n dɩka neb nins sẽn be weoogẽ wã n kõ we-rũmsã tɩ yɩ b rɩɩbo. Bãag n na n kʋ neb nins sẽn be soondg zĩisẽ la tãensã bogdẽ wã.+ 28 Mam na n kɩtame tɩ soolmã lebg raboog zãnga,+ la m kɩt t’a wuk-m-mengã sa. Israyɛll tãensã na n lebga zĩ-vɩɩdo,+ tɩ ned baa a ye pa pɩʋʋgd be ye. 29 Mam sã n wa kɩt tɩ soolmã lebg raboog zãng+ bõn-wẽns nins fãa b sẽn maanã yĩnga,+ b na n bãngame tɩ mam yaa a Zeova.”’
30 “Sã n yaa ne foom a ninsaal biiga, fo buudã neb bee lalsã sees la rotã noyẽ, n gomd fo yell ne taaba.+ B gomda ne taaba, tɩ b ned kam fãa yet a ba-biig yaa: ‘Wa tɩ d tɩ kelg a Zeova goamã.’ 31 B na n tũu taab wʋsg n wa zĩnd fo taoor wa b yaa mam nin-buiidu. B na n kelga fo goamã, la b pa na n tũ ye.+ Bala b belgda foo ne b no-goama, la b sũyã tʋlgda zãmb paoongo. 32 Ne bãmba, fo yaa wa nonglem yɩɩll koko-noog soab sẽn yɩɩnde, tɩ ned sẽn mi yʋʋm-teoog sẽn tar riss wẽeb sõma wẽedẽ. B na n kelga fo goamã, la b ned baa a ye pa na n tũ ye. 33 La fo goamã sã n wa pidsi, (b sɩd na n pidsame me) b na n bãngame tɩ no-rɛɛs n da be b sʋka.”+