Bʋ-kaoodbã sebre

1 A Zozuwe+ kũumã poore, Israyɛll nebã* soka a Zeova yaa:+ “Tõnd sʋkã, ãnd n segd n deng n tɩ zab ne Kanaã nebã?” 2 T’a Zeova leoke: “Yaa Zida buudã n segd n kẽnge.+ Ade! Mam ningda* soolmã yãmb nugẽ.” 3 Rẽ la Zida buudã neb yeel Sɩmeyõ buudã neb sẽn yaa bãmb saam-biisã yaa: “Wa-y n yãag-y tõnd tɩ d kẽng soolem ning b sẽn kõ tõndã pʋgẽ,+ tɩ d tɩ zab ne Kanaã nebã. Rẽ poore, tõnd me na n yãaga yãmb soolem ning b sẽn kõ yãmbã pʋgẽ.” Woto, Sɩmeyõ buudã neb yãaga bãmba.

4 Zida buudã neb sẽn kẽngã, a Zeova ninga Kanaã ne Perɛɛz nebã b nusẽ,+ tɩ b kʋ b rap tus-piig Bezɛke. 5 Bãmb tɩ mika a Adoni-bezɛk Bezɛk soolmẽ wã n zab ne-a be. Bãmb tõoga Kanaã nebã+ ne Perɛɛz nebã.+ 6 A Adoni-bezɛk zoeeme tɩ b rig-a n tɩ yõke, n fiuus a nug-raadã ne a na-raadã. 7 A Adoni-bezɛk yeelame: “Rĩm-dãmb pis-yopoe nug-raad la na-raad sẽn fiuus n da rɩgsd rɩɩb mam taablã tẽngre. Wẽnnaam dola maam m tʋʋmde.” Rẽ poore, b tall-a lame n kẽng Zerizalɛm,+ la a tɩ kii be.

8 Sẽn paase, Zida buudã nebã zaba ne Zerizalɛm+ n deeg-a. Bãmb kʋʋ a nebã ne sʋʋga, la b ning tẽngã bugum. 9 Rẽ zugẽ, Zida buudã nebã tɩ zaba ne Kanaã nebã sẽn da be soolmã zĩig ning sẽn yaa tãensã, Negɛɛbã la Sefela wã.+ 10 Zida buudã nebã kẽng n tɩ zaba ne Kanaã nebã sẽn be Ebrõ wã, (b ra boonda Ebrõ tɩ Kiryat-arba) la b tõoga a Sesayi, a Ahiman ne a Talmayi.+

11 Bãmb yii be n tɩ zab ne Debiir tẽngã nebã.+ (B ra boonda Debiir tɩ Kiryat-sefɛɛre.)+ 12 Rẽ la a Kalɛɛb+ yeel-yã: “Ned ning sẽn na n zab ne Kiryat-sefɛɛr n tõog-a, mam na n kõ-a-la m bi-pugl a Aksa t’a maan a paga.”+ 13 La a Otniyɛll+ sẽn yaa a Kalɛɛb yao a Kenaaz+ bi-riblã reega tẽngã. Woto, a Kalɛɛb kõ-a-la a bi-pugl a Aksa t’a maan a paga. 14 A sẽn wa n kuiisẽ wã, a pẽdga a sɩdã t’a kos a ba wã pʋʋgo. Dẽ, a Aksa siga a bõangã zugu,* t’a Kalɛɛb sok-a: “Yaa bõe la fo rata?” 15 T’a leoke: “M bõos tɩ y kõ-m kũuni, tɩ yɩ kaset tɩ m paama yãmb barka. Bala yãmb kõo maam tẽng nug-goabg sẽnesã.* Bɩ y kõ maam Gulot-mayim* me.” Dẽ, a kõo yẽ zugẽ Gulottã ne tẽngr Gulottã.

16 A Moyiiz rɛɛmbã+ sẽn yaa Kɛn nedã+ yagensã yii koms tɩɩsã+ tẽngẽ ne Zida buudã neb n wa Zida we-raoogẽ wã, Araad nug-goabgã.+ Bãmb kẽnga be n tɩ zĩnd nin-buiidã sʋka.+ 17 La Zida buudã nebã ne Sɩmeyõ buudã nebã sẽn yaa b saam-biisã tɩ zaba ne Kanaã nebã sẽn be Zefatã, n sãam tẽngã zãnga.+ Rẽ n kɩt tɩ b pʋd tẽngã yʋʋr tɩ Horma.*+ 18 Rẽ poore, Zida buudã nebã reega Gaaza+ ne a soolmã, Askelon+ ne a soolmã, la Ekron+ ne a soolmã. 19 A Zeova ra bee ne Zida buudã nebã. B reega soolmã zĩig ning sẽn yaa tãensã, la b pa tõog n dig neb nins sẽn da be tẽn-nabrẽ wã ye. Bala b ra tara zabr saar-dãmb* sẽn tar sʋ-wogd b naoẽ wã.+ 20 B rɩka Ebrõ n kõ a Kalɛɛb wa a Moyiiz sẽn da pʋlmã,+ la yẽ riga a Anak+ kom-dibli a tãabã n yiisi.

21 La Bẽnzame buudã neb pa rig Zebuus nebã sẽn da be Zerizalɛmmã n yiis ye. Rẽ n so tɩ Zebuus nebã ket n be Zerizalɛm, Bẽnzame buudã nebã sʋk n tãag rũndã.+

22 Wakat kãnga, a Zozɛf roogã neb+ tɩ zaba ne Betɛlle, la a Zeova ra bee ne bãmba.+ 23 A Zozɛf roogã neb ra tɩ soos n geta Betɛlle. (B ra boonda tẽngã tɩ Luuzi.)+ 24 Sẽn da soosd-b n get tẽngã yãa rao sẽn yit tẽngã pʋgẽ, n yeel-a yaa: “D bõos tɩ f wilg tõnd d sẽn tõe n tũ zĩig ning n kẽ tẽngã pʋga, tɩ d na n maan-f-la neere.” 25 La raoã wilg-b-la zĩig ning b sẽn tõe n tũ n kẽ tẽngã pʋgẽ. Bãmb kẽeme n kʋ a nebã ne sʋʋga, la b basa raoã ne a zakã rãmb tɩ b looge.+ 26 Raoã kẽnga Hɛt nebã soolmẽ n tɩ me tẽnga, n pʋd a yʋʋrã tɩ Luuzi, la b ket n boond-a-la woto n tãag rũndã.

27 Manase buudã nebã pa tõog n deeg Bɛt-seyan ne tẽns nins a sẽn so wã,* Taanak+ ne tẽns nins a sẽn so wã, Door ne tẽns nins a sẽn so wã, Ibleyam ne tẽns nins a sẽn so wã, la Megido ne tẽns nins a sẽn so wã ye.+ Kanaã nebã zãgsa fasɩ tɩ b kõn yi soolmẽ wã ye. 28 La Israyɛll nebã sẽn wa n paam pãngã, b modga Kanaã nebã tɩ b tʋmd bãmb tʋʋmã.+ La bãmb pa rig b fãa zãng ye.+

29 Efrayim buudã neb me pa rig Kanaã nebã sẽn da be Gezɛɛrã n yiis ye. Kanaã nebã kell n zĩnda bãmb sʋk Gezɛɛre.+

30 Zabulõ buudã neb pa rig Kitron ne Nahaloll+ nebã n yiis ye. Kanaã nebã kell n zĩnda bãmb sʋka, la b modg-b lame tɩ b tʋmd bãmb tʋʋmã.+

31 Asɛɛr buudã neb pa rig Ako nebã, Sɩdõ+ nebã, Alaab nebã, Akziib+ nebã, Hɛlba nebã, Afik+ la Rewoob+ nebã n yiis ye. 32 Asɛɛr buudã neb kell n zĩnda Kanaã nebã sẽn da be soolmẽ wã sʋka, bala bãmb pa rig-b n yiis ye.

33 Naftali buudã neb pa rig Bɛt-semes ne Bɛt-anat+ nebã n yiis ye. B kell n zĩnda Kanaã nebã sẽn da be soolmẽ wã sʋka.+ B modga Bɛt-semes ne Bɛt-anat nebã tɩ b tʋmd bãmb tʋʋmã.

34 Amoor nebã modga Dan buudã nebã tɩ b zĩnd soolmã zĩig ning sẽn yaa tãensã, bala b pa bas bãmb tɩ b sig tẽn-nabrẽ wã ye.+ 35 Amoor nebã zãgsa fasɩ tɩ b kõn yi n bas Herɛɛs tãngã, Ayalon+ la Saalbim+ ye. La a Zozɛf roogã rãmb pãngã* sẽn wa n paase,* b modg-b lame tɩ b tʋmd bãmb tʋʋm-wɛglã. 36 Amoor nebã soolem sɩnga Akrabim+ rʋʋdgẽ wã, la Sela n sãagdẽ.