Bʋ-kaoodbã sebre

3 Ad bu-zẽms nins a Zeova sẽn bas n pa rigã, sẽn na yɩl tɩ b mak Israyɛll neb nins fãa sẽn pa zĩnd Kanaã zabã wakatã,+ 2 (a maana woto n dat tɩ Israyɛll nebã zãmaan nins sẽn na n pʋglã bãng zabre, rat n yeel tɩ b rãmb nins sẽn pa bãng bõn-kãensa wã): 3 Yaa Filisti nanambs a nu wã,+ Kanaã nebã fãa, Sɩdõ nebã+ la Hevi nebã+ sẽn da be Libã tãngẽ wã,+ sẽn sɩng ne Baal-hɛrmo tãngã n tãag Lebo-hamate.*+ 4 Yẽ tũnuga ne nin-kãens n mak Israyɛll nebã, sẽn na yɩl n ges b sã n na n saka a Zeova noyã a sẽn da tũnug ne a Moyiiz n kõ b yaab-rãmbã.+ 5 Woto, Israyɛll nebã zĩnda Kanaã nebã+ sʋka, Hɛt nebã, Amoor nebã, Perɛɛz nebã, Hevi nebã la Zebuus nebã sʋka. 6 Israyɛll nebã rɩgsa bu-zẽmsã kom-pugli n maan b pagba, la b rɩgs b kom-pugli wã n kõ b kom-dibli wã. La bãmb sɩnga bu-kãens wẽnnaam-dãmbã tũubu.+

7 Woto, Israyɛll nebã maana sẽn yaa wẽng a Zeova nifẽ. Bãmb yĩma b Wẽnnaam a Zeova, n da tũud Baal-dãmba,+ la b pʋʋsd ra-lugsi.*+ 8 Rẽ n so t’a Zeova sũur puug ne Israyɛll nebã wʋsgo, t’a ning-b Mezopotami* rĩm a Kusan-risatayim nugẽ. A Kusan-risatayim sooga Israyɛll nebã yʋʋm a nii. 9 Israyɛll nebã sẽn kelem n kos a Zeova sõngrã,+ a Zeova yãka fãagd n na n fãag bãmba.+ Yɩɩ a Otniyɛll+ sẽn yaa a Kalɛɛb yao a Kenaaz bi-riblã. 10 A Zeova vʋʋsmã siga yẽ zugu,+ la a lebga Israyɛll nebã bʋ-kaooda. A sẽn wa n kẽng zabrã, a Zeova ninga Mezopotami* rĩm a Kusan-risatayim yẽ nugẽ, la a tõoga a Kusan-risatayimmi. 11 Rẽ poore, tẽngã zĩnda bãan* yʋʋm pis-naase. La a Kenaaz bi-ribl a Otniyɛll wa n kiime.

12 Rẽ zugẽ, Israyɛll nebã leb n sɩnga sẽn yaa wẽng maaneg a Zeova nifẽ.+ Dẽ, a Zeova basame tɩ Mowaab+ rĩm a Eglon tõog Israyɛll nebã, bala bãmb maana sẽn yaa wẽng a Zeova nifẽ. 13 Sẽn paase, a Eglon kɩtame tɩ Amon nebã+ ne Amalɛk nebã+ zab ne Israyɛll nebã. Bãmb zaba ne Israyɛll nebã n deeg koms tɩɩs tẽngã.+ 14 Mowaab rĩm a Eglon sooga Israyɛll nebã yʋʋm piig la a nii.+ 15 Israyɛll nebã kelmame n kos a Zeova sõngre,+ t’a Zeova yãk fãagd+ n kõ bãmba. Yaa a Geera biig a Ewuud+ sẽn yaa Bẽnzame buudã neda,+ n yaa gobrã.+ Kaoosg zugẽ, Israyɛll nebã kõo a Ewuud fadg* t’a tɩ kɩs Mowaab rĩm a Eglon. 16 Wakat kãnga, a Ewuud maana sʋʋg sẽn tar noy a yiib t’a woglmã ta kãntɩɩga.* Yẽnda sẽbg-a-la a rɩtg gerẽ wã, a fuugã tẽngre. 17 A tɩ kɩsa Mowaab rĩm a Eglon fadgã.* La a Eglon ra yaa ned sẽn nob wʋsgo.

18 A Ewuud sẽn kɩs fadgã* n sa, yẽ ne neb nins sẽn tall fadgã n wa wã loogame. 19 La b sẽn wa n ta Gilgalle,+ zĩig ning b sẽn da peesd bõn-naandsã, a lebgame n tɩ yeel yaa: “N-na! Mam tara koɛɛg n na n taas yãmb y yembr bala.” Tɩ rĩmã yeel a tʋm-tʋmdbã tɩ b yi. Dẽ, a tʋm-tʋmdbã fãa yiime n bas-a. 20 Woto, a Ewuud kẽnga a nengẽ. Rẽ t’a zĩi a yĩngr do-maasgã pʋgẽ a yembre. A Ewuud yeelame: “Mam tara Wẽnnaam koɛɛg n na n taas yãmba.” Dẽ, yẽ yika a geerã* zug n yalse. 21 La a Ewuud wõoga sʋʋgã sẽn be a rɩtg gerẽ wã ne a nug-goabgã n kõs a pʋʋrã. 22 Sʋʋgã ne a gãtgã fãa kẽeme tɩ kaamã lim-a, bala a Ewuud pa foog sʋʋgã a pʋʋrẽ wã ye. La bĩndã yiime. 23 A Ewuud lebs n paga kʋɩlensã, n sog la a tũ roogã võorẽ n yi. 24 A loogrã poore, tʋm-tʋmdbã tɩ mikame tɩ yĩngr doogã kʋɩlens sogame. Dẽ, bãmb yeelame yaa: “A tog n maanda we-kɛɛng* pʋgẽ doogã sẽn yaa maasgã pʋgẽ.” 25 Bãmb kell n gũumẽ hal n tɩ b yamã wa yooda. La sẽn kaoosd t’a pa pakd yĩngr doogã kʋɩlensã, bãmb dɩka kʋɩlen-bilã n pake, n yã b rĩmã sẽn ki n dɩga.

26 Bãmb sẽn wa n yas n gũudẽ wã, a Ewuud zoeeme n põse. Yẽ tũu zĩig ning b sẽn da peesd bõn-naandsã+ n ta Seyiira ne laafɩ. 27 A sẽn ta wã, a peeba baorg+ Efrayim soolmã zĩig ning sẽn yaa tãensã+ n bool Israyɛll nebã, la bãmb yii tãensã zut n tũ-a n sigi, t’a be b taoore. 28 Dẽ, a yeela bãmb yaa: “Pʋg-y maam, bala a Zeova ninga Mowaab nebã sẽn yaa y bɛɛbã yãmb nugẽ.” Bãmb pʋga yẽ n tɩ gɩdg Zʋrdẽ kʋɩlgã zĩis nins b sẽn tõe n kẽn n dʋʋgã tɩ Mowaab nebã pa tõe n dʋʋg ye. La bãmb pa bas ned baa a ye t’a rʋʋg ye. 29 Wakat kãnga, bãmb kʋʋ sẽn na maan Mowaab neb+ tus-piiga. B fãa ra yaa rap sẽn tar pãnga, la sẽn yaa gãndaado. B baa a ye pa põs ye.+ 30 Baraare, Mowaab lʋɩɩ Israyɛll nebã nugẽ, la tẽngã zĩnda bãan* yʋʋm pis-nii.+

31 A Ewuud loogr poore, yaa a Anat biig a Samgaar+ n pʋgle. A talla raoog sẽn tar bãn-sɩleng a zugẽ tɩ b tar n lekd niisi,+ n kʋ Filisti neb kobs-yoobe.+ Yẽ me fãaga Israyɛll nebã.