Bʋ-kaoodbã sebre

9 La a Zerubaal biig a Abimelɛk+ wa n kẽnga a yɛs-rãmbã nengẽ Sikɛmme, n tɩ yeel bãmb ne a yaab-raoogã* zakã rãmb fãa yaa: 2 “M bõos tɩ y sok Sikɛm nanambsã* yaa: ‘Bʋg n yaa sõma ne yãmba? A Zerubaal kom-dibli pis-yopoe+ wã fãa sẽn na n dɩ naam yãmb zug bɩ, bɩ nin-yend sẽn na n dɩ naam yãmb zugu? La bɩ y tẽeg tɩ tõnd yaa rogem.’”*

3 La a Abimelɛk yɛs-rãmbã goma ne Sikɛm nanambsã fãa a yʋʋr yĩnga, la bãmb yam kẽe a Abimelɛke, bala b yeelame: “A yaa tõnd roagda.” 4 Dẽ, bãmb yãka wanzuri ligd-koeems pis-yopoe a Baal-berit+ roogẽ* wã n kõ a Abimelɛke. La a Abimelɛk rɩka ligdã n da neb sẽn ka tʋʋma, la tɩta-neb tɩ b pʋgd yẽnda. 5 Rẽ poore, a kẽnga a ba wã zakẽ Ofra+ n tɩ kʋ a Zerubaal kom-dibli pis-yopoe wã sẽn yaa a ba-biisã+ kug-yɛng zugu. Yaa a Zotam sẽn da yaa a Zerubaal nugẽ biigã bal n põse, bala a solgame.

6 Dẽ, Sikɛm ne Bɛt-milo nanambsã fãa tigma taab tɩ-bedrã sẽn be Sikɛm ra-lukã sɛɛgẽ wã, n kɩt t’a Abimelɛk lebg rĩma.+

7 B sẽn wa n togs a Zotam bũmb ning sẽn maanã, a yika tao-tao n tɩ yals Gerizim tãngã+ zug n zẽk a koɛɛg n gom ne-b n yeele: “Sikɛm nanambse, kelg-y maam, la Wẽnnaam me na kelg-yã.

8 “Daar a yembre, tɩɩs n kẽng n na n tɩ yãk* rĩm t’a rɩ naam bãmb zugu. Bãmb yeela oliiv tɩɩgã yaa: ‘Yɩ tõnd naaba.’+ 9 La oliiv tɩɩgã leoka bãmba: ‘Mam na bas m kaamã* b sẽn tar n waoogd Wẽnnaam la ninsaalbã, n kẽng n tɩ be tɩɩs a taab zug n miimdẽ?’ 10 Tɩ tɩɩsã yeel kankang yaa: ‘Wa rɩ naam tõnd zugu.’ 11 La kankangã leoka bãmba: ‘Mam na bas m biisã sẽn yaa noog la sõma wã n kẽng n tɩ be tɩɩs a taabã zug n miimdẽ?’ 12 Rẽ poore, tɩɩsã tɩ yeela viyn tɩɩgã yaa: ‘Wa rɩ naam tõnd zugu.’ 13 La viyn tɩɩgã leoka bãmba: ‘Mam na bas m divẽ-paalgã sẽn kɩtd tɩ Wẽnnaam ne ninsaalbã kɩdemdẽ wã, n kẽng n tɩ be tɩɩs a taabã zug n miimdẽ?’ 14 Sẽn na n baase, tɩɩs a taabã fãa yeela gõaag yaa: ‘Wa rɩ naam tõnd zugu.’+ 15 Tɩ gõaagã leok tɩɩsã yaa: ‘Yãmb sã n sɩd yãka* maam tɩ m na n lebg rĩm n dɩ naam yãmb zug bɩ y wa solg mam maasmẽ wã. Sã n pa rẽ, bɩ bugum yi gõaagẽ wã n dɩ Libã sɛɛdr tɩɩsã.’

16 “La masã, yãmb sẽn kɩt t’a Abimelɛk lebg rĩmã,+ y maana pʋ-peelem la sẽn segd sɩda? Yãmb maana a Zerubaal ne a zakã rãmb neer sɩda? Yãmb maana yẽ wa y sẽn da tog n maan-a wã sɩda? 17 Mam ba wã sẽn zab yãmb yĩngã,+ a gẽnega a yõor* n fãag yãmb Madiyã nebã nugẽ.+ 18 La rũndã, yãmb yikame n zab ne mam ba wã roogã rãmba, n kʋ a kom-dibli pis-yopoe wã kug-yɛng zugu.+ Rẽ poore, yãmb kɩtame t’a Abimelɛk sẽn yaa a yem-poak biigã+ lebg rĩm n na n dɩ naam Sikɛm nanambsã zugu, a sẽn yaa yãmb roagdã yĩnga. 19 Yãmb sã n maana pʋ-peelem la sẽn segd ne a Zerubaal la a zakã rãmb rũndã, bɩ y kɩdem sũ-noog a Abimelɛk yĩnga, tɩ yẽ me kɩdem sũ-noog yãmb yĩnga. 20 La sã n pa woto, bɩ bugum yi a Abimelɛk nengẽ n dɩ Sikɛm ne Bɛt-milo nanambsã,+ la bɩ bugum yi Sikɛm ne Bɛt-milo nanambsã nengẽ n dɩ a Abimelɛke.”+

21 Rẽ poore, a Zotam+ zoeeme n kẽng Bɛɛr n tɩ zĩnd be, a ba-biig a Abimelɛk yĩnga.

22 A Abimelɛk rɩɩ naam Israyɛll nebã zug yʋʋm a tãabo. 23 La Wẽnnaam basame tɩ beem zĩnd* a Abimelɛk ne Sikɛm nanambsã sʋka, la bãmb zãmba a Abimelɛke. 24 Yaa sẽn na yɩl n dok a Zerubaal kom-dibli pis-yopoe wã sũuri, wẽngã b sẽn maan-bã yĩnga, n kɩt t’a Abimelɛk ba-biisã zɩɩmã taal wa a zug a sẽn kʋ-bã yĩnga,+ la a wa Sikɛm nanambsã zugu, b sẽn sõng a Abimelɛk t’a kʋ a ba-biisã yĩnga. 25 Sikɛm nanambsã kɩtame tɩ rap tɩ solg tãensã zut n na n maan a Abimelɛk wẽnga. Bãmb da fãada ned ning fãa sẽn tũud sorã. La neb n wa n togs a Abimelɛk bũmb nins b sẽn maandã.

26 Dẽ, a Ebɛɛd biig a Gaal ne a ba-biisã waa Sikɛmme,+ la a paamame tɩ Sikɛm nanambsã kẽ yẽnda. 27 Bãmb yiime n kẽng weoogẽ wã n tɩ wob b viyn pʋtã biis n wẽke, la b maan tigri. Rẽ poore, bãmb kẽnga b wẽnnaamã roogẽ+ n tɩ rɩ la b yũ, la b kãab a Abimelɛk wẽnga. 28 A Ebɛɛd biig a Gaal sokame yaa: “A Abimelɛk la ãnda, t’a Sikɛm yaa ãnd tɩ tõnd na n sak yẽnda? Yẽ pa a Zerubaal biiga,+ t’a Zebull yaa a tʋm-tʋmd la? Sak-y-yã a Sikɛm ba a Amoor nebã! La bõe yĩng tɩ tõnd na n sak a Abimelɛke? 29 Mam sã n da soẽ nin-buiidã, m da na n sika a Abimelɛke.” Dẽ, yẽ yeela a Abimelɛk yaa: “Paas f tãb-biisã sõore, n wa tɩ d zabe.”

30 A Zebull sẽn yaa tẽngã naabã sẽn wʋm a Ebɛɛd biig a Gaal goamã, a sũur puugame. 31 A soosame* n tʋm koe-taasdb a Abimelɛk nengẽ tɩ b tɩ yeel-a yaa: “Ade! A Ebɛɛd biig a Gaal ne a ba-biisã bee Sikɛm n pirsd tẽngã neb n dat tɩ b zab ne foom. 32 Woto wã, bɩ foo ne f nebã yik ne yʋng n wa solg weoogẽ wã n gũudẽ. 33 La beoogã sã n vẽeg tɩ wĩntoogã puk bala, bɩ f yik pĩnd n zab ne tẽngã. La a Gaal ne a nebã sã n yi n na n zab ne foo, bɩ f maan f sẽn tõe fãa n tõog-a.”*

34 Dẽ, a Abimelɛk ne neb nins fãa sẽn da be ne-a wã yika ne yʋngo, n welg taab sul a naas n tɩ solg n gũud Sikɛm nebã n na n zab ne-ba. 35 A Ebɛɛd biig a Gaal sẽn yi n yals tẽngã rignoorẽ, a Abimelɛk ne a nebã yii b soondgã zĩigẽ. 36 A Gaal sẽn yã nin-buiidã, a yeela a Zebull yaa: “Gese! Neb n be tãensẽ wã n sigd n watẽ.” T’a Zebull leoke: “Yaa tãensã maasmã la fo sẽn ne n tẽed tɩ yaa nebã.”

37 Sẽn yɩ bilfu, a Gaal yeelame yaa: “Gese! Neb n yit tẽngã sʋk n sigd n watẽ. Sull a ye n yit Mewonenim-dãmbã tɩ-bedrã sor n watẽ.” 38 T’a Zebull leok-a: “Fo wuk-m-mengã bɛɛ? Fo ra pa soke: ‘A Abimelɛk la ãnd tɩ tõnd na n sak-a?’+ Pa neb nins fo sẽn zãgsã la woto sɩda? Masã, yi n zab ne-ba.”

39 A Gaal yiime n lʋɩ Sikɛm nanambsã taoor tɩ b na n zab ne a Abimelɛke. 40 A Abimelɛk riga a Gaal t’a zoe. La b kʋʋ neb wʋsg n tãag tẽngã rignoorẽ wã.

41 La a Abimelɛk kell n zĩnda Aruma, t’a Zebull+ rig a Gaal ne a ba-biisã n yiis Sikɛmme. 42 Vẽkembeoogã, nin-buiidã kẽnga weoogẽ wã, la neb n tɩ togs a Abimelɛke. 43 Dẽ, yẽ peega a nebã n welg-b sul a tãabo, n kɩt tɩ b solg weoogẽ wã n gũudẽ. Bãmb sẽn wa n yã nin-buiidã sẽn yit tẽngã pʋgẽ wã, b zaba ne bãmb n kʋ-ba. 44 A Abimelɛk ne neb nins sẽn da be ne-a wã yɩɩ tao-tao n tɩ gɩdg tẽngã rignoorẽ, tɩ sul a yiibã zab ne neb nins fãa sẽn da be weoogẽ wã, n kʋ-ba. 45 A Abimelɛk zaba ne tẽngã daar-n-kãng tõre, n tõog-a. A kʋʋ tẽngã nebã, n sarem tẽngã+ n yugl-a yamsem.

46 Sikɛm gasgã nanambsã fãa sẽn wʋm dẽ wã, b zoee tao-tao n tɩ kẽ bõn-naandg a Ɛll-berit roogã* zĩ-soalgdgẽ wã.*+ 47 B sẽn wa n togs a Abimelɛk tɩ Sikɛm gasgã nanambsã fãa tigma taabã bala, 48 a Abimelɛk ne neb nins fãa sẽn be ne-a wã kẽngame n tɩ rʋ Zalmon tãngã zugu. A Abimelɛk rɩka lar n kɛɛg tɩɩg will n palg a bãoko, la a yeel nin-buiidã sẽn be ne-a wã yaa: “Yãmb sẽn yã tɩ mam maan bũmb ningã, yãmb me maan dẽ tao-tao!” 49 Woto, nin-buiidã fãa kɛɛ tɩɩs wil n pʋgl a Abimelɛke. Bãmb tɩ rʋʋga wilã n dell zĩ-soalgdgã, n ning-a bugum. Dẽ, Sikɛm gasgã nebã fãa me kiime. Yɩɩ na maan rap la pagb tusri.

50 Rẽ poore, a Abimelɛk kẽnga Tebɛɛz n tɩ tilg sik n zab n deeg tẽngã. 51 Gasg sẽn tar pãng n da be tẽngã sʋka, tɩ tẽngã rapã, a pagbã la a nanambsã fãa zoe n kẽ be. Bãmb paga gasgã n dʋ a zugu. 52 A Abimelɛk kẽnga gasgẽ wã n tɩ zab ne a nebã. A kolga gasgã noor n na n ning-a bugum. 53 Rẽ la pag a yembr dɩk neer kugr n lobg a Abimelɛk zugã n wãage.+ 54 Tao-tao bala, a boola a tʋm-tʋmdã sẽn da zãad a zab-teedã n yeel-a yaa: “Wõog f sʋʋgã n kʋ-ma, tɩ b ra wa gom mam yell n yeel tɩ yaa pag n kʋ maam ye.” Dẽ, a tʋm-tʋmdã kõs-a lame t’a ki.

55 Israyɛll nebã sẽn yã t’a Abimelɛk kiime wã, b fãa zoeeme n kuili. 56 Woto, Wẽnnaam dola a Abimelɛk wẽng ning a sẽn maan a ba wã yĩnga. Yẽ ra kʋʋ a ba-biis pis-yopoe.+ 57 Wẽnnaam kɩtame me tɩ wẽng ning Sikɛm nebã sẽn da maanã wa bãmb zugu. Woto, a Zerubaal biig+ a Zotam kãab-wẽngã+ pidsa bãmb zugu.