Bʋ-kaoodbã sebre
14 A Sãmsõ kẽnga Timna, la a tɩ yãa bi-pugl Filisti nebã kom-pugli wã sʋka. 2 A Sãmsõ sẽn lebg n kuili, a tɩ yeela a ba wã ne a ma wã yaa: “Timna soolmẽ wã, mam yamã kẽe Filisti bi-pugla, la mam datame tɩ y tɩ kos-a n kõ-m tɩ m maan m paga.” 3 La a ba wã ne a ma wã leok-a lame yaa: “Rẽ yĩnga fo pa tõe n paam pag fo roagdbã ne tõnd nebã fãa sʋka?+ Yaa tɩlɛ tɩ fo kẽng Filisti nebã sẽn pa kẽ bãongã sʋk n tɩ bao pag sɩda?” La a Sãmsõ yeela a ba wã yaa: “Kos-y-yã-a n kõ maam. Bala yaa yẽ n ta mam daabo.”* 4 A ba wã ne a ma wã ra pa mi tɩ yaa a Zeova n da rat t’a maan woto ye. Bala a* da baooda weer n na n zab ne Filisti nebã, b sẽn da rɩt naam Israyɛll nebã zug wakat kãngã yĩnga.+
5 A Sãmsõ tũu a ba wã ne a ma wã n kẽng Timna. A sẽn wa n ta Timna viyn pʋtẽ wã, gɩgemd n yi n kelemd n segd-a. 6 A Zeova vʋʋsmã kõ-a-la pãng+ t’a gãd gɩgemdã n tak n yang zĩis a yiibu, wa ned sẽn na n gãd bʋ-poll ne a nug n yang-a zĩis a yiibu. La a pa togs a ba wã bɩ a ma wã bũmb ning a sẽn maanã ye. 7 Rẽ poore, a Sãmsõ kẽngame n tɩ sõs ne pʋg-sadã, la a ra ket n taa a raabo.+
8 Kaoosg zugẽ, a sẽn wa n lebd Timna n na n tɩ peeg a pagã,+ a bʋdgame n na n ges gɩgemdã sẽn da ki wã, n mik tɩ sĩ-loll ne sɩɩd n be gɩgem-kɩɩngã pʋgẽ. 9 Dẽ, a vaaga sɩɩdã ne a nusi, n dɩtẽ la a kẽnda. A sẽn ta a ba wã ne a ma wã nengẽ wã, a yãkame n kõ-b tɩ b rɩ, la a pa togs-b tɩ yaa gɩgem-kɩɩngã pʋgẽ la a vaag sɩɩdã ye.
10 A Sãmsõ ba wã kẽnga Filisti bi-puglã nengẽ, la a Sãmsõ maana tigr beenẽ. Bala yaa woto la kom-bɩɩsã ra wae n maandẽ. 11 Filisti nebã sẽn yã a Sãmsõ wã, b baoo kom-bɩɩs pis-tã tɩ b na n yãag-a. 12 Woto, a Sãmsõ yeel-b lame yaa: “Mam na n wẽe yãmb yel-bũndi. Tigrã rasem a yopoe wã pʋgẽ tɩ yãmb sã n tõog n bilg maam yel-bũndã võore, mam na n kõo yãmb lẽ* gĩs fut pis-tã, la fu-neeb a taab bãmb pis-tã. 13 La yãmb sã n pa tõog n bilg maam a võorã, yãmb n na n kõ maam lẽ gĩs fut pis-tã, la fu-neeb a taab pis-tã.” Tɩ b leoke: “Togs tõnd f yel-bũndã tɩ d kelge.” 14 Rẽ la a yeel-b yaa:
“Rɩɩb yii rɩt pʋgẽ.
La bõn-noog n yi pãng soab pʋgẽ.”+
Maana rasem a tãab tɩ b pa tõe n bilg yel-bũndã võor ye. 15 Rasem a naas-n-soabã daare, b yeela a Sãmsõ pagã yaa: “Belg f sɩdã+ t’a togs tõnd yel-bũndã võore. Sã n pa rẽ, tõnd na n yõoga foo ne f ba wã zak rãmb bugum. Yãmb boola tõnd ka n na n fã d paoongã la?” 16 La a Sãmsõ pagã ra yãbda ne-a n yetẽ: “Fo tog n kisa maam. Fo pa nong maam ye.+ Fo togsa mam nebã yel-bũnd n pa togs maam a võorã ye.” Rẽ la a Sãmsõ leok-a yaa: “Kelge, mam pa togs m ba wã ne m ma wã meng yel-bũndã võor ye. Bõe yĩng tɩ m na n togs foom?” 17 A talla yãbr ne a Sãmsõ tigrã rasem nins sẽn kellã. Rasem a yopoe-n-soabã daare, a Sãmsõ kong n togs-a-la yel-bũndã võore, a sẽn pẽdg-a wʋsgã yĩnga. Woto, pagã togsa a nebã yel-bũndã võore.+ 18 Dẽ, rasem a yopoe-n-soabã daare, sẽn deng wĩndgã lʋɩɩse,* tẽngã rapã yeela a Sãmsõ yaa:
“Bõe n yaa noog n yɩɩd sɩɩdo,
la bõe n tar pãng n yɩɩd gɩgemde?”+
Yẽ leoka bãmb yaa:
“Yãmb sã n da pa ko ne mam nag-yãan-pollã,+
y ra pa na n bãng m yel-bũndã võor ye.”
19 Rẽ poore, a Zeova vʋʋsmã kõ-a-la pãnga,+ t’a kẽng Askelon+ n tɩ kʋ rap pis-tã, n yees b futã, la a rɩk fu-neebã n kõ neb nins sẽn bilg yel-bũndã võorã.+ A lebg n kuila a ba wã zakẽ ne sũ-puugri.
20 La b rɩka a Sãmsõ pagã+ n kõ kom-bɩɩs nins sẽn da yãag-b yẽnda wã nin-yende.+