Zeremi sebre
17 “B gʋlsa Zida nebã yel-wẽndã ne kut gʋlsdga.
B talla diyama sẽn yaa sɩleng n gʋls-a b sũyẽ wã wa b sẽn gʋlsd kug-walg zug to-to wã,
la b gʋls-a b tẽn-kugã yɩɩl zutu,
2 tɩ b kom-dibli wã tẽegd b tẽn-kugã ne b ra-lugsã b sẽn lugl n pʋʋsdẽ* wã+
sẽn be tɩ-bɛd sẽn tar vãad wʋsgã seesã, kunkub nins sẽn zãntã zutu,+
3 la tãensã sẽn be weoogẽ wã zutã.
Mam na n kɩtame tɩ b zɛ yãmb paoongã ne y bõn-sõmã wã fãa.+
Mam na n kɩtame tɩ b zɛ yãmb zĩ-zãntsã* teedo, yel-wẽndã sẽn piuug yãmb soolmã pʋgẽ wã yĩnga.+
4 Yãmb mensã na n wa kong n dɩka y rogem-pʋɩɩrã mam sẽn kõ yãmbã n kõ.+
Mam na n kɩtame tɩ y tʋm n kõ y bɛɛbã, soolem yãmb sẽn pa mi pʋgẽ.+
A na n dɩɩ wakat fãa yĩnga.”
5 Ad a Zeova sẽn yeele:
6 A na n lebga wa tɩɩg sẽn yaa a yembr n be we-rasempʋɩɩgẽ.
A pa na n yã sẽn yaa sõma wã waoong wakat ye.
A na n zĩnda zĩ-koeems sẽn be we-raoogẽ wã,
tẽng sẽn yaa yamsem tɩ ned baa a ye pa tõe n vɩɩmd be ye.
8 A na n lebga wa tɩɩg b sẽn sel koom noore,
t’a tãood a yẽgã tɩ tat kʋɩlgã.
Tʋʋlgã wakat sã n ta, a pa na n bãng ye.
A vãadã na n tobda wakat fãa.+
Warã yʋʋmd me, a pa na n maan yɩɩre,
wall a bas n pa le womd ye.
9 Sũur yaa zãmb soab* n yɩɩd bũmb fãa. A yaa wẽng wʋsgo.*+
Ãnda n tõe n bãng-a?
10 Maam a Zeova feesda sũuri,+
n vaeesd tagsa nins sẽn zulmã,*
sẽn na yɩl n keo ned kam fãa wa sẽn zems a manesem,
wa sẽn zems a tʋʋmã biisi.+
11 Ned ning sẽn maand zãmb n paamd paoong
yaa wa koadeng sẽn tigsd gɛl a sẽn pa lobe.+
A paoongã na n loog n bas-a-la a vɩɩmã sẽn wat n be a pʋɩ-sʋka.
Na n wa lebga vẽeneg t’a yaa yalma.”
12 Tõnd wẽnd-doogã
yaa geer sẽn tar ziir b sẽn zẽk hal sɩngrẽ wã.+
13 Zeova sẽn yaa Israyɛll saagre,
neb nins fãa sẽn basd yãmbã na n paama yãnde.
14 Zeova, sãoog-y maam tɩ rẽ la m na n paam laafɩ.
Fãag-y maam tɩ rẽ la m na n sɩd paam fãagre,+
bala yaa yãmb la mam pẽgda.
15 Ade! Neb n sokd maam yaa:
“A Zeova sẽn da yeel bũmb ningã bɛɛ?+
Bɩ a pids wɛ!”
16 La sã n yaa ne maam, mam pa zãgs tɩ m pa na n le yɩ pe-kɩɩm n tũ yãmba,
wall m tʋlg yel-pakrã daar ye.
Yãmb mii mam noorã sẽn gom bũmb nins yellã fãa sõma.
Fãa yɩɩ yãmb nifẽ!
17 Ra kɩt-y tɩ rabeem yõk maam ye.
Yãmb yaa mam soondg zĩig yel-beed wakate.
18 Bɩ sẽn namsd-b maamã paam yãnde,+
la y ra bas tɩ b ning-m yãnd ye.
Bɩ rabeem yõk-ba,
la y ra bas tɩ b kẽes-m rabeem ye.
19 Ad a Zeova sẽn yeel maam: “Kẽng n tɩ yals nin-buiidã kom-dibli wã rignoorẽ, rignoor ning Zida rĩm-dãmbã sẽn tũud n kẽedẽ la b yitã, la f kẽng n tɩ yals Zerizalɛm rignoyẽ wã fãa.+ 20 Fo segd n yeel-b lame yaa: ‘Yãmb a Zida rĩm-dãmba, la Zida ne Zerizalɛm nebã fãa sẽn tũud rigno-kãensã n kẽedẽ wã, kelg-y-yã a Zeova goamã. 21 Ad a Zeova sẽn yeele: “Gũus-y y mense,* n da zɩ zɩɩb baa a yembr Vʋʋsg daarã, wall y tall zɩɩb n tũ rignoyã n kẽ Zerizalɛm ye.+ 22 Yãmb pa segd n tall zɩɩb n yi y zagsẽ wã Vʋʋsg daar ye. Yãmb pa segd n tʋm tʋʋmd baa a ye ye.+ Kɩt-y tɩ Vʋʋsg daarã yɩ sõngo, wa mam sẽn da yeel yãmb yaab-rãmbã.+ 23 La b pa kelg ye. B pa kɩll b tʋb n kelg maam ye. B riglma b sũyã n zãgs* tɩ b kõn sak maam, wall b sak kiblg ye.”’+
24 “‘A Zeova yeelame yaa: “Yãmb sã n sak maam ne y sũyã fãa, n pa tall zɩɩb n tũ rignoyã n kẽ tẽngã pʋgẽ Vʋʋsg daare, la y kɩt tɩ Vʋʋsg daarã yɩ sõng n pa tʋm tʋʋmd baa a ye daar-n-kãnga,+ 25 dẽ, rĩm-dãmb la nanambs sẽn zao a Davɩɩd geerã+ na n tũuda rignoyã n kẽed tẽngã pʋgẽ, n zao saar-dãmb* la wed-moose. Na n yɩɩ bãmb ne b nanambsã la Zida ne Zerizalɛm nebã.+ Sẽn paase, neb na n kell n zĩnda tẽn-kãngã pʋgẽ wakat fãa yĩnga. 26 Neb n na n yit Zida tẽnsẽ wã, zĩis nins sẽn gũbg Zerizalɛmmã, Bẽnzame soolmẽ wã,+ tẽn-nabrẽ wã,+ soolmã zĩig ning sẽn yaa tãensã la Negɛɛb* soolmẽ wã, n talld maand sẽn yõogd bugum,+ maando,+ kood biis kũuni,+ wisd sẽn yaa pɛɛlga, la bark pʋʋsg maand n wat a Zeova roogẽ wã.+
27 “‘“La yãmb sã n pa sak maam, n pa kɩt tɩ Vʋʋsg daarã yɩ sõngo, la y tar zɩɩb n tũud rignoyã n kẽed Zerizalɛm Vʋʋsg daarã, mam na n ninga rignoyã bugum. La sãmbg sẽn kae, bugmã na n dɩɩ Zerizalɛm gasd nins sẽn tar pãngã,+ la b pa na n kiis-a ye.”’”+