Tõod sebre
9 “Israyɛll neba, kelg-y-yã. Rũndã, yãmb rʋʋgda Zʋrdẽ kʋɩlgã+ n na n tɩ rig buud toɛy-toɛy sẽn yaa kãsems la sẽn tar pãng n yɩɩd yãmba,+ n deeg b soolmã. Soolmã tẽns gũbga ne lals sẽn zẽk n kuil saasẽ,+ 2 t’a nin-buiidã yaa bɛd la wogdo. Bãmb yaa Anak neba.+ Yãmb miime la y wʋm tɩ b gomd b yell n yetẽ yaa: ‘Ãnd n tõe n zab ne Anak nebã n tõoge?’ 3 Woto yĩnga, yãmb segd n bãnga rũndã t’a Zeova na n lʋɩɩ yãmb taoor tɩ y rʋʋg kʋɩlgã.+ Yẽ yaa wa bugum sẽn dɩte,+ la a na n sãama bu-kãens fãa. A na n tõog-b-la yãmb nifẽ, sẽn na yɩl tɩ y rig-b tao-tao la y sãam-ba, wa a Zeova sẽn pʋlem yãmbã.+
4 “Yãmb Wẽnnaam a Zeova sã n wa rig-b yãmb taoore, bɩ y ra yeel y sũurẽ yaa: ‘Yaa tõnd mensã tɩrlem yĩng la a Zeova sẽn tall tõnd n wa kẽes soolmã pʋgẽ tɩ d soogã’ ye.+ Yaa bu-kãensã nebã wẽnemã yĩng+ la a Zeova sẽn digd-b yãmb taoorã. 5 Pa yãmb tɩrlem wall y pʋ-peelem yĩng la yãmb sẽn na n kẽ b soolmã pʋgẽ n soog-a wã ye. Yaa bu-kãensã nebã wẽnemã yĩng n kɩt tɩ yãmb Wẽnnaam a Zeova rigd-b yãmb taoore.+ Yaa sẽn na yɩl me n pids gomd ning a Zeova sẽn da yeel a Abrahaam,+ a Izaak+ ne a Zakoob+ sẽn yaa yãmb yaab-rãmbã. 6 Bãng-y tɩ pa yãmb tɩrlem yĩng la yãmb Wẽnnaam a Zeova sẽn kõt yãmb tẽn-noogã tɩ y soogã ye. Bala yãmb yaa nin-buiid sẽn yaa tõatba.+
7 “Tẽeg-y la y ra tol n yĩm yãmb sẽn da maand to-to tɩ yãmb Wẽnnaam a Zeova sũurã yikd we-raoogẽ wã ye.+ Daar ning yãmb sẽn yi Ezɩpt soolmẽ wã tɛk n tãag zĩ-kãngã, yãmb kɩɩsa a Zeova.+ 8 Baa Horɛɛbe, yãmb kɩtame t’a Zeova sũurã puugi. A Zeova sũur puuga ne yãmb hal t’a ra rat n sãam yãmba.+ 9 Mam sẽn wa n dʋ tãngã n na n deeg kug-walsã+ sẽn yaa kaool ning a Zeova sẽn maan ne yãmbã walsã,+ mam paa tãngã zug rasem pis-naas wĩndg la yʋngo,+ n pa tol n dɩ rɩɩb bɩ n yũ koom ye. 10 A Zeova kõo maam kug-wals a yiibã yẽ mengã nug-bilã sẽn gʋlsã. Kug-walsã zutu, yaa a Zeova mengã goam n da be be. Yaa goam nins fãa a sẽn gom ne yãmb bugum pʋgẽ, tãngã zugu, daar ning y sẽn da tigim taabã.+ 11 Rasem pis-naasã wĩndg la yʋngã poore, a Zeova kõo maam kug-wals a yiibã sẽn yaa kaoolã walsã. 12 Sẽn paase, a Zeova yeela maam yaa: ‘Yik n sig tao-tao, bala fo nebã fo sẽn yiis Ezɩpt soolmẽ wã sãama b mense.+ Bãmb bʋdgame n bas sor ning mam sẽn yeel bãmb tɩ b tũ wã tao-tao. B rõoga bõn-naandg b mens yĩnga.’+ 13 Rẽ poore, a Zeova yeela maam yaa: ‘Mam yãa nin-kãensã, b yaa nin-buiid sẽn yaa tõatba.+ 14 Bas tɩ m sãam-ba, n kɩt tɩ b yʋʋrã menem saasã tẽngre, la m kɩt tɩ fo lebg buud sẽn tar pãnga, t’a nebã sõor me yɩɩg-ba.’+
15 “Dẽ, mam yii tãngã zug n sigi, tɩ tãngã ra ket n wit bugum.+ M da zãada kaoolã wals a yiibã m nusẽ.+ 16 Mam gesame n mik tɩ yãmb beega yãmb Wẽnnaam a Zeova! Yãmb da rõoga nag-bil y mens yĩnga. Yãmb bʋdgame n bas sor ning a Zeova sẽn yeel yãmb tɩ y tũ wã tao-tao.+ 17 Rẽ n so tɩ mam dɩk wals a yiibã n lob tẽnga, tɩ b wã yãmb nifẽ.+ 18 Rẽ poore, mam wõgemda a Zeova taoor wa pipi wã, rasem pis-naas wĩndg la yʋngo. Mam pa tol n dɩ rɩɩb bɩ n yũ koom,+ yel-wẽn nins fãa yãmb sẽn maane, n maan bũmb sẽn yaa wẽng wʋsg a Zeova nifẽ, n beeg-a wã yĩnga. 19 Bala rabeem yõka maam, a Zeova sũur sẽn puug wʋsg ne yãmba,+ t’a ra rat n sãam yãmbã yĩnga. La a Zeova kelga maam wakat kãng me.+
20 “A Zeova sũurã puuga ne a Aarõ wʋsgo, hal t’a ra rat n kʋ-a.+ La mam yõka a sɛɛg a Aarõ yĩng me wakat kãnga. 21 Dẽ, mam dɩka nag-bilã+ sẽn yaa bõn-wẽng y sẽn maanã n yõog bugum. M wã-a lame la m wer-a hal t’a lebg bãaneg wa tom, n wʋk tomã n fãeeg kʋɩlgã koom sẽn zoet n yit tãngẽ wã pʋgẽ.+
22 “Sẽn paase, yãmb leb n kɩtame t’a Zeova sũurã puug Tabeera,+ Masa+ la Kibrot-hataava.+ 23 A Zeova sẽn wa n yiis yãmb Kadɛɛs-barneya+ wã, a yeela yãmb yaa: ‘Kẽng-y n tɩ reeg-y soolem ning mam sẽn na n kõ yãmbã n sooge!’ La yãmb le kɩɩsa yãmb Wẽnnaam a Zeova noorã,+ n pa tall tẽebo,+ la y pa sak-a me ye. 24 Mam sẽn bãng yãmbã tɛka, yãmb tara a Zeova kɩɩsgo.
25 “Dẽ, mam kell n wõgemda a Zeova taoor rasem pis-naas wĩndg ne yʋngo.+ Mam wõgemda woto, bala a Zeova ra yeelame t’a na n sãama yãmba. 26 Mam yõka a Zeova sɛɛg n yeele: ‘Zu-soab sẽn ka to a Zeova, bɩ y ra sãam y nin-buiidã ye. Yaa nin-buiid yãmb mengã sẽn so,*+ neb y sẽn fãag ne y pãngã, n yiis-b Ezɩpt soolmẽ wã ne nug sẽn tar pãnga.+ 27 Tẽeg-y y tʋm-tʋmdb a Abrahaam, a Izaak ne a Zakoob+ yelle. Ra ges-y nin-kãensã sũyã sẽn diglmã, b wẽnemã la b yel-wẽndã ye.+ 28 Sã n pa rẽ, soolem ning pʋgẽ yãmb sẽn yiis tõndã neb na n yeelame yaa: “A Zeova pa tõog n tall-b n tɩ kẽes soolem ning pʋgẽ a sẽn pʋlem t’a na n kõ-b lame wã ye. La a sẽn kis-bã yĩnga, a yiis-b-la Ezɩpt soolmẽ wã n na n tɩ kʋ-b we-raoogẽ wã.”+ 29 Bala bãmb yaa nin-buiid yãmb mengã sẽn so,*+ neb y sẽn yiis Ezɩpt ne y pãn-kãsengã, la ne y kang sẽn tar pãngã.’+