Tõod sebre
18 “B pa na n kõ maan-kʋʋdbã sẽn yaa Levi buudã nebã, n paas Levi buudã neb fãa pʋɩɩr Israyɛll nebã sʋk ye. Yaa maandã b sẽn maand ne bugum n kõt a Zeova wã, sẽn yaa Wẽnnaam pʋɩɩrã n na n yɩ bãmb dɩɩbo.+ 2 Dẽnd b pa segd n paam pʋɩɩr b ba-biisã sʋk ye. Yaa a Zeova la b pʋɩɩre, wa a sẽn da togs-bã.
3 “Ad bũmb nins maan-kʋʋdbã sẽn tar sor n tõe n deeg nin-buiidã nengẽ: Ned ning fãa sẽn maan maoongo, tɩ yaa loalg wall pesgo, a segd n yãka bãokã, yeerã, la pʋʋrã n kõ maan-kʋʋdã. 4 Y segd n kõ-a-la y koodã dẽenem biisã, y divẽ-paalgã, y kaamã, la y rũm-bõoneg nins yãmb sẽn wõrs pipi wã kõbdo.+ 5 Yãmb Wẽnnaam a Zeova yãka yẽ ne a kom-dibli wã yãmb buud toor-toorã fãa sʋka, tɩ b na n tʋmd a Zeova yʋʋr yĩng wakat fãa.+
6 “La Levi buudã ned sã n yi n bas Israyɛll tẽng ning pʋgẽ a sẽn da be wã,+ n dat n kẽng zĩig ning a Zeova sẽn na n yãkã,*+ 7 a tõe n tɩ tʋma a Wẽnnaam a Zeova yʋʋr yĩng be, wa a saam-biis a taabã sẽn yaa Levi buudã nebã sẽn yas a Zeova taoor be wã.+ 8 A na n paama rɩɩb sẽn zem nin-kãens rẽndã,+ n paas a sẽn koos a yaab-rãmbã paoongã n paam bũmb ningã.
9 “Yãmb sã n wa kẽ soolem ning yãmb Wẽnnaam a Zeova sẽn na n kõ yãmbã pʋgẽ, yãmb pa segd n dɩk bu-kãens nebã togs-n-taar n tʋmd tʋʋm-wẽns ye.+ 10 Yãmb sʋkã, b pa segd n yã ned sẽn dɩk a bi-ribl wall a bi-pugl n yõog bugmẽ,*+ ned sẽn bʋgd bagre,+ ned sẽn maand tɩto,+ ned sẽn baood n na n bãng beoog yɛla,+ 11 ned sẽn rabsd a taaba, ned sẽn gomd ne zĩn-dãmba,+ ned sẽn togsd beoog yɛla,+ la ned sẽn gomd ne kɩɩms ye.+ 12 Bala a Zeova kisa ned ning fãa sẽn maand bõn-kãensã. Yaa bõn-kãensã sẽn yaa wẽnsã poorẽ la yãmb Wẽnnaam a Zeova sẽn na n dig bu-kãensã yãmb taoorã. 13 Yãmb segd n yɩɩ neb sẽn pa tar taal yãmb Wẽnnaam a Zeova taoore.+
14 “Bala bu-kãensã yãmb sẽn na n digã ra kelgda neb nins sẽn maand tɩtã,+ la sẽn bʋgd-b bagrã.+ La yãmb Wẽnnaam a Zeova pa kõ yãmb sor tɩ y maan bũmb sẽn wõnd dẽ ye. 15 Yãmb Wẽnnaam a Zeova na n yãka no-rɛɛs yãmb saam-biisã sʋk sẽn yaa wa maam n kõ yãmba. Yãmb segd n kelg-a lame.+ 16 Woto yaa yãmb sẽn kos yãmb Wẽnnaam a Zeova bũmb ning Horɛɛbã, daar ning yãmb sẽn tigim taabã.+ Yãmb da yeelame yaa: ‘Ra bas-y tɩ d wʋm tõnd Wẽnnaam a Zeova koɛɛgã, bɩ n yã bug-kãsengã yɛsa, n wa ki ye.’+ 17 La a Zeova yeela maam yaa: ‘B sẽn yeel bũmb ningã yaa sõma. 18 Mam na n yãka no-rɛɛs sẽn yaa wa foo+ b saam-biisã sʋk n kõ-ba. Mam na n ninga m goamã a noorẽ,+ la a na n togsa bãmb bũmb nins fãa mam sẽn yeel-a wã.+ 19 Sɩd-sɩda, ned ning sẽn pa kelg goam nins a sẽn na n togs mam yʋʋr yĩngã, m na n soka a soaba.+
20 “‘No-rɛɛs sã n wuk a meng n togs goam mam yʋʋr yĩnga, goam mam sẽn pa yeel-a, wall a gom wẽnnaam-dãmb a taab yʋʋr yĩnga, no-rɛɛs-kãng segda ne kũum.+ 21 La yãmb tõe n wa sokda y mens yaa: “D maanda wãn n bãng t’a Zeova pa togs gom-kãngã?” 22 No-rɛɛsã sã n gom a Zeova yʋʋr yĩng tɩ gomdã pa pidsi, bɩ pa yɩ wa a sẽn yeelã, dẽnd a Zeova pa togs gom-kãng ye. No-rɛɛsã wuka a meng n togs gomdã. Yãmb pa segd n zoe-a ye.’