Ezekɩyɛll sebre
19 “Fo segd n yɩɩla sũ-sãang yɩɩll* Israyɛll nanambsã wɛɛngẽ, 2 n yeele:
‘Fo ma wã ra yaa wãn-wãna? A ra yaa wa gɩgem-yãang sẽn be gɩgma sʋka.
A gãanda gɩgem-poal sẽn tar pãng sʋka, n wub a kambã.
3 A wuba a biig a yembr t’a lebg gɩgem-poll sẽn tar pãnga.+
A biigã zãmsa a sẽn tõe n ta rũng a sẽn yõk n tõs to-to.
A pʋd n wãba ninsaalb menga.
4 Buud toɛy-toɛy n wʋm a kibare. B yõk-a-la b bokẽ wã.
B ninga a yõorã bãens n tall-a n kẽng Ezɩpt soolmẽ wã.+
5 A ma wã gũume, n wa mik t’a pa na n lebg n wa ye.
Rẽ n so t’a yãk a biig a to, n maan t’a lebg gɩgem-poll sẽn tar pãnga.
6 Yẽ me kẽna gɩgma wã sʋka, n lebg gɩgem-poll sẽn tar pãnga.
A zãmsa a sẽn tõe n ta rũng a sẽn yõk n tõs to-to, la a pʋd n wãb ninsaalb menga.+
7 A gilga ninsaalbã gasd nins sẽn tar pãngã sʋka, n sãam b tẽnsã,
hal tɩ soolmã sẽn yaa raboogã pid ne a yãbrã rãamde.+
8 Soolem nins sẽn karg n gũbg-a wã buud toɛy-toɛy n wa n lob b gãmbrã a zugu.
B yõk-a-la b bokẽ wã.
9 B ninga a yõorã bãense, n sagl-a bũmb sẽn maan ne bãens pʋgẽ n tall-a n kẽng Babilon rĩmã nengẽ.
B pag-a-la be sẽn na yɩl tɩ b ra le wʋm a koɛɛgã Israyɛll tãensẽ wã ye.
10 Fo ma wã ra yaa wa viyn tɩɩg+ fo zɩɩmã pʋgẽ,* viyn tɩɩg b sẽn sel koom noore.
A ra womda biis la a tar wil wʋsgo, koomã sẽn yaa wʋsgã yĩnga.
11 A tãoo wil* sẽn tar pãnga, b sẽn tõe n tall n maan nanambs rasaba.
A bɩɩme n lug n yɩɩd tɩɩs a taabã.
Nebã ra ne-a-la zĩig zãng a woglmã la a vãadã sẽn yaa wʋsgã yĩnga.
12 La b võog-a-la ne sũ-puugr+ n lob tẽnga,
tɩ yaang sobg kʋɩɩs a biisã.
B kaoo a wilã sẽn tar pãngã tɩ b kʋɩ,+ tɩ bugum dɩ-ba.+
13 Masã, b tɩ sel-a-la rasempʋɩɩgẽ wã,
zĩ-koɛɛng sẽn pa tar koom pʋgẽ.+
14 Bugmã rɩɩ a wilã* n sãag n dɩ a tobendã ne a biisã.
Will sẽn tar pãng baa a ye pa kell ye. Naam dasaar pa kell ye.+
“‘Woto yaa sũ-sãang yɩɩlle. A na n kell n yɩɩ sũ-sãang yɩɩlle.’”