Ezekɩyɛll sebre

10 Mam sẽn wa n getẽ wã, mam yãame tɩ bũmb sẽn wõnd sa-gãongã sẽn be seribẽ-rãmbã zugẽ wã zugẽ, bũmb sẽn wõnd safɩɩr kugr n da pukdi, t’a yalẽ wã wõnd geere.+ 2 Wẽnnaam yeela rao ning sẽn yer lẽ gĩs fuugã+ yaa: “Kẽng ruzãnt-rãmbã+ sʋka, seribẽ-rãmbã tẽngre, n yãk bug-saalã+ sẽn be seribẽ-rãmbã sʋkã n pids f nus a yiibã, n lob tẽngã pʋgẽ.”+ Dẽ, a kẽngame tɩ mam getẽ.

3 Raoã sẽn wa n dabdã tɩ seribẽ-rãmbã bee roogã rɩtgo, tɩ sawadgã pid saman-bilã. 4 A Zeova ziirã+ zẽkame n bas seribẽ-rãmbã, n kẽng roogã rigno-koakẽ wã, tɩ sawadgã pit roogã bilf-bilfu.+ Samandã ra pida ne a Zeova ziirã vẽenem. 5 Seribẽ-rãmbã pɩgsã rãamd ra yit n tata saman-kãsengẽ wã. Ra yaa wa Wẽnnaam Sẽn-tõe-a-fãa wã goam rãamde.+

6 Rẽ poore, a yeela rao ning sẽn yer lẽ gĩs fuugã yaa: “Yãk bugum ruzãnt-rãmbã sʋka, rat n yeel tɩ seribẽ-rãmbã sʋka.” Dẽ, raoã kẽeme n yaas ruzãnt a ye sɛɛga. 7 Seribẽ a yembr tẽega a nugã n tees bugmã sẽn be seribẽ-rãmbã sʋkã.+ A yãka bugmã n ning rao ning sẽn yer lẽ gĩs fuugã+ nus a yiibẽ wã, t’a reeg n yi. 8 Seribẽ-rãmbã ra tara bũmb sẽn wõnd ninsaal nus b pɩgsã tẽngre.+

9 Mam sẽn wa n getẽ wã, mam yãa ruzãnt-rãmb a naas sẽn be seribẽ-rãmbã sɛɛgẽ. Ruzãnt n da be seribẽ fãa sɛɛgẽ. Ruzãnt-rãmbã ra wõnda kirzolit kugr sẽn pɩnda.+ 10 Sã n yaa ne ruzãnt-rãmbã yalẽ wã, b naasã fãa ra wõnda taaba. Ra yaa wa ruzãnt sẽn sag a to pʋgẽ. 11 B sã n wa kẽnda, b tõe n teesa kɩrems a naasã fãa n pa wẽnemd ye. Bala b ra kẽngda zĩig ning fãa zugã sẽn teesã n pa wẽnemd ye. 12 B yĩnsã tõre, b poayã, b nusã, b pɩgsã, n paas ruzãnt-rãmbã, rat n yeel tɩ b naasã fãa ruzãnt-rãmb ra pida ne nini.+ 13 Ruzãnt-rãmbã wɛɛngẽ, mam wʋma koɛɛg sẽn bool-b yaa: “Ruzãnt-rãmba!”

14 B fãa* ra tara nens a naas-naase. Pipi nengã ra yaa seribẽ nenga. Yiib-n-soab nengã ra yaa ninsaal nenga. Tãab-n-soabã ra yaa gɩgemd nenga, tɩ naas-n-soabã yaa sɩlg nenga.+

15 Ra yaa bõn-vɩɩs nins* mam sẽn yã Kebaar kʋɩlgã noorã.+ Seribẽ-rãmbã ra zẽkdame. 16 Seribẽ-rãmbã sã n wa kẽnda, ruzãnt-rãmbã me tũud-b lame n kẽnda. Seribẽ-rãmbã sã n wa zẽk b pɩgsã sẽn na yɩl n dʋ yĩngr wʋsgo, ruzãnt-rãmbã pa wẽnemdede, wall b zãag ne-b ye.+ 17 Seribẽ-rãmbã sã n wa yaase, bãmb me yaasdame. B sã n wa zẽk yĩngri, ruzãnt-rãmbã me naagd-b lame n zẽke, bala vʋʋsem ning sẽn wilgd bõn-vɩɩsã sorã* ra bee ruzãnt-rãmbã pʋsẽ me.

18 Rẽ poore, a Zeova ziirã+ yii roogã rigno-koakã zugẽ wã, n tɩ yaas seribẽ-rãmbã zugẽ.+ 19 Dẽ, seribẽ-rãmbã zẽka b pɩgsã n dʋ yĩngr tɩ mam getẽ. Ruzãnt-rãmbã me naag-b lame n looge. B tɩ yaasa a Zeova roogã yaang rignoorẽ wã, tɩ Israyɛll Wẽnnaamã ziirã be b zugẽ.+

20 Ra yaa bõn-vɩɩs nins* mam sẽn yã Kebaar kʋɩlgã noor+ tɩ b be Israyɛll Wẽnnaamã tẽngrã. Woto, mam bãngame tɩ ra yaa seribẽ-rãmba. 21 Bãmb b naasã fãa ra tara nens a naas-naas la pɩgs a naas-naase, tɩ bũmb sẽn wõnd ninsaal nus ra be b pɩgsã tẽngre.+ 22 B nensã ra wõnda nens nins mam sẽn yã Kebaar kʋɩlgã noorã.+ B fãa ra teesda tɩrg n kẽnda.+