Ezekɩyɛll sebre

14 Israyɛll kãsem-dãmb kẽer wa n zĩnda mam taoore.+ 2 Dẽ, a Zeova goma ne maam n yeele: 3 “Ninsaal biiga, nin-kãensã yãka yam n na n kell n tũ b bõn-naandsã sẽn yaa bõn-yoodã.* B rɩgla bũmb sẽn tõe n kɩt tɩ ned lak n lʋɩ, sẽn kɩtd tɩ neb maand yel-wẽnde. Mam segd n bas-b lame tɩ b sok maam bũmb sɩda?+ 4 Woto wã, gom ne-b n yeel yaa: ‘Ad a Zeova sẽn yaa Zu-soab sẽn ka to wã sẽn yeele: “Israyɛll ned sã n yãk yam n na n kell n tũ a bõn-naandsã sẽn yaa bõn-yoodã, la a rɩgl bũmb sẽn tõe n kɩt tɩ ned lak n lʋɩ, tɩ kɩt tɩ neb maand yel-wẽnde, t’a yaool n wa sok no-rɛɛs bũmbu, yaa maam a Zeova n na n leok-a wa sẽn segde, a bõn-naandsã sẽn yaa bõn-yoodã sẽn yaa wʋsgã yĩnga. 5 Bala mam na n kɩtame tɩ rabeem wʋsg kẽ Israyɛll buudã neb sũyã,* b fãa sẽn zãag ne maam n tɩ tũud b bõn-naandsã sẽn yaa bõn-yoodã yĩnga.”’+

6 “Rẽ wã, yeel Israyɛll buudã neb yaa: ‘Ad a Zeova sẽn yaa Zu-soab sẽn ka to wã sẽn yeele: “Lebg-y n wa-y-yã. Bas-y y bõn-naandsã sẽn yaa bõn-yoodã, la y wẽnemd y nens n bas y tʋʋm-wẽnsã fãa.+ 7 Bala Israyɛll ned buud fãa wall sãan sẽn be Israyɛll sã n zãag ne maam, n yãk yam n na n kell n tũ a bõn-naandsã sẽn yaa bõn-yoodã, la a rɩgl bũmb sẽn tõe n kɩt tɩ ned lak n lʋɩ, tɩ kɩt tɩ neb maand yel-wẽnde, t’a yaool n wa sok mam no-rɛɛs bũmbu,+ yaa maam a Zeova meng n na n leok-a. 8 Mam na n wẽnemda m nengã n tees nin-kãng n sɩbg-a, n kɩt tɩ bũmb ning sẽn na n paam-a wã lebg keoogr la yel-bũndi. Mam na n yiis-a-la m nin-buiidã sʋka.+ Woto, yãmb na n bãngame tɩ mam yaa a Zeova.”’

9 “‘La no-rɛɛsã sã n bas tɩ b belg-a t’a leoke, yaa maam a Zeova n belg no-rɛɛs-kãnga.+ Mam na n tẽega m nug n sɩbg-a, la m menes-a Israyɛll nebã sẽn yaa mam nin-buiidã sʋka. 10 Taalã na n zĩnda b zutu. Sẽn sok-a wã taalã ne no-rɛɛsã taalã fãa na n yɩɩ yembre, 11 sẽn na yɩl tɩ Israyɛll buudã neb ra le zãag ne maam, la tɩ b ra le rẽgem b mens ne b beegr toor-toorã fãa ye. Woto, b na n yɩɩ mam nin-buiidu, tɩ mam yɩ b Wẽnnaam.’+ Yaa a Zeova sẽn yaa Zu-soab sẽn ka to wã n yeele.”

12 A Zeova le goma ne maam n yeel yaa: 13 “Ninsaal biiga, soolem neb sã n pa maan sɩd ne maam, n maan yel-wẽn n beeg maam, mam na n tẽega m nug n sɩbg-ba, la m sãam b rɩɩbã.*+ Mam na n kɩtame tɩ kom kẽ soolmã,+ n kʋ ninsaalbã la rũmsã.”+ 14 “‘Baa a Nowe,+ a Dãniyɛll+ la a Zoob+ sã n da be soolem-kãng pʋgẽ, nin-kãensa b tãabã na n tõog n fãaga b mens* bala, b tɩrlmã+ yĩnga.’ Yaa a Zeova sẽn yaa Zu-soab sẽn ka to wã n yeele.”

15 “‘La mams wa mam sẽn na n kɩt tɩ we-rũms sẽn yaa toos kẽ soolmã, n kʋ a nebã* t’a lebg zĩ-vɩʋʋgo, tɩ ned pa le pɩʋʋgd be we-rũmsã yĩnga.+ 16 Mam wẽenda ne m meng tɩ baa nin-kãensa b tãabã sã n da be soolmã pʋgẽ, b pa na n fãag b kom-dibli wall b kom-pugli ye. B na n fãaga b mensã bala. Soolmã na n lebga raboogo.’ Yaa a Zeova sẽn yaa Zu-soab sẽn ka to wã n yeele.”

17 “‘La mams wa mam sẽn na n kɩt tɩ sʋʋg kẽ soolmã+ la m yeele: “Bɩ sʋʋg pɩʋʋg soolmẽ wã.” M sã n kʋ ninsaalbã la rũmsã fãa sẽn be a pʋgẽ wã,+ 18 baa nin-kãensa b tãabã sã n da be soolmã pʋgẽ, mam wẽenda ne m meng tɩ b pa na n fãag b kom-dibli wall b kom-pugli ye. B na n fãaga b mensã bala.’ Yaa a Zeova sẽn yaa Zu-soab sẽn ka to wã n yeele.”

19 “‘La mams wa mam sẽn na n kɩt tɩ bã-loangdg kẽ soolmã,+ la m kiig m sũ-puugrã a zug n kɩt tɩ zɩɩm daage, n kʋ ninsaalbã la rũmsã sẽn be a pʋgẽ wã. 20 Baa a Nowe,+ a Dãniyɛll+ la a Zoob+ sã n da be soolmã pʋgẽ, mam wẽenda ne m meng tɩ b pa na n fãag b kom-dibli wall b kom-pugli ye. B na n fãaga b mens* bala, b tɩrlmã+ yĩnga.’ Yaa a Zeova sẽn yaa Zu-soab sẽn ka to wã n yeele.”

21 “Bala ad a Zeova sẽn yaa Zu-soab sẽn ka to wã sẽn yeele: ‘Na n yɩɩ woto, mam sã n wa tʋm m sɩbgr a naasã*+ sẽn yaa sʋʋga, kom, we-rũms sẽn yaa toos la bã-loangdg+ Zerizalɛm, n kʋ ninsaalbã la rũmsã sẽn be a pʋgẽ wã.+ 22 La kẽer n na n põse, tɩ b yiis-ba.+ Na n yɩɩ kom-dibli la kom-pugli. B na n waa yãmb nengẽ. Yãmb sã n yã b manesmã la b tʋʋm-tʋmdɩ wã, sãmbg sẽn kae, yãmb na n paama belsgo, yel-beed ning mam sẽn kɩt tɩ wa Zerizalɛm zugã yĩnga, rat n yeel tɩ bũmb nins fãa mam sẽn maan-a wã.’”

23 “‘Yãmb sã n wa yã b manesmã la b tʋʋm-tʋmdɩ wã, b na n belsa yãmba. Yãmb na n bãngame tɩ pa yɩ zaalem yĩng la mam sẽn maan bũmb ning m sẽn maan Zerizalɛmmã ye.’+ Yaa a Zeova sẽn yaa Zu-soab sẽn ka to wã n yeele.”