Ezekɩyɛll sebre

4 “La foom a ninsaal biiga, rɩk tãn-koeemd n dɩgl f taoorã. Maan tẽng naand a zugu. Yaa Zerizalɛm. 2 Gũbg tẽngã.+ Me lalg n gũbg-a.+ Zam tãnd sẽn na yɩl n zab ne-a.+ Ti sik-zĩis n gũbg-a, la f rɩgl zab-teed nins b sẽn tar n lubd lalsã n gũbg-a.+ 3 Rɩk kut powall* n ning foo ne tẽngã sʋk tɩ yɩ wa kut lalga. Rẽ poor bɩ f wẽnemd f nengã n tees-a. A na n yɩɩ tẽng b sẽn gũbgi. Yaa foo n segd n gũbg tẽngã. Rẽ na n yɩɩ bãnd Israyɛll buudã yĩnga.+

4 “Rẽ poore, fo segd n gãanda f nug-goabgã zugu, n ning Israyɛll buudã taalã f meng zugu.*+ Fo na n tʋka b taalã, ray nins fãa fo sẽn na n gãand f nug-goabgã. 5 Mam na n kõo foo rasem kobs-tã la pis-wɛ, wa sẽn zems b taalã yʋʋm sõore,+ tɩ fo tʋk Israyɛll buudã taale. 6 Fo segd n gãandame tɩ ra-kãens sõorã wa pidi.

“Rẽ poore, fo segd n gãanda naoor a yiib-n-soaba. Fo segd n gãanda f nug-rɩtgã zugu, n tʋk Zida buudã taalã+ rasem pis-naase. Mam kõo foo daar a yembr tɩ yɩ yʋʋmde, daar a yembr tɩ yɩ yʋʋmde. 7 Fo na n wẽnemda f neng n tees Zerizalɛm f sẽn gũbgã,+ la f pilg f nugã. Fo segd n togsa bãngr-goam a wɛɛngẽ.

8 “Mam na n sẽba foo ne wĩy tɩ fo ra tõog n lebg f nugu, hal tɩ ray nins fo sẽn segd n gũbg-a wã sõor pidi.

9 “Fo segd n baoo bɩle buud toor-toore, orze,* bɛng-bɛda, lãntiy la kazʋy, n ning laok a ye pʋgẽ, n tall n wẽ buri. Bala rasem nins sõor fo sẽn na n gãe f nug-goabgã zugã, rasem kobs-tã la pis-wɛ wã, rẽ la fo na n wãbdẽ.+ 10 Fo na n maka rɩɩbã sɩkl pisi* n dɩ raar fãa. Fo na n dɩta wakat takɩ b sẽn yãke.

11 “Fo na n makda koomã me n yũuda: Hĩn pʋɩɩr a ye pʋɩ a yoob zugu.* Fo na n yũuda koomã wakat takɩ b sẽn yãke.

12 “Fo na n wãba burã wa f sẽn wãbd orz bur-gils to-to wã. Fo na n yõgna ninsaal bĩn-koeemse, n wẽ burã Israyɛll nebã nifẽ.” 13 A Zeova paasame yaa: “Yaa woto la Israyɛll nebã na n wãb b burã buud nins mam sẽn na n sãeeg-b tɩ b kẽngã sʋka. B na n wãb-a-la rẽgdo.”+

14 Dẽ, mam yeelame yaa: “Zu-soab sẽn ka to a Zeova, ra maan-y woto ye! Hal mam yãadmẽ n tãag masã, m pa wãb rũng sẽn ki a toor wall we-rũng sẽn kʋ nemd n dẽgem m meng* ye.+ Nemd sẽn yaa rẽgd zɩ n kẽ mam noorẽ ye.”+

15 T’a yeel maam yaa: “Be neere. Mam na n kõo foo sor tɩ f bas ninsaalbã bĩndã, la f bao nag-bĩnd n wẽ f burã a zugu.” 16 A le yeela maam yaa: “Ninsaal biiga, mam na n kɩtame tɩ rɩɩb ra le kẽ Zerizalɛm ye.*+ B na n magda b burã n wãbd ne yɩɩr sẽn yaa kãsenga,+ la b magd b koomã n yũud ne rabeem.+ 17 Na n yɩɩ woto, sẽn na yɩl tɩ b get taab ne rabeem, rɩɩb la koom sẽn ka be wã yĩnga, la b faag b kongrã yĩnga.