Ezekɩyɛll sebre
12 A Zeova le goma ne maam n yeel yaa: 2 “Ninsaal biiga, fo bee ne buud neb sẽn yaa tõatba. B tara nin n tõe n yã, la b pa ne ye. B tara tʋb n tõe n wʋme, la b pa wʋmd ye.+ Bala b yaa buud neb sẽn yaa tõatba.+ 3 Sã n yaa ne foom a ninsaal biiga, sẽb f teed sẽn na yɩl n kẽng yembdo. Rẽ poore, fo segd n yiime n loog yembd ne wĩntoog tɩ b getẽ. Yi f zakẽ wã n kẽng yembd zĩig a to tɩ b getẽ. Tõe tɩ b na n wʋma rẽ võore, baa b sẽn yaa buud neb sẽn yaa tõatbã. 4 Yiis f teedã f sẽn sẽb n na n kẽng yembdã wĩntoog tɩ b getẽ. Zaabrã sã n wa ta, fo segd n looga wa ned b sẽn tar n dabd yembdo,+ tɩ b getẽ.
5 “Poog lalgã la f wʋk f teedã n tũnug be n yiis tɩ b getẽ.+ 6 Rɩk f teedã n palg f bãoko, n tall n loog likã pʋgẽ tɩ b getẽ. Lud f nengã sẽn na yɩl n da yã tẽn-gãongã ye. Bala mam na n kɩtame tɩ fo yɩ bãnd Israyɛll buudã yĩnga.”+
7 Mam maana wa a sẽn yeel maamã. Ne wĩntoogo, mam yiisa m teedã wa teed ned sẽn na n tall n kẽng yembdo. Zaabrã sẽn ta, mam pooga lalgã ne nugu. Zĩigã sẽn wa n lebg lika, mam dɩka m teedã n palg m bãokã n yi b nifẽ.
8 Beoogã sẽn vẽege, a Zeova le goma ne maam n yeele: 9 “Ninsaal biiga, Israyɛll buudã sẽn yaa buud neb sẽn yaa tõatbã pa sok foo tɩ ‘bõe la f sẽn maandã’ sɩda? 10 Leok-b yaa: ‘Ad a Zeova sẽn yaa Zu-soab sẽn ka to wã sẽn yeele: “Koe-kãngã yaa naab+ ning sẽn be Zerizalɛmmã, ne Israyɛll buudã neb nins sẽn be tẽn-kãng pʋgẽ wã yĩnga.”’
11 “Yeel-b tɩ fo yaa bãnde,+ la tɩ b na n maan-b-la wa fo sẽn maanã. B na n yõg-b lame n tall n kẽng yembdo.+ 12 Naab ning sẽn be b sʋkã na n palga a teedã a bãokẽ n loog lik pʋgẽ. A na n pooga lalgã n wʋk a teedã n tũnug be n yiisi.+ A na n luda a nengã sẽn na yɩl n da yã tẽn-gãongã ye. 13 Mam na n loba m gãmbrã a zugu. Mam tãoosgã gãmbr na n yõk-a lame.+ Rẽ poore, mam na n tall-a lame n kẽng Babilonne, Kalde nebã soolmẽ wã, la a pa na n yã-a ye. A na n kii be.+ 14 Mam na n sãeega neb nins fãa sẽn gũbg-a wã, rat n yeel t’a sõangdbã ne a tãb-biisã,+ tɩ b kẽ ween-vɩɩsã fãa. Mam na n wõoga sʋʋg n dig-ba.+ 15 Mam sã n wa sãeeg-b buud toɛy-toɛyã sʋka, la m sãeeg-b soolem toor-toorã pʋsẽ, b na n bãngame tɩ mam yaa a Zeova. 16 La mam na n kɩtame tɩ bãmb b wãn bal põs sʋʋgã, komã la bã-loangdgã, sẽn na yɩl tɩ b gom b tʋʋm-wẽnsã yell buud nins b sẽn na n kẽngã sʋka. Woto, b na n bãngame tɩ mam yaa a Zeova.”
17 A Zeova le goma ne maam n yeele: 18 “Ninsaal biiga, fo segd n dɩta f rɩɩbã* la f rigda, la f yũud f koomã ne pɛlen-yɩk la yɩɩre.+ 19 Yeel soolmã nebã yaa: ‘Ad a Zeova sẽn yaa Zu-soab sẽn ka to wã sẽn yeel Zerizalɛm nebã sẽn be Israyɛll soolmẽ wã wɛɛngẽ: “B na n dɩta b rɩɩbã* ne yɩɩre, la b yũud b koomã ne rabeem wʋsgo, bala b soolmã na n lebga raboog zãnga,+ neb nins fãa sẽn be be wã nen-kɛglmã yĩnga.+ 20 B na n sãama tẽns nins sẽn tar nebã, tɩ soolmã lebg zĩ-vɩʋʋgo.+ Woto, yãmb na n bãngame tɩ mam yaa a Zeova.”’”+
21 A Zeova le goma ne maam n yeele: 22 “Ninsaal biiga, yaa bõe yel-bũnd la yãmb sẽn wẽed Israyɛll pʋgẽ n yetẽ yaa: ‘Rayã loogdame, la vẽnegr baa a ye pa pidsdã’?+ 23 Woto wã, yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Mam na n kɩtame tɩ b bas gom-kãngã. B pa na n le wẽ yel-bũn-kãngã Israyɛll ye.”’ La yeel-b yaa: ‘Ray nins vẽnegr buud fãa sẽn na n pidsã kolgame.’+ 24 Bala zirẽ-be-vẽnegr wall bag-bʋgend sẽn yaa belgr pa na n le zĩnd Israyɛll buudã pʋgẽ ye.+ 25 ‘“Bala maam a Zeova na n gomame. Bũmb ning fãa mam sẽn na n togsã na n pidsame n pa kaoos ye.+ Buud neb sẽn yaa tõatba,+ yãmb wakatẽ wã, mam na n togsa gomd la m pids-a.” Yaa a Zeova sẽn yaa Zu-soab sẽn ka to wã n yeele.’”
26 A Zeova le goma ne maam n yeele: 27 “Ninsaal biiga, ad Israyɛll nebã* sẽn yete: ‘Vẽnegr nins a sẽn yãtã yaa wakat sẽn ket n zãr yĩnga. Bãngr-goam nins a sẽn togsdã yaa beoog-daar sẽn ket n zãr wɛɛngẽ.’+ 28 Woto wã, yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “‘Mam gomd baa a ye pa na n kaoos pidsg ye. Bũmb ning fãa mam sẽn yeel na n pidsame.’ Yaa a Zeova sẽn yaa Zu-soab sẽn ka to wã n yeele.”’”