Zeremi sebre
30 A Zeova goma ne a Zeremi n yeel yaa: 2 “Ad Israyɛll Wẽnnaam a Zeova sẽn yeele: ‘Gʋls goam nins fãa mam sẽn togsd foomã sebr pʋgẽ. 3 Bala a Zeova yeelame: “Wakat n wat tɩ mam na n tigim mam neb nins b sẽn tall n kẽng yembdã, rat n yeel tɩ Israyɛll la Zida nebã.”+ Yaa a Zeova n yeele. “Mam na n tall-b lame n lebg n wa soolem ning mam sẽn da kõ b yaab-rãmbã pʋgẽ, tɩ b le soog-a yɛsa.”’”+
4 Yaa gom-kãensã la a Zeova togs Israyɛll la Zida nebã.
5 Ad a Zeova sẽn yeele:
“Tõnd wʋma rabeem kaasg rãamde.
Yaa rabeem bala. Laafɩ kae ye.
6 M bõos tɩ y sok n ges rao sã n tõe n dogame.
Bõe yĩng tɩ nebã fãa nens ka neere?*
7 Kayto! Daar-n-kãng yaa yel-pakr daare.*+
Daar kae n wõnd-a ye.
Yaa yel-pakr wakat ne a Zakoobe.
La a na n paamame tɩ b fãag-a daar-n-kãnga.”
8 Ad a Zeova sẽn yaa tãb-biis naabã sẽn yeele: “Daar-n-kãnga, mam na n kaooga yubl-balgdgã sẽn be b yubliẽ wã, la m tõs b sẽbdsã zĩis a yiibu. Sãambã pa na n le kɩt tɩ b yɩ b yembs ye.* 9 B na n saka b Wẽnnaam a Zeova, la b rĩm a Davɩɩd mam sẽn na n yãk t’a soog-bã.”+
10 A Zeova yeelame: “Foom a Zakoob sẽn yaa mam tʋm-tʋmdã, ra zoe rabeem ye.
Foom a Israyɛlle, ra yɛɛs ye.+
Bala mam na n fãaga foo zĩ-zãrgẽ wã,
la m fãag f yagensã soolem ning pʋgẽ b sẽn be n yaa yembsã.+
A Zakoob yagensã na n lebg n wa zĩnda bãane, n pa yɛɛsdẽ,
tɩ ned kae n kẽesd-b rabeem ye.”+
11 A Zeova yeelame: “Bala mam bee ne foo, n na n fãag foom.
La mam na n sãama buud nins fãa mam sẽn sãeeg yãmb tɩ y be b sʋkã.+
La sã n yaa ne yãmba, mam pa na n sãam yãmb ye.+
12 Bala ad a Zeova sẽn yeele:
“Yãmb sãmpogrã pa tar tɩɩm ye.+
Yãmb nodrã pa tõe n tɩp ye.
13 Ned kae n na n sõng yãmb tɩ y paam bʋʋm ye.
Bũmb kae b sẽn tõe n maan tɩ yãmb nod-toaagã maag ye.
Tɩɩm pa be yãmb yĩng ye.
14 Yãmb rolsen-dãmbã fãa yĩma yãmb yelle.+
B pa le baood yãmb zĩig ye.
Bala mam pãba yãmb wa ned bɛ sẽn pãbd-a,+
la m sɩbg-y wa nin-toaag sẽn sɩbgd to-to wã,
yãmb taalã sẽn yaa kãsengã, la y yel-wẽnã sẽn yaa wʋsgã yĩnga.+
15 Bõe yĩng tɩ yãmb yãbd y sãmpogrã yĩnga?
Yãmb toogã pa tõe n maag ye!
Yaa yãmb taalã sẽn yaa kãsengã, la y yel-wẽnã sẽn yaa wʋsgã yĩng+
la mam sẽn maan-y woto wã.
B na n fãa sẽn fãad-b yãmbã.
Mam na n kɩtame tɩ b zɛ sẽn zɛɛd-b yãmb teedã teedo.”+
17 “Mam na n kɩtame tɩ y le paam laafɩ, la m tɩp y noadã.”+ Yaa a Zeova n yeele.
“Baa b sẽn boond yãmb tɩ b sẽn bas b rãmba, n yetẽ:
‘Siyõ, zĩig ning ned baa a ye toog sẽn kae ne wã.’”+
18 Ad a Zeova sẽn yeele:
“Mam na n tigma a Zakoob fu-rotã neb nins b sẽn tall n kẽng yembdã.+
Mam na n zoee a fu-rotã nimbãanega.
B na n lebs n mee a galʋ-tẽngã tãng ning zug a sẽn da be wã.+
A gasg sẽn tar pãngã na n yalsa zĩig ning a sẽn segd n yalsã.
19 Bark pʋʋsg yɩɩla, la laad rãamd na n yii b sʋka.+
Mam na n kɩtame tɩ b fɩɩge, tɩ b sõorã ra yɩ bilf ye.+
Mam na n kɩtame tɩ b yɩ wʋsgo.*
B pa na n yɩ bilf ye.+
20 A Zakoob yagensã na n le yɩɩ wa pĩndã.
B na n lebga buud sẽn tar pãng mam taoore.+
Mam na n sɩbga neb nins fãa sẽn namsd bãmbã.+
21 B naabã na n yɩɩ bãmb sʋkã neda.
A na n yii bãmb pendẽ wã.
Mam na n kɩtame t’a kolge. A na n pẽnega maam.”
“Sã n pa rẽ, ãnda n na n saag n pẽneg maam?” Yaa a Zeova n yeele.
22 “Yãmb na n lebga mam nin-buiidu,+ tɩ mam lebg y Wẽnnaam.”+
23 Ade! A Zeova sũ-puugrã na n fuga wa sob-kẽenga.+
A na n siga nin-wẽnsã zutẽ wa sobg sẽn tar pãng wʋsgo.
24 A Zeova sũ-pu-kãsengã pa na n sigi,
sã n pa a maana a raabã, la a pids-a zãng ye.+
Beoog sẽn wate, yãmb na n wʋma rẽ võor sõma.+