Ezekɩyɛll sebre

25 A Zeova le goma ne maam n yeele: 2 “Ninsaal biiga, wẽnemd f neng n tees Amon nebã,+ n togs bãngr-gomd n ning-b taale.+ 3 Fo segd n yeela Amon nebã wɛɛngẽ yaa: ‘Kelg-y-yã a Zeova sẽn yaa Zu-soab sẽn ka to wã goama. Ad a Zeova sẽn yaa Zu-soab sẽn ka to wã sẽn yeele: “Yãmb sẽn yeel tɩ ‘n-faa!’ mam doogã wɛɛngẽ b sẽn wa n dẽgm-a wã, Israyɛll soolmã wɛɛngẽ b sẽn wa n kɩt t’a lebg raboogã, la Zida buudã neb wɛɛngẽ b sẽn wa n tall-b n kẽng yembdã, 4 mam na n dɩka yãmb n kõ Yaang nebã tɩ b sooge. B na n tilga b sik-zĩisã yãmb soolmẽ wã, la b ti b fu-rotã yãmb sʋka. B na n dɩɩ yãmb soolmã biisi, la b yũ y rũmsã bĩisim. 5 Mam na n kɩtame tɩ Raba+ lebg yʋgma wãbneg zĩiga, la m kɩt tɩ Amon nebã soolem lebg rũms vʋʋsg zĩiga. Woto, yãmb na n bãngame tɩ mam yaa a Zeova.”’”

6 “Bala ad a Zeova sẽn yaa Zu-soab sẽn ka to wã sẽn yeele: ‘Yãmb sẽn wẽ nug-pogse,+ n tĩms y nao tẽng la y* kɩdem sũ-noog Israyɛll wɛɛngẽ ne paoogr wʋsgã,+ 7 mam na n tẽega m nug n zab ne yãmba, n kɩt tɩ y lebg te-zɛɛdem buud toɛy-toɛyã yĩnga. Mam na n yiisa yãmb buud toɛy-toɛyã sʋka, la m sãam-y soolem toɛy-toɛyã sʋka.+ Mam na n menesa yãmba. Woto, yãmb na n bãngame tɩ mam yaa a Zeova.’

8 “Ad a Zeova sẽn yaa Zu-soab sẽn ka to wã sẽn yeele: ‘Mowaab+ ne Seyɩɩr+ sẽn yeel tɩ “Zida buudã yaa wa buud a taabã fãa wã” yĩnga, 9 mam na n kɩtame tɩ Mowaab tẽns nins sẽn be a toadgẽ wã pa le paam koglgo, n paas a soolmã tẽns nins sẽn yaa sõma n yɩɩdã, rat n yeel tɩ Bɛt-zesimot ne Baal-meyonne, la baa Kiryatayim.+ 10 Mam na n dɩka Mowaab n paas Amon nebã n kõ Yaang nebã tɩ b sooge.+ Woto, b pa na n le tẽeg Amon nebã yell buud toɛy-toɛyã sʋk ye.+ 11 Mam na n sɩbga Mowaab+ nebã. Woto, b na n bãngame tɩ mam yaa a Zeova.’

12 “Ad a Zeova sẽn yaa Zu-soab sẽn ka to wã sẽn yeele: ‘Edom roka a sũur ne Zida nebã. A paama taal wʋsgo, a sẽn dok a sũur ne-bã yĩnga.+ 13 Woto wã, ad a Zeova sẽn yaa Zu-soab sẽn ka to wã sẽn yeele: “Mam na n tẽega m nug n zab ne Edom me, la m kʋ ninsaalbã ne yir dũmsã sẽn be a pʋgẽ wã. Mam na n kɩtame t’a lebg raboogo.+ Sẽn sɩng ne Teman n tãag Dedanne, b na n kʋʋ a nebã ne sʋʋse.+ 14 ‘Mam na n kɩtame tɩ Israyɛll sẽn yaa mam nin-buiidã rok m sũur Edom zugu.+ B na n kɩtame tɩ mam sũ-yikrã ne m sũ-puugrã sig Edom zugu, sẽn na yɩl tɩ b bãng mam sũ-dokrã sẽn yaa to-to.’+ Yaa a Zeova sẽn yaa Zu-soab sẽn ka to wã n yeele.”’

15 “Ad a Zeova sẽn yaa Zu-soab sẽn ka to wã sẽn yeele: ‘Filisti nebã beemã sẽn pa satã yĩnga, b maana pʋ-toog n bao n na n dok b sũur la b wa ne sãoongo.+ 16 Woto wã, ad a Zeova sẽn yaa Zu-soab sẽn ka to wã sẽn yeele: “Mam na n tẽega m nug n zab ne Filisti+ nebã, n kʋ Kerɛt nebã,+ la m sãam mogrã noor neb nins sẽn ketã.+ 17 Mam na n maana bõn-kãsems n sɩbg-b ne sũ-puugr n dok m sũuri. Mam sã n wa rok m sũur ne-ba, b na n bãngame tɩ mam yaa a Zeova.”’”