Rĩm-dãmbã sebr a yiib-n-soaba
19 Rĩm a Ezekɩyaas sẽn wʋm gom-kãensa wã, zĩig pʋgẽ, a pãrsa a futã la a yeelg boto, n kẽng a Zeova roogẽ wã.+ 2 Dẽ, yẽ tʋma a Eliyakim sẽn get na-yirã yellã, ne a Sebna sẽn yaa seb-gʋlsdã la maan-kʋʋdbã taoor dãmb tɩ b kẽng no-rɛɛs a Ezayi+ sẽn yaa a Amooz biigã nengẽ. Bãmb yeelga bot n kẽnge. 3 Bãmb yeela a Ezayi yaa: “Ad a Ezekɩyaas sẽn yeele: ‘Rũndã yaa sũ-sãang daare, tãsga,* la yãnd daare. Bala tõnd yaa wa pag sẽn kʋmd rogem, tɩ pãng kae n na n dog ye.+ 4 Tõe tɩ yãmb Wẽnnaam a Zeova na n wʋma goam nins fãa Rabsake wã* zu-soab sẽn tʋm-a t’a wa gom n bao Wẽnnaam ning sẽn vɩ wã noorã,+ n sok-a goam nins yãmb Wẽnnaam a Zeova sẽn wʋmã yĩnga. Woto wã, pʋʋs-y+ kellã sẽn põsã yĩnga.’”
5 Dẽ, rĩm a Ezekɩyaas tʋm-tʋmdbã kẽnga a Ezayi nengẽ+ 6 t’a yeel-b yaa: “Ad yãmb sẽn segd n tɩ yeel y zu-soabã: ‘Ad a Zeova sẽn yeele: Ra yɛɛs+ goam nins fo sẽn wʋmã yĩng ye. Ra zoe rabeem, goam nins Asiiri rĩmã tʋm-tʋmdbã sẽn gom n paoog maamã yĩng ye.+ 7 Gese! Mam na n ninga bũmb a yamẽ wã. A na n wʋma kibar n lebg n leb a tẽngẽ wã, la mam na n kɩtame tɩ b kʋ-a ne sʋʋg a meng tẽngã pʋgẽ.’”+
8 Rabsake wã sẽn wʋm tɩ Asiiri rĩmã loog n basa Lakiisã,+ a leba a nengẽ n tɩ mik t’a zabda ne Libna.+ 9 La Asiiri rĩmã wʋmame tɩ Etiyopi rĩm a Tiraka yi n na n zaba ne-a. Woto, yẽ tʋma koe-taasdb+ a Ezekɩyaas nengẽ n yeel-b yaa: 10 “Ad yãmb sẽn segd n tɩ yeel rĩm a Ezekɩyaas bũmb ninga: ‘Ra bas tɩ f Wẽnnaamã fo sẽn teegã belg-fo, n yeel tɩ Asiiri rĩmã pa na n tõog n deeg Zerizalɛm ye.+ 11 Gese! Fo wʋma Asiiri rĩm-dãmbã sẽn maan tẽnsã fãa bũmb ningã. B sãam-b lame.+ Fo tagsdame tɩ f na n põsame la? 12 Buud nins mam yaab-rãmbã sẽn sãamã wẽnnaam-dãmbã fãag-b lame sɩda? Gozan ne Haran+ la Rezɛf bɛɛ? Edɛn nin-buiidã sẽn da be Tɛll-asaarã bɛɛ? 13 Hamat rĩmã ne Arpaad rĩmã bɛɛ? Sefarvayim ne Hena la Iva tẽnsã rĩmã bɛɛ?’”+
14 A Ezekɩyaas reega sɛbã koe-taasdbã nugẽ n karme, la a kẽng a Zeova roogẽ wã n tɩ yadg sɛbã a Zeova taoore.+ 15 A Ezekɩyaas sɩnga pʋʋsg+ a Zeova taoor n yeel yaa: “Israyɛll Wẽnnaam a Zeova sẽn zao a geerã sẽn be seribẽ-rãmbã zugã.*+ Yaa yãmb y ye bal n yaa dũniyã soolem toɛy-toɛyã fãa Wẽnnaam sɩd-sɩda.+ Yãmb n naan saasã la tẽngã. 16 Zeova, kɩll-y y tʋbr n kelge!+ Zeova, puk-y y nin+ n gese! Kelg-y goam nins a Senakeriib sẽn tʋm tɩ b wa gom n bao Wẽnnaam ning sẽn vɩ wã noorã. 17 Zeova, yaa sɩd tɩ Asiiri rĩm-dãmbã sãama buud toɛy-toɛy ne b tẽnse.+ 18 La bãmb loba b wẽnnaam-dãmbã bugmẽ, bala b yaa ninsaalb nus tʋʋma,+ b pa wẽnnaam-dãmb ye.+ B yaa raad ne kuga. Rẽ n so tɩ b tõog n sãam-ba. 19 La masã, tõnd Wẽnnaam a Zeova, d kotame tɩ y fãag tõnd a nugẽ tɩ dũniyã soolem toɛy-toɛyã fãa bãng tɩ yãmb a Zeova y yembr bal n yaa Wẽnnaam.”+
20 Dẽ, a Amooz biig a Ezayi tʋmame tɩ b tɩ taas a Ezekɩyaas koe-kãngã: “Ad Israyɛll Wẽnnaam a Zeova sẽn yeele: ‘Mam wʋma fo sẽn pʋʋs+ maam Asiiri rĩm a Senakeriib wɛɛngẽ wã.+ 21 Ad a Zeova sẽn yet yẽ bũmb ninga:
“Siyõ bi-puglã sẽn yaa pa-kuilã yaanda foo la a paoogd foo.
Zerizalɛm bi-puglã girda a zug n laad foo.
22 Yaa ãnda noor la fo sẽn bao wã, la yaa ãnda la fo sẽn paoogã?+
Fo zẽka f koɛɛg ne ãnda,+
la fo naka f neng yĩngr ne wuk-m-meng n get ãnda?
Yaa Israyɛll Sõng soabã!+
23 Fo tʋma f koe-taasdbã+ tɩ b wa bao a Zeova noor+ n yeele:
‘Ne mam zabr saar-dãmbã* sẽn yaa wʋsgã,
mam na n dʋʋ tãensã zutu,
n kẽng Libã zĩis nins sẽn zãr n yɩɩdã.
Mam na n kɛɛ a sɛɛdr tɩɩsã sẽn yaa wogdã, ne a zenevirie tɩɩs nins sẽn yaa sõma n yɩɩdã.
Mam na n kẽe a zĩ-solgdsã sẽn zãr n yɩɩdã, ne a kãg nins wẽdgr sẽn yaa toogã.
24 Mam na n tuu buls n yũ tẽn-zẽms koom.
Mam na n kʋɩɩsa Ezɩpt kosoodã* fãa ne m nao-sɩlpama.’
25 Fo pa wʋm la? Yaa hal daar zãr la mam yãk yam n na n maan yãoã.+
Yaa hal wakat sẽn loog la mam segl bõn-kãngã.+
La masã, mam na n pids-a lame.+
Fo na n luba tẽns sẽn gũbg ne lals tɩ b lebg raboodo.+
26 Tẽn-kãens nebã pa na n paam sõangd ye.
Rabeem ne yãnd na n yõk-b lame,
tɩ b lebg wa weoogẽ mood ne mo-maasa,+
wa sugr mood yaang sobg sẽn kʋɩɩsde.
27 La mam mii fo zĩndg wakate, fo yiib wakat la f kõom wakate,+
la wakat ning fo sũurã sẽn kãbd ne maam.+
Woto yĩnga, mam na n soga fo yõorã ne m lɛoogã la m ning f noorã salbre,+
n kɩt tɩ f lebg n dɩk sor ning fo sẽn tũ n wa wã n lebe.”+
29 “Ad bãnd ning mam sẽn kõt foom a Ezekɩyaase: Rõandã, yãmb na n dɩɩ kood nins sẽn yi b toorã. La vẽere, yãmb na n dɩɩ kood-kãens sẽn na n sʋʋg n bul n yi wã.+ La yʋʋm a tãab-n-soabã, yãmb na n bʋdame la y kẽebe. Yãmb na n sela viyn tɩɩs n dɩ b biisã.+ 30 Zida neb nins sẽn põsã, b rãmb nins sẽn ketã+ na n kɩɩ yẽg tẽngre, la b wom biis yĩngri. 31 Bala kell n na n yi Zerizalɛm, la neb n na n põs n yi Siyõ tãngã zugu. Tãb-biis naab a Zeova yẽesmã n na n maan tɩ yɩ woto.+
32 “‘Woto yĩnga, ad a Zeova sẽn yet Asiiri rĩmã wɛɛngẽ:+
“A pa na n kẽ tẽn-kãngã pʋgẽ,+
bɩ n tão peemd be,
wall a zẽk a gãong ne-a,
bɩ n zam tom n na n ta a lalsã ye.+
33 A Zeova yeelame yaa: Sor ning a sẽn tũ n wa wã, yaa so-kãng la a na n tũ n lebe.
A pa na n kẽ tẽn-kãngã pʋgẽ ye.”
34 “Mam na n zab n sõnga tẽn-kãngã+ la m fãag-a mam mengã yʋʋrã yĩnga,+
la m tʋm-tʋmd a Davɩɩd yĩnga.”’”+
35 Baraar yʋngo, a Zeova malɛkã yiime n kʋ tãb-biis tus-koabg la pis-nii la a nu Asiiri nebã tãb-sikã zĩigẽ.+ Nebã sẽn yik yibeoog pĩnda, b yãa kũ-rãmbã fãa sẽn dʋre.+ 36 Dẽ, Asiiri rĩm a Senakeriib lebgame n leb Niniiv+ n tɩ zĩnd be.+ 37 La yẽ sẽn wa n wõgemded a wẽnnaam a Nisrok roogẽ wã, a kom-dibli a Adramelɛk ne a Sarezɛɛr kʋ-a-la ne sʋʋga,+ la b zoe n kẽng Ararat+ soolmẽ wã. Rẽ poore, a biig a Esar-hadon+ ledg-a lame n lebg rĩma.