Zeremi sebre
23 A Zeova yeelame: “Toog bee ne rũm-kɩɩmb nins sẽn sãamd piisã sẽn be mam rũmsã wãbneg zĩigẽ, la b sãeegd-bã!”+
2 Woto wã, ad Israyɛll Wẽnnaam a Zeova sẽn yeele, n ning rũm-kɩɩmb nins sẽn kɩɩmd a nin-buiidã taale: “Yãmb sãeega mam piisã. Yãmb ket n sãeegd-b lame, la y pa get b yell ye.”+
“Rẽ n so tɩ mam na n sɩbg yãmb y tʋʋm-wẽnsã yĩnga.” Yaa a Zeova n yeele.
3 “Rẽ poore, mam na n tigma m piisã sẽn kellã soolem nins fãa pʋsẽ m sẽn da sãeeg-bã,+ n tall-b n lebg n wa b wãbnegã zĩigẽ.+ B na n doga kamb n lebg wʋsgo.+ 4 Mam na n yãka rũm-kɩɩmb sẽn sɩd na n kɩɩm-ba.+ Mam piisã pa na n le yɛɛs wall b rig rabeem ye. B baa a ye pa na n menem ye.” Yaa a Zeova n yeele.
5 A Zeova yeelame yaa: “Daar n wat tɩ mam na n kɩt tɩ yageng* sẽn yaa tɩrg yi a Davɩɩd pendẽ wã.+ Rĩm n na n dɩ naam.+ A na n talla yam-vẽenem, n kaood bʋʋd ne tɩrlem, la a maand sẽn yaa tɩrg soolmã pʋgẽ.+ 6 A naamã wakate, Zida na n paama fãagre,+ tɩ Israyɛll zĩnd bãane.+ Ad b sẽn na n boond-a ne yʋʋr ninga: A Zeova yaa tõnd tɩrlem.”+
7 A Zeova yeelame: “Wakat n wate, tɩ b pa na n le yeel yaa: ‘D wẽenda ne a Zeova sẽn vɩ wã, soab ning sẽn yiis Israyɛll nebã Ezɩpt soolmẽ wã!’+ 8 La b na n yeelame yaa: ‘D wẽenda ne a Zeova sẽn vɩ wã, soab ning sẽn yiis a Israyɛll yagensã rɩtg soolmẽ wã, la soolem nins fãa pʋsẽ a sẽn da sãeeg-bã n tall-b n lebg n wa wã!’ B na n zĩnda b mengã soolmẽ.”+
9 Mam yeta no-rɛɛsdbã wɛɛngẽ yaa:
Mam sũurã sãamame.
Mam kõabã fãa rigdame.
Mam yaa wa ned sẽn tɩg rãam,
la wa ned sẽn yũ divẽ tɩ loog-a,
a Zeova yĩnga, la a goamã sẽn yaa sõngã yĩnga.
10 Bala soolmã pida ne yoaadba.+
Kãab-wẽngã yĩnga, soolmã bee sũ-sãang pʋgẽ,+
tɩ rũmsã wãbneg zĩis sẽn be we-raoogẽ wã kʋɩ.+
B manesmã yaa wẽnga. B maanda nebã pãnga.
11 A Zeova yeelame: “No-rɛɛsdbã ne maan-kʋʋdbã fãa rẽgma b mense.*+
Mam yãa b wẽnemã baa mam doogã pʋgẽ menga.+
12 Rẽ n so tɩ b sorã na n lebg sals la lika.+
B na n tus-b lame tɩ b lʋɩ.
Bala mam na n kɩtame tɩ yel-beed paam-ba,
yʋʋmd ning m sẽn na n sok-bã.” Yaa a Zeova n yeele.
13 “M yãa bũmb sẽn põog Samari+ no-rɛɛsdbã nengẽ.
B togsda b bãngr-goamã a Baal yʋʋr yĩnga,
n menesd Israyɛll nebã sẽn yaa mam nin-buiidã.
14 M yãa bũmb toor-toor sẽn yaa wẽns wʋsg Zerizalɛm no-rɛɛsdbã nengẽ.
15 Woto wã, ad Israyɛll Wẽnnaam a Zeova sẽn yaa tãb-biis naabã sẽn yeele, n ning no-rɛɛsdbã taale:
Bala Zerizalɛm no-rɛɛsdbã kɩtame tɩ wẽn-kɩɩsgã piuug soolmã tõre.”
16 Ad a Zeova sẽn yaa tãb-biis naabã sẽn yeele:
“Ra kelg-y no-rɛɛsdbã sẽn togsd yãmb bãngr-goamã ye.+
B belgda yãmba.
17 B yeta neb nins sẽn paoogd maamã n yɩlemdẽ yaa:
‘A Zeova yeelame: “Yãmb na n zĩnda bãane.”’+
B yeta neb nins sẽn tũud b sũyã sẽn diglmã yaa:
‘Yel-beed pa na n paam yãmb ye.’+
18 Bala ãnda n yals sẽn pẽ-b a Zeova wã sʋka,
sẽn na yɩl n yã a gomdã la a wʋm-a?
Ãnda n maag a yĩng n kelg a gomdã sẽn na yɩl n wʋm-a?
19 Ade! A Zeova sũ-puugrã na n fuga wa sob-kẽenga.
A na n siga nin-wẽnsã zutẽ wa sobg sẽn tar pãng wʋsgo.+
20 A Zeova sũ-puugrã pa na n sigi,
sã n pa a maana a raabã, la a pids-a zãng ye.
Beoog sẽn wate, yãmb na n wʋma rẽ võor sõma.
21 No-rɛɛsdbã ra zoetame, baa mam sẽn pa tʋm-bã.
B ra togsda bãngr-goama, baa mam sẽn pa gom ne-bã.+
22 La b sã n da yalsa sẽn pẽ-b maamã sʋka,
b ra na n togsa mam nin-buiidã m goamã.
B ra na n kɩtame tɩ b lebg n bas b so-wẽngã la b tʋʋm-wẽnsã.”+
23 A Zeova sokame yaa: “Yaa mam sẽn wat n pẽ yãmb bal la m yaa Wẽnnaam bɩ? Mam pa Wẽnnaam mam sẽn wat n zãr ne yãmb me sɩda?”
24 A Zeova sokame yaa: “Zĩig beeme tɩ ned tõe n tɩ solg tɩ mam pa yã-a sɩda?”+
A Zeova sokame yaa: “Bũmb bee saasẽ wall tẽngã zug mam sẽn pa tõe n yã bɩ?”*+
25 “Mam wʋma no-rɛɛsdb sẽn togsd bãngr-goam sẽn yaa ziri ne mam yʋʋre, n yetẽ: ‘Mam zãmsa zãmsdo! Mam zãmsa zãmsdo!’+ 26 No-rɛɛsdbã na n kell n yaga ziri hal tɩ ta dabʋre? B yaa no-rɛɛsdb sẽn togsd zãmb sẽn yit b mensã sũy pʋsẽ.+ 27 B tũnugda ne zãmsd nins b sẽn togsd taabã, n dat n kɩt tɩ mam nin-buiidã yĩm mam yʋʋrã, wa b yaab-rãmbã sẽn yĩm mam yʋʋrã a Baal yĩngã.+ 28 Bɩ no-rɛɛs ning sẽn zãms zãmsd togs zãmsdã. La sẽn tar-a mam goamã segd n togsa rẽ ne sɩda.”
“Bõe wõneg n be mood ne ka-bɛɛl sʋka?” Yaa a Zeova n yeele.
29 A Zeova sokame yaa: “Mam goamã pa wa bugum,+ la wa marto sẽn wãad pĩig sɩda?”+
30 A Zeova yeelame: “Woto wã, mam na n sɩbga no-rɛɛsdb nins sẽn zuud mam goamã no-rɛɛsdb a taab nengẽ wã.”+
31 A Zeova yeelame: “Mam na n sɩbga no-rɛɛsdb nins sẽn tar b zɩlma wã n yetẽ: ‘A yeelame!’+ wã.”
32 A Zeova yeelame: “Mam na n sɩbga no-rɛɛsdb nins sẽn togsd zirẽ-be-zãmsdo, la sẽn menesd mam nin-buiidã ne b zirẽ-beedã la b wuk-m-mengã.”+
“Mam yaool n pa tʋm-ba, wall m kõ-b noor ye. Rẽ n so tɩ b sẽn maandã pa na n tol naf nin-buiidã ye.”+ Yaa a Zeova n yeele.
33 “Nin-buiidã, no-rɛɛs wall maan-kʋʋd sã n sok foo yaa: ‘A Zeova zɩɩbã* yaa bõe?’ Fo segd n leok-b lame yaa: ‘Ad a Zeova sẽn yeele: “Yaa yãmb la zɩɩbã! Mam na n lob-y lame.”’+ 34 Sã n yaa ne no-rɛɛsa, maan-kʋʋd wall ned a to sẽn yete: ‘Ad a Zeova zɩɩbã!’* Mam na n sɩbga nin-kãng ne a zakã rãmba. 35 Ad bũmb ning yãmb ned kam fãa sẽn sokd a to wall a ba-biiga: ‘A Zeova leokame tɩ bõe? A Zeova yeelame tɩ bõe?’ 36 La yãmb pa segd n le gom a Zeova zɩɩbã* yell yɛsa, bala zɩɩbã* yaa yãmb ned kam fãa goama. Sẽn paase, yãmb toeema tõnd Wẽnnaam a Zeova sẽn yaa tãb-biis naabã goamã. Yẽ n yaa Wẽnnaam ning sẽn vɩ wã.
37 “Ad fo sẽn na n sok no-rɛɛsã: ‘A Zeova leoka foo tɩ bõe? A Zeova yeelame tɩ bõe? 38 La yãmb sã n ket n yetẽ yaa: “A Zeova zɩɩbã!”* Ad a Zeova sẽn yeele: “Yãmb yetame tɩ ‘gom-kãngã yaa a Zeova zɩɩbã,’”* tɩ mam yaool n yeel yãmb tɩ ‘y pa segd n yeele: “A Zeova zɩɩbã!”* ye.’ Woto yĩnga, 39 mam na n zẽka yãmb n lobe, tɩ y menem mam taoorã, yãmb ne tẽng ning mam sẽn da kõ yãmb ne y yaab-rãmbã. 40 Mam na n kɩtame tɩ yãmb paam yãnd la paoogr sẽn na n yɩ wakat fãa yĩnga. Nebã pa na n tol n yĩm rẽ yell ye.”’”+