Zeremi sebre
7 Ad goam nins a Zeova sẽn taas a Zeremi wã. A yeelame: 2 “Tɩ yaas a Zeova roogã rignoorẽ n moon n yeel yaa: ‘Yãmb a Zida nebã fãa sẽn tũud rigno-kãensã n kẽed n wõgemded a Zeova taoorã, kelg-y-yã a Zeova goamã. 3 Ad Israyɛll Wẽnnaam a Zeova sẽn yaa tãb-biis naabã sẽn yeele: “Maneg-y y manesmã la y tʋʋm-tʋmdɩ wã, tɩ rẽ la m na n bas-y tɩ y kell n pa zĩ-kãngã.+ 4 Ra teeg-y zirẽ-be-goam n yeele: ‘Yãoã yaa* a Zeova roogo! Yaa a Zeova roogo! A Zeova roogo!’+ 5 Bala yãmb sã n sɩd maneg y manesmã la y tʋʋm-tʋmdɩ wã, yãmb sã n kaood nebã bʋʋd tɩrga,+ 6 yãmb sã n pa weoogd sãamba, kɩɩbs* la pʋg-kõapa,+ yãmb sã n pa raagd bʋʋm dãmb zɩɩm zĩ-kãngã, la y pa tũ wẽnnaam-dãmb a taab n wã y mense,+ 7 dẽ, mam na n basa yãmb tɩ y kell n pa zĩ-kãngã, soolem ning mam sẽn kõ yãmb yaab-rãmbã wakat fãa yĩngã* pʋgẽ.”’”
8 “La yãmb teega zirẽ-be-goama.+ Rẽ pa na n tol n naf yãmb baa bilf ye. 9 Yãmb zuudame,+ n kʋʋda, n yooda, n wẽend n yagd ziri,+ n maand maand* n kõt a Baalle,+ la y tũud wẽnnaam-dãmb y sẽn da pa mi. 10 Yãmb tagsdame tɩ y tõe n maanda bõn-kãensã fãa mam sẽn kisã, la y wat mam taoore, ro-kãngã mam yʋʋrã sẽn be a zugã pʋgẽ, n yetẽ: ‘Tõnd na n paama fãagr’ sɩda? 11 Ro-kãngã mam yʋʋrã sẽn be a zugã lebga fãadb roog yãmb nifẽ la?+ Mam mengã yãame tɩ yaa woto.” Yaa a Zeova n yeele.
12 “‘Kẽng-y mam doog ning sẽn be Sɩlo+ wã pʋgẽ, zĩig ning mam sẽn kɩt tɩ m yʋʋrã zĩnd pipi wã,+ n ges mam sẽn maan-a bũmb ninga, Israyɛll nebã sẽn yaa mam nin-buiidã wẽnemã yĩngã.’+ 13 A Zeova yeelame yaa: ‘La yãmb ket n maanda bõn-kãensã. Baa mam sẽn gom ne yãmb naoor wʋsgã,* yãmb pa kelg ye.+ Mam da boonda yãmba, la yãmb da pa sakd ye.+ 14 Woto yĩnga, mam na n maana roog ning zug mam yʋʋrã sẽn be wã,+ roog ning yãmb sẽn teegã,+ ne zĩ-kãngã mam sẽn kõ yãmb ne y yaab-rãmbã wa mam sẽn maan Sɩlo wã.+ 15 Mam na n diga yãmb n yiis m taoore, wa mam sẽn dig yãmb ba-biisã fãa wã, rat n yeel t’a Efrayim yagensã fãa wã.’+
16 “La sã n yaa ne foo, ra pʋʋs nin-kãensã yĩng ye. Ra yãb ne maam b yĩnga, wall f pʋʋs bɩ n yõk m sɛɛg b yĩng ye.+ Bala mam pa na n kelg-f ye.+ 17 Fo pa ne b sẽn maand bũmb nins Zida tẽnsẽ wã, ne Zerizalɛm soayã zutã la? 18 Kambã wɩɩsda raado, tɩ ba-rãmbã yõgend bugum, tɩ pagbã nagd zom n na n maan buri, tɩ b kõ Saasẽ na-poakã.*+ Sẽn paase, b pʋdgda divẽ kũun n kõt wẽnnaam-dãmb a taab sẽn na yɩl tɩ m sũurã yiki.+ 19 A Zeova yeelame: ‘Yaa maam la b maand wẽng sɩda? Pa b mensã la b maand wẽnga, tɩ wat ne yãnd b mens zut sɩda?’+ 20 Woto yĩnga, ad a Zeova sẽn yaa Zu-soab sẽn ka to wã sẽn yeele: ‘Mam na n kiiga m sũ-yikrã ne m sũ-puugrã zĩ-kãngã zugu,+ ninsaalbã la rũmsã zutu, tɩɩsã sẽn be weoogẽ wã zutu, la tẽngã bõn-koaadlã biis zutu. Mam sũ-yikrã na n dɩta wa bugum n pa kiidẽ ye.’+
21 “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Kell-y n dɩk-y y maand sẽn yõogd bugmã n paas y maand a taabã, tɩ y mensã wãb b nemdã.+ 22 Bala daar ning mam sẽn yiis y yaab-rãmbã Ezɩpt soolmẽ wã, mam pa gom ne-b maoong sẽn yõogd bugum la maand yelle, wall m kõ-b noor rẽ wɛɛngẽ ye.+ 23 La mam yeel-b lame yaa: “Sak-y mam koɛɛgã, tɩ rẽ la mam na n yɩ yãmb Wẽnnaam, tɩ yãmb yɩ mam nin-buiidu.+ Yãmb segd n tũu noy nins fãa mam sẽn kõ yãmbã, tɩ bũmb fãa yɩ sõma ne yãmba.”’+ 24 La b pa kelg ye. B pa kɩll b tʋb n kelg maam ye.+ B pʋd n kẽna wa sẽn zems b mag-wẽnsã,* n diglim b sũyã n tũ b sũyã sẽn yaa wẽnsã.+ B targ n leba poorẽ, n pa kẽng taoor ye. 25 Yaa sẽn sɩng daar ning y yaab-rãmbã sẽn yi Ezɩpt soolmẽ wã n tãag rũndã.+ Rẽ n so tɩ mam da tʋmd no-rɛɛsdbã sẽn yaa m tʋm-tʋmdbã fãa yãmb nengẽ. M da tʋmd-b-la beoog sẽn vẽeg fãa. M tʋm-b-la naoor wʋsgo.*+ 26 La nin-kãensã zãgsame tɩ b kõn kelg maam ye. B pa kɩll b tʋb n kelg maam ye.+ B pʋd n diglma b sũyã,* n maan sẽn yaa wẽng n yɩɩd b yaab-rãmbã!
27 “Fo na n togs-b-la gom-kãensã fãa,+ la b pa na n kelg ye. Fo na n bool-b lame, la b pa na n sak ye. 28 Fo na n yeel-b lame yaa: ‘Ad buud ning neb sẽn pa kelg b Wẽnnaam a Zeova koɛɛga, la sẽn zãgs tɩ b kõn sak kiblgã. Ned sẽn maand sɩd pa le be ye. B pa le gomd maan sɩd yell b sʋk meng ye.’+
29 “Põng f zoobdã sẽn pa wõrsã* n lobe, la f rʋ kunkub nins zut baa fʋɩ sẽn pa yitã n yɩɩl sũ-sãang yɩɩlle,* bala a Zeova zãgsa zãmaan-kãngã sẽn yikd a sũurã, n na n daag-b n base. 30 ‘Bala Zida nebã maana sẽn yaa wẽng mam nifẽ.’ Yaa a Zeova n yeele. ‘B ninga b bõn-naandsã sẽn yaa bõn-yoodã roog ning mam yʋʋrã sẽn be a zugã pʋgẽ, sẽn na yɩl n dẽgm-a.+ 31 B mee zĩ-zãnts Tofɛt sẽn be a Hinom bi-riblã longẽ*+ wã, n na n yõogd b kom-dibli wã la b kom-pugli wã bugmẽ.+ Rẽ yaa bũmb mam sẽn pa kos-ba, la bũmb mam sẽn zɩ n tags m sũurẽ a bada.’*+
32 “A Zeova yeelame: ‘Rẽ n so tɩ daar n wat tɩ b pa na n le bool-a tɩ Tofɛte, wall t’a Hinom bi-riblã long* ye. B na n bool-a lame tɩ Kʋʋb longo. B na n muma kũ-rãmb Tofɛt hal tɩ vɩʋʋg wa pa le beẽ ye.+ 33 Nin-kãens kũ-rãmbã na n lebga bõn-yɩgdɩ wã sẽn yɩgd yĩngrã ne tẽngã we-rũmsã rɩɩbo, tɩ ned kae n na n yɛɛs-b tɩ b loog ye.+ 34 Zida tẽnsã pʋsẽ la Zerizalɛm soayã zutu, mam na n kɩtame tɩ kɩdeng la sũ-noog rãamd sa, la m kɩt tɩ pʋg-paal ne pʋg-paal sɩd koɛɛg ra le zĩnd ye.+ Bala b na n kɩtame tɩ soolmã lebg raboogo.’”+