Koɛɛg soab sebre

9 Dẽ, mam tagsa bõn-kãensã fãa yell neere, n kʋmb n yeel tɩ nin-tɩrsã ne yam dãmbã la b tʋʋmã fãa bee Wẽnnaam nugẽ.+ Ninsaalbã pa mi neb nins sẽn deng bãmb n zĩndã sẽn da nong taab wall b kis taab to-to ye. 2 B fãa baasg yaa yembre:+ Nin-tɩrsã ne nin-wẽnsã,+ sẽn yaa-b sõma, sẽn yaa-b yɩlem la sẽn pa-b yɩlma, sẽn maand-b maand la sẽn pa maand-b maandã. Nin-sõng ne yel-wẽn-maand fãa yaa yembre. Sẽn wẽend-a ne sẽn gũusd-a n pa rat n wẽen fãa yaa yembre. 3 Ad bũmb a ye sẽn maand tẽngã zug* ka tɩ sãamd sũuri: B fãa baasg sẽn yaa yembrã yĩnga,+ ninsaalbã sũy pida ne wẽnga. Gãeemd n be b sũyẽ wã b vɩɩmã sasa, la rẽ poore, b maanda kaalem.

4 Ned ning fãa sẽn ket n vɩ tara saagre. Bala baag sẽn vɩ sãoo gɩgemd sẽn ki.+ 5 Bala nin-vɩɩsã miime tɩ b na n kiime,+ la sẽn ki-bã pa mi baa fʋɩ ye.+ B leb n pa tar keoore, bala b yĩma b yell fasɩ.+ 6 Sẽn paase, b nonglmã, b kisgrã la b sũ-kiirã zoe n saame. B pa le tõe n maan bũmb nins sẽn maand tẽngã zug ka wã ye.+

7 Kẽng n tɩ rɩ f rɩɩbã ne kɩdengo, la f yũ f divẽ wã ne sũ-noogo.+ Bala Wẽnnaam sũur zoe n nooma ne fo tʋʋmã.+ 8 Bɩ fo futã kell n yɩ peels* wakat fãa, la ra bas f zug kaam sõogr ye.+ 9 Noog f sũur ne f pʋg-nongrã,+ fo vɩɩmã sẽn ka yõodã Wẽnnaam sẽn kõ foo tẽngã zug ka wã fãa sasa, fo vɩɩmã sẽn ka yõodã fãa sasa. Bala yaa rẽ la fo pʋɩɩr vɩɩmã pʋgẽ, la f tʋʋm-toogã fãa fo sẽn namsd n tʋmd tẽngã zugã yĩnga.+ 10 Bũmb ning fo nugã sẽn tõe n maane, bɩ f maan ne f pãngã fãa. Bala tʋʋmd bɩ magbo, wall bãngr bɩ yam pa be Yaoogẽ* wã,+ zĩig ning fo sẽn dabdã ye.

11 Mam leb n yãa bũmb a to tẽngã zug ka: Pa sẽn tʋʋl-bã n tõogd zoees wakat fãa, la pa sẽn tar-b pãngã me n tõogd zabr wakat fãa ye.+ Pa yam soab n paamd rɩɩb wakat fãa, pa sẽn tar-a bãngr me n paamd arzɛk wakat fãa ye.+ Leb n pa sẽn tar-b minimã yɛl n yãkd neng wakat fãa ye.+ Bala wakat buud fãa, yel-lingdem tiigd n paamda b fãa. 12 Bala ninsaal pa mi wakat ning yel-beed sẽn na n paam-a ye.+ Wa b sẽn yõgd zĩm ne gãmbr to-to, la b yõgd liuuli ne bẽdg to-to wã, woto me, yel-beed tiigd n paamda ãdem-biisã wa b sẽn lʋɩ bẽdgẽ.

13 Ad bũmb a to mam sẽn gũus n yã yamã wɛɛngẽ tẽngã zug ka, la yaa bõn-kãseng hal wʋsgo: 14 Tẽn-bil n da be t’a nebã sõor paoodẽ, tɩ rĩm sẽn tar pãng wa me lal-kẽeng n gũbg-a, n na n zab ne-a. 15 Rao a ye n da be tẽngã pʋg n yaa naong soaba, n yaool n tar yam. A yamã yĩnga, a fãaga tẽngã. La ned baa a ye pa tẽeg naong soabã yell ye.+ 16 Rẽ la mam tags m sũurẽ tɩ yam sãoo pãnga.+ La b sãbsda naong soab yam, n pa reegd a goam ye.+

17 Fo sẽn deegd yam soab goam a sẽn maag a yĩng n togse, n são f sẽn kelgd ned sẽn dɩt naam yalemb sʋk porbo.

18 Yam sãoo zab-teedo, la yel-wẽn-maand a yembr bal tõe n sãama bõn-sõma wʋsgo.+