Yikr sebre
15 Wakat kãnga, a Moyiiz ne Israyɛll nebã yɩɩla yɩɩll n pẽg a Zeova, n yeele:+
“Bas-y tɩ m yɩɩl n pẽg a Zeova, bala yẽ paama waoogr wʋsgo.+
A loba wed-moaagã ne ned ning sẽn zao a zugã mogrã pʋgẽ.+
2 A Zah* yaa mam pãng la m tõogo, bala a lebga mam fãagda.+
A yaa mam Wẽnnaam, tɩ mam na n pẽg-a.+ A yaa mam ba wã Wẽnnaam,+ la mam na n waoog-a lame.+
3 A Zeova yaa zabr gãndaoogo.+ Yẽ yʋʋrã yaa a Zeova.+
4 A loba a Farawõ saar-dãmbã* ne a tãb-biisã mogrã pʋgẽ.+
A tãb-biis nins sẽn mi zabrã bõra Mog-miuugẽ wã.+
5 Ko-pɛmã luda bãmba. B bõra zĩ-zulumsẽ wã wa kugri.+
6 Zeova, yãmb nug-rɩtgã tara pãng wʋsgo.+
Zeova, yãmb nug-rɩtgã tõe n bedsa bɛya.
7 Yãmb pãn-kãsengã maasem yĩnga, yãmb tõe n loba sẽn yikd-b n na n zab ne yãmbã tẽnga.+
Yãmb tʋmda y sũ-kãbrã, t’a rɩt-b wa moodo.
8 Pemsem sẽn yi yãmb yõ-bogdẽ wã kɩtame tɩ ko-rãmbã tigim taaba.
B yalsa selle, n gãd ko-wĩisã.
Ko-pɛmã gũsa mogrã tẽn-sʋka.*
9 Bɛyã yeelame: ‘Mam na n pʋgl-b lame! Mam na n paam-b lame!
Mam na n pʋɩɩ te-zɛɛdem hal tɩ wa sek maam!*
Mam na n wõoga m sʋʋgã! Mam nugã na n tõog-b lame!’+
10 Yãmb fʋʋsa y pemsmã, tɩ mogrã lud-ba.+
B bõra wa namd ko-kãsemsã pʋsẽ.
11 Zeova, ãnda n yaa wa yãmb wẽnnaam-dãmbã sʋka?+
Ãnda n yaa wa yãmba, n wilgd sõmblem wʋsgo?+
Yãmb n yaa soab ning sẽn zems tɩ b zoe la b yɩɩl n pẽge, soab ning sẽn maand yel-soalmã.+
12 Yãmb tẽega y nug-rɩtgã, tɩ tẽngã vel-ba.+
13 Yãmb maan-neerã pʋgẽ, yãmb lʋɩɩ neb nins yãmb sẽn fãagã taoore.+
Ne yãmb pãngã, yãmb na n tall-b lame n kẽng yãmb tẽn-sõngẽ wã.
Neb nins sẽn be Kanaã wã fãa na n komsa raoodo.+
16 Rabeem-kãseng n na n yõk-ba.+
Zeova, yãmb kangã sẽn tar pãng wʋsgã yĩnga, bãmb na n paa zĩ-yɛng wa kugri,
hal tɩ yãmb nin-buiidã looge,
17 Yãmb na n tall-b lame n tɩ zĩnig tãng ning sẽn yaa yãmb n so wã zugu.+
Zeova, yaa zĩig ning yãmb sẽn yãk n segl y meng yĩng n na n zĩndã.
Zeova, yaa wẽnd-doog ning yãmb nusã sẽn yẽbgã.
18 A Zeova na n dɩɩ naam wakat sẽn kõn sa yĩnga.+
19 A Farawõ wed-moosã ne a zabr saar-dãmbã n paas a wed-rʋʋdbã sẽn wa n kẽ mogrã pʋgẽ wã,+
a Zeova kɩtame tɩ mogrã koom lebg n sig b zutu.+
La Israyɛll nebã kẽna tẽn-koɛɛng zug n pasg mogrã tẽn-sʋka.”+
20 Dẽ, no-rɛɛs-poak a Miryam sẽn yaa a Aarõ tãoã rɩka bembengo,* tɩ pagbã fãa pʋgd-a n wẽed bembend la b saoodẽ. 21 A Miryam ra reesda rapã yɩɩllã n yetẽ:
“Yɩɩl-y n pẽg-y-yã a Zeova, bala a paama waoogr wʋsgo.+
A loba wed-moaagã ne ned ning sẽn zao a zugã mogrã pʋgẽ.”+
22 Rẽ poore, a Moyiiz talla Israyɛll nebã tɩ b yi Mog-miuugẽ wã, n dɩk Suur we-raoogã sore. B kẽna rasem a tãab we-raoogẽ wã, la b pa yã koom ye. 23 B wa n taa Maara,*+ la b ra pa tõe n yũ Maara koomã ye. Bala a ra yaa toogo. Yaa rẽ yĩng la b sẽn pʋd zĩigã tɩ Maara wã. 24 Dẽ, nin-buiidã sɩngame n yẽgemd ne a Moyiiz+ n yetẽ: “Yaa bõe la tõnd na n yũ?” 25 A Moyiiz zẽka a koɛɛg n bool a Zeova,+ t’a Zeova wilg-a tɩɩga. A sẽn lob-a koomã pʋgẽ wã, koomã lebga noogo.
Zĩ-kãnga, Wẽnnaam lugla noor b yĩnga, la bũmb b sẽn na n tikd n kaood bʋʋdo. Be, Wẽnnaam mak-b lame.+ 26 A yeelame: “Yãmb sã n kelg yãmb Wẽnnaam a Zeova koɛɛgã neere, n maan sẽn yaa tɩrg a nifẽ, n tũ a noyã la y sak a tõodã fãa,+ mam pa na n kɩt tɩ bãas nins m sẽn lob Ezɩpt nebã baa a ye yõk-y ye.+ Bala yaa maam a Zeova n sãoogd yãmba.”+
27 B wa n taa Elim. Ko-bunds piig la a yiib la koms pis-yopoe n da be be. Dẽ, b tilga b sik-zĩigã be, koomã noore.