Zeremi sebre

26 A Zoziyas biig a Zowakim+ sẽn yaa Zida rĩmã naamã sɩngrẽ, a Zeova goma ne a Zeremi: 2 “Ad a Zeova sẽn yeele: ‘Tɩ yaas a Zeova roogã samandẽ wã, n gom ne Zida tẽnsã neb nins fãa sẽn wat n waoogd* a Zeova ro-kãngã pʋgẽ wã. Togs-b bũmb ning fãa mam sẽn na n yeel foomã. Ra bas baa gom-yɛng ye. 3 Tõe tɩ b na n kelgame, tɩ b ned kam fãa bas a manesem-wẽnga. Woto, mam na n toeema yam* yel-beedã mam sẽn dat n kɩt tɩ wa b zut b tʋʋm-wẽnsã yĩngã wɛɛngẽ.+ 4 Yeel-b yaa: “Ad a Zeova sẽn yeele: ‘Yãmb sã n pa kelg maam n tũ tõogã* mam sẽn kõ yãmbã, 5 la y pa kelg no-rɛɛsdbã sẽn yaa mam tʋm-tʋmdbã goamã, mam sẽn tʋmd b rãmb yãmb nengẽ n yɩlemdẽ* tɩ y pa kelgdẽ wã,+ 6 mam na n kɩtame tɩ ro-kãngã lebg wa Sɩlo,+ la m sãam tẽn-kãngã, tɩ dũniyã buud toɛy-toɛyã fãa sã n na n kãab wẽnga, bɩ b pʋd a yʋʋrã.’”’”+

7 Maan-kʋʋdbã, no-rɛɛsdbã la nin-buiidã fãa ra kelgda a Zeremi sẽn wa n togsd gom-kãensã a Zeova roogẽ wã.+ 8 A Zeremi sẽn wa n togs goam nins fãa a Zeova sẽn yeel t’a taas nin-buiidã n sa wã, maan-kʋʋdbã, no-rɛɛsdbã la nin-buiidã yõk-a lame, n yeele: “Hakɩɩka, fo na n kiime. 9 Bõe yĩng tɩ fo togs bãngr-gomd ne a Zeova yʋʋre, n yeel tɩ ‘ro-kãngã na n lebga wa Sɩlo, la tɩ b na n sãama tẽn-kãngã tɩ ned pa le be a pʋgẽ’?” Dẽ, nin-buiidã fãa gũbga a Zeremi a Zeova roogẽ wã.

10 Zida nanambsã sẽn wʋm gom-kãensa wã, b yii rĩmã zakẽ* n wa a Zeova roogẽ wã, n tɩ zĩnd a Zeova rigno-paallẽ wã.+ 11 Maan-kʋʋdbã ne no-rɛɛsdbã yeela nanambsã la nin-buiidã fãa yaa: “Ra-kãngã segda ne kũum,+ bala a togsa bãngr-goam n yeel tɩ b na n sãama tẽn-kãngã, wa yãmb mens tʋbã sẽn wʋmã.”+

12 Dẽ, a Zeremi yeela nanambsã ne nin-buiidã fãa yaa: “Yaa a Zeova n tʋm maam tɩ m togs goam nins fãa yãmb sẽn wʋmã, n wilg tɩ b na n sãama ro-kãngã ne tẽn-kãngã.+ 13 Woto wã, maneg-y y manesmã la y tʋʋm-tʋmdɩ wã, n sak yãmb Wẽnnaam a Zeova koɛɛgã. Dẽ, a Zeova na n toeema yam* yel-beed ning a sẽn yeel t’a na n kɩtame tɩ wa yãmb zutã wɛɛngẽ.+ 14 La sã n yaa ne maam, mam bee yãmb nusẽ. Maan-y maam bũmb ning fãa y sẽn tagsd tɩ yaa sõma la tɩrga. 15 Bãng-y bal tɩ y sã n kʋ maam, y na n kɩtame tɩ bʋʋm soab zɩɩm taal zĩnd y mensã zutu, tẽn-kãngã la a nebã zutu. Bala sɩd-sɩda, yaa a Zeova n tʋm maam tɩ m wa togs-y gom-kãensã fãa.”

16 Rẽ la nanambsã ne nin-buiidã fãa yeel maan-kʋʋdbã la no-rɛɛsdbã yaa: “Ra-kãngã pa segd ne kũum ye. Bala yaa ne tõnd Wẽnnaam a Zeova yʋʋr la a gom ne tõndo.”

17 Sẽn paase, soolmã kãsem-dãmb kẽer yikame, n sɩng goam n yeel nin-buiidã fãa sẽn tigmã yaa: 18 “Moresɛt rao a Mise+ togsa bãngr-goam Zida rĩm a Ezekɩyaas+ wakatẽ wã, n yeel Zida nebã fãa yaa: ‘Ad a Zeova sẽn yaa tãb-biis naabã sẽn yeele:

19 “Zida rĩm a Ezekɩyaas ne Zida nebã fãa kʋ-a-la rẽ yĩng bɩ? Rĩmã pa zoe a Zeova n kos a Zeova t’a zoe b nimbãanega, t’a Zeova toeem yam* yel-beed ning a sẽn da yeel t’a na n kɩtame tɩ wa b zutã wɛɛngẽ sɩda?+ Tõnd na n maaname tɩ yel-be-kãseng wa tõnd mens* zutu.

20 “Rao a to me n da togsd bãngr-goam ne a Zeova yʋʋre. Yaa a Semaya biig a Uuri sẽn yit Kiryat-yeyarimmã.+ A ra togsda goam sẽn wõnd a Zeremi goamã, n yetẽ tɩ b na n sãama tẽn-kãngã la soolem-kãngã. 21 Rĩm a Zowakim+ ne a gãndaadã la a nanambsã fãa wʋma a goamã. La rĩmã baoome n na n kʋ-a.+ A Uuri sẽn wʋm dẽ wã, zĩig pʋgẽ rabeem yõk-a lame t’a zoe n kẽng Ezɩpti. 22 Dẽ, rĩm a Zowakim tʋma a Akboor biig a Ɛlnatan+ ne neb a taab tɩ b kẽng Ezɩpti. 23 B tɩ talla a Uuri Ezɩpt n wa kõ rĩm a Zowakim t’a kʋ-a ne sʋʋga,+ n dɩk a kũumã n lob nin-buiidã yaadẽ.”

24 La a Safan+ biig a Ahikam+ sõnga a Zeremi, tɩ b pa rɩk-a n ning nin-buiidã nusẽ tɩ b kʋ-a ye.+