Ezekɩyɛll sebre

13 A Zeova le goma ne maam n yeel yaa: 2 “Ninsaal biiga, togs bãngr-goam n ning Israyɛll no-rɛɛsdbã taale,+ la f yeel neb nins sẽn naand b toorẽ bãngr-goamã*+ yaa: ‘Kelg-y-yã a Zeova goamã. 3 Ad a Zeova sẽn yaa Zu-soab sẽn ka to wã sẽn yeele: “Toog bee ne no-rɛɛsdb nins sẽn yaa yalembã sẽn tũud b mens tagsgo, n yaool n pa yã baa fʋɩ wã!+ 4 Foom a Israyɛlle, fo no-rɛɛsdbã lebga wa waas* sẽn be raboodẽ. 5 Yãmb a no-rɛɛsdbã pa na n kẽng kugã lalsã sẽn sãam zĩis ninsã, n tɩ lebs n me Israyɛll buudã yĩnga,+ sẽn na yɩl tɩ Israyɛll tõog n kell n zab a Zeova daarã daar ye.”+ 6 “Neb nins sẽn yet t’a ‘Zeova yeelame yaa,’ t’a Zeova meng yaool n pa tʋm-bã yãa zirẽ-be-vẽnegr toor-toore, la b togs ziri, n gũudẽ tɩ b goamã pidsi.+ 7 Yãmb sã n yeele: ‘A Zeova yeelame yaa,’ tɩ mam yaool n pa yeel bũmbu, pa zirẽ-be-vẽnegr la y sẽn yã wã, la ziri la y sẽn togsdã sɩda?”’

8 “‘Woto wã, ad a Zeova sẽn yaa Zu-soab sẽn ka to wã sẽn yeele: “‘Yãmb sẽn togs ziri, tɩ y vẽnegr toor-toorã me yaa ziri wã yĩnga, mam na n zaba ne yãmba.’ Yaa a Zeova sẽn yaa Zu-soab sẽn ka to wã n yeele.”+ 9 Mam na n tẽega m nug n sɩbg no-rɛɛsdb nins vẽnegr sẽn yaa ziri, la sẽn togsd ziri wã.+ B pa na n zĩnd neb nins mam sẽn togsd m sũur koɛɛgã sʋk ye. B pa na n gʋls b yʋyã Israyɛll buudã sebrẽ ye. B pa na n lebg n leb Israyɛll soolmẽ wã ye. Woto, yãmb na n bãngame tɩ mam yaa a Zeova sẽn yaa Zu-soab sẽn ka to wã.+ 10 Woto fãa yaa b sẽn menesd mam nebã n yet-b yaa: “Laafɩ beeme!” tɩ laafɩ yaool n kae ye.+ Ned sã n me lal-faoogo, b bolgd-a-la ne goor sẽn yaa pɛɛlga.’*+

11 “Yeel sẽn bolgd-b lalgã ne goor sẽn yaa pɛɛlgã t’a na n lʋɩɩme. Sa-kẽeng n na n ni, tɩ sapɩlem dʋʋge,* tɩ sob-kãsems tus-a n lubi.+ 12 Lalgã sã n wa lʋɩ, nebã na n soka yãmb yaa: ‘Bũmb ning yãmb sẽn tall n bolg-a wã bɛɛ?’+

13 “Woto wã, ad a Zeova sẽn yaa Zu-soab sẽn ka to wã sẽn yeele: ‘Mam na n kɩtame tɩ sob-kãsems fugi, la m kɩt tɩ sa-kẽeng ni, mam sũurã sẽn puugã yĩnga. Mam na n kɩtame tɩ sapɩlem sãam lalgã, bala mam sũurã yika wʋsgo. 14 M na n wãa lalg ning yãmb sẽn bolg ne goor sẽn yaa pɛɛlgã, la m tus-a n lubi. A yẽbgrã na n pukame. Tẽngã sã n wa na n lʋɩ, yãmb na n sãama a pʋgẽ. Woto, yãmb na n bãngame tɩ mam yaa a Zeova.’

15 “‘Mam sã n wa kiig m sũ-puugrã zãng lalgã zugu, la neb nins sẽn bolg-a ne goor sẽn yaa pɛɛlgã zugu, mam na n yeela yãmb yaa: “Lalgã pa le be, neb nins sẽn da bond-a wã me pa le be ye.+ 16 Israyɛll no-rɛɛsdbã pa le be ye. Yaa neb nins sẽn da togsd bãngr-goam Zerizalɛm wɛɛngẽ, la sẽn da yãt vẽnegr toor-toor sẽn wilgd t’a na n paama laafɩ, tɩ laafɩ yaool n ka be wã.”’+ Yaa a Zeova sẽn yaa Zu-soab sẽn ka to wã n yeele.

17 “Sã n yaa ne foom a ninsaal biiga, wẽnemd f neng n tees fo buudã kom-pugli wã sẽn naand b toorẽ bãngr-goamã, n togs bãngr-goam n ning-b taale. 18 Yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Toog bee ne pagb nins sẽn sẽt pɛɛl kamsã fãa yĩnga,* la sẽn maand zug-fut zu-bɛd la zu-bõoneg yĩnga, sẽn na yɩl n bẽd neb vɩɩm* n yõgã! Yãmb bẽta mam nebã vɩɩm* sẽn na yɩl n kogl y mens vɩɩm* la? 19 Orz* nug-pidung yĩng la bur-gɩrs yĩnga, yãmb na n sãama mam yʋʋrã m nin-buiidã sʋka,+ n kʋʋd neb* nins sẽn pa segd ne kũumã, la y basd neb* nins sẽn segd ne kũumã tɩ b ket n vɩ bɩ? Yãmb maanda woto, y sẽn togsd mam nin-buiidã ziri tɩ b kelgdẽ wã yĩnga.”’+

20 “Woto wã, ad a Zeova sẽn yaa Zu-soab sẽn ka to wã sẽn yeele: ‘Yãmb a pagba, mam kisa yãmb pɛɛlã y sẽn tar n bẽt neb n yõgd wa b yaa liuuli wã. M na n pãrs-b-la y kamsẽ wã, la m fãag neb nins y sẽn bẽt n yõgd wa liuuli wã. 21 Mam na n pãrsa yãmb zug-futã, la m fãag m nin-buiidã y nusẽ. B pa na n le yɩ bũmb y sẽn digd n yõgd ye. Woto, yãmb na n bãngame tɩ mam yaa a Zeova.+ 22 Bala yãmb komsa nin-tɩrg raood ne y ziri wã,+ tɩ mam yaool n da pa kɩt t’a paam toogo, la y paas nin-wẽng pãnga,+ sẽn na yɩl t’a ra bas a manesem-wẽngã n kell n vɩɩmd ye.+ 23 Woto wã, yãmb a pagbã pa na n le yã zirẽ-be-vẽnegre, la y bʋg bagr ye.+ Mam na n fãaga m nin-buiidã y nusẽ. Woto, yãmb na n bãngame tɩ mam yaa a Zeova.’”