Kibayã pipi sebre

23 A Davɩɩd sẽn wa n kʋʋl n kolg kũumã, a yãka a biig a Salomo t’a lebg Israyɛll rĩma.+ 2 A tigma Israyɛll nanambsã fãa ne maan-kʋʋdbã+ la Levi buudã nebã.+ 3 B sõda Levi buudã rap nins sẽn da tar yʋʋm pis-tã la sẽn yɩɩd rẽ wã,+ n mik tɩ b sõorã yaa bãmb tus-pis-tã la a nii. 4 Bãmb sʋkã, b yãka neb tus-pisi la a naas tɩ b ra get a Zeova roogã tʋʋmd yelle, tɩ bãmb tus a yoob ra yaa taoor dãmb la bʋ-kaoodba.+ 5 Bãmb tus a naas n da yaa rigno-gũudba,+ tɩ tus a naas ra pẽgd+ a Zeova ne yʋʋm-teed nins wɛɛngẽ a Davɩɩd sẽn da yeele: “Mam maan-b-la Wẽnnaam pẽgr yĩnga.”

6 A Davɩɩd welga bãmb sull-sull+ wa sẽn zems a Levi kom-dibli wã roto: Yaa a Gɛrson ne a Kehat la a Merari.+ 7 A Gɛrson kom-dibli yɩɩ a Ladan ne a Simeyi. 8 A Ladan kom-dibli wã yɩɩ a Yeyiyɛll sẽn yaa taoor soabã, ne a Zetam la a Zowɛlle.+ Bãmb b tãabo. 9 A Simeyi kom-dibli yɩɩ a Selomot ne a Haziyɛll la a Haran. Bãmb b tãabo. Bãmbã n da yaa a Ladan roogã taoor dãmba. 10 A Simeyi kom-dibli wã yɩɩ a Yahat, a Zina ne a Yewuus la a Beriya. Bãmb b naasã n da yaa a Simeyi kom-dibli. 11 A Yahat n da yaa taoor soaba, t’a Ziza yaa yiib-n-soaba. La a Yewuus ne a Beriya sẽn pa paam kom-dibli wʋsgã yĩnga, b sõdga bãmb wa roog a yembre, n kõ-b tʋʋm-yɛnga.

12 A Kehat kom-dibli wã yɩɩ a Amram, a Izehaar+ ne a Ebrõ la a Uziyɛll.+ Bãmb b naase. 13 A Amram kom-dibli yɩɩ a Aarõ+ ne a Moyiiz.+ La b welga a Aarõ toor+ tɩ yẽ ne a kom-dibli wã segd n get Zĩ-sõng sẽn yɩɩdã yelle, n maand maand a Zeova taoore, n tʋmd a tʋʋmã, la b ningd nin-buiidã bark daar fãa Wẽnnaam yʋʋr yĩnga.+ 14 La sã n yaa ne Wẽnnaam dao a Moyiiz kom-dibli wã, b sõd-b lame n naag Levi buudã. 15 A Moyiiz kom-dibli wã yɩɩ a Gɛrsom+ ne a Eliyezɛɛr.+ 16 A Gɛrsom kom-dibli wã taoor soab yɩɩ a Sebuwɛll.+ 17 A Eliyezɛɛr yagensã* taoor soab yɩɩ a Rehabiya.+ A Eliyezɛɛr pa paam kom-dibli a taab ye. La a Rehabiya paama kom-dibli wʋsgo. 18 A Izehaar+ kom-dibli wã taoor soab yɩɩ a Selomit.+ 19 A Ebrõ kom-dibli yɩɩ a Yeriya sẽn da yaa taoor soabã, a Amariya sẽn yaa yiib-n-soabã, a Yahaziyɛll sẽn yaa tãab-n-soabã, la a Yekameyam+ sẽn yaa naas-n-soabã. 20 A Uziyɛll+ kom-dibli yɩɩ a Mise sẽn da yaa taoor soabã, t’a Isiya yaa yiib-n-soabã.

21 A Merari kom-dibli yɩɩ a Mali ne a Musi.+ A Mali kom-dibli yɩɩ a Eleazaar ne a Kis. 22 A Eleazaar kiime n pa paam kom-dibli ye. Yaa kom-pugli bala. Woto, a Kis kom-dibli wã sẽn yaa a kom-pugli wã roagdbã* peeg-b lame n maan b pagba. 23 A Musi kom-dibli wã yɩɩ a Mali ne a Edɛɛr la a Yeremot. Bãmb b tãabo.

24 Bãmbã n yɩ Levi buudã roto, wa sẽn zems b buudã rot taoor dãmba. B sõda Levi buudã neb nins sẽn da tar yʋʋm pisi la sẽn yɩɩd rẽ wã, n gʋls b yʋyã sõdgã sebr pʋgẽ. Yaa bãmb n da get a Zeova roogã tʋʋm yelle. 25 Bala a Davɩɩd ra yeelame yaa: “Israyɛll Wẽnnaam a Zeova kõo a nin-buiidã vʋʋsgo,+ la Wẽnnaam na n zĩnda Zerizalɛm wakat fãa.+ 26 Sẽn paase, Levi buudã nebã pa na n le tʋkd sɛk-roogã wall a teoog baa a ye Wẽnnaam tʋʋmdã yĩng ye.”+ 27 Wa sẽn zems a Davɩɩd yaoolem koeesã, b sõda Levi buudã neb nins sẽn da tar yʋʋm pisi la sẽn yɩɩd rẽ wã. 28 B tʋʋmd ra yaa sõng a Aarõ+ kom-dibli wã ne a Zeova roogã tʋʋmde, la b ges samanã+ ne rɩɩbã rot yelle. B ra segdame me n yɩlg bũmb ning fãa sẽn yaa sõngo, la b tʋm tʋʋmd ning fãa b sẽn segd n tʋm Wẽnnaam roogẽ wã. 29 B ra sõngd n geta burã b sẽn dogend taab zugã* yelle,+ zom-bãanegã b sẽn tar n maand kood biis kũunã, bur-pakls sẽn pa ning rabɩllã,+ burã b sẽn kɩɩm koɛɛng ne powallã, zom-nagdgã,+ la b get bũmb fãa waooglem la a yalem makr yelle. 30 Bãmb da wata yibeoog ne zabr fãa n pʋʋsd a Zeova bark la b pẽgd-a.+ 31 Sẽn da yaa wakat ning fãa la b segd n maan maoong sẽn yõogd bugum n kõ a Zeova vʋʋsg daarã sasa,+ bãmb da sõngdame. B ra maanda woto me ki-paalã+ ne tig toɛy-toɛyã wakate.+ B sõorã ra zemsa noy nins b sẽn gãneg bãmb wɛɛngẽ wã. La b ra tʋmda b tʋʋmdã wakat fãa a Zeova taoore. 32 B leb n da tara tʋʋm b sẽn segd n tʋm sɛk-roogẽ wã ne zĩ-sõngẽ wã, la b ra sõngd a Aarõ kom-dibli wã sẽn yaa b ba-biisã n tʋmd a Zeova roogã tʋʋma.