Ezekɩyɛll sebre
31 Yʋʋm piig la a ye soabã, kiuug a tãab-n-soabã pipi daarã, a Zeova le goma ne maam n yeele: 2 “Ninsaal biiga, yeel Ezɩpt rĩm a Farawõ ne a tãb-biisã+ yaa:
‘Ãnda n yaa kãseng n zem foo?
3 Asiiri ned n da be, n yaa wa Libã sɛɛdr tɩɩg
sẽn tar wil sẽn yaa neeba, la sẽn tar maasem wa kãgre. A ra luga wʋsgo.
A zugã ra tata sawatã.
4 Koomã kɩtame t’a lebg bedre. Kʋɩlsã ko-zulumsã kɩtame t’a lebg woko.
Kʋɩls n da gũbg zĩig ning b sẽn sel-a wã.
B ko-soayã koomã ra tata weoogã tɩɩs fãa.
5 Yaa rẽ yĩng la a sẽn lug n yɩɩd weoogã tɩɩsã fãa wã.
A wilã lebga wʋsg la wogdo,
a kʋɩlsã koom sẽn yaa wʋsgã yĩnga.
6 Liuuli wã fãa sẽn yɩgd yĩngrã ra tɩʋta b tʋgd a wilẽ wã.
Weoogã rũms fãa ra rogda a wilã tẽngre.
Buud nins neb sẽn yaa wʋsgã fãa ra zĩi a maasmẽ wã.
7 A neermã la a wilã sẽn yaa wogdã kɩtame t’a ra tar ziiri,
bala a yẽgã tãoome n ta koom wʋsg zĩigẽ.
8 Wẽnnaam zẽedã zĩigẽ+ sɛɛdr tɩɩg baa a ye ra pa tõe n mak a meng ne-a ye.
Zenevirie tɩɩg baa a ye ra pa tar wil sẽn yaa wa a wilã ye.
Palatan tɩɩg baa a ye ra pa tar wil sẽn yaa wa a wilã ye.
Wẽnnaam zẽedã zĩigẽ tɩɩg baa a ye neerem ra pa ta-a ye.
9 Mam da kɩtame t’a lebg neere, n tar vãad wʋsgo.
Edɛn tɩɩs a taabã fãa, rat n yeel tɩ Wẽnnaam zẽedã zĩigẽ tɩɩsã ra maanda sũ-kiir ne-a.’
10 “Woto wã, ad a Zeova sẽn yaa Zu-soab sẽn ka to wã sẽn yeele: ‘A* sẽn lebg wok wʋsgo, n zẽkd n tat sawatã yĩnga, n paas a sũurã sẽn pid ne wuk-m-meng a woglmã yĩngã, 11 mam na n dɩk-a lame n ning naab ning sẽn tar pãng wʋsg n dɩt naam buud toɛy-toɛy zugã nugẽ.+ Sãmbg sẽn kae, a na n zaba ne-a. Mam na n daag-a lame n bas a wẽnemã yĩnga. 12 Sãamb n na n kɛ-a n lubi. Yaa buud ning neb sẽn yaa toos n yɩɩdã. B na n bas-a-la tãensã zutu, t’a vãadã sʋʋg londã fãa pʋsẽ. A wilã na n kao n lʋɩɩ soolmã kʋɩlsã fãa pʋsẽ.+ Tẽngã buud toɛy-toɛyã neb na n yii a maasmẽ wã, n daag-a n base. 13 Liuuli wã sẽn yɩgd yĩngrã fãa na n zaoonda tɩɩgã sẽn lʋɩ wã zugu, tɩ weoogã rũmsã fãa zĩnd a wilã zutu.+ 14 Yaa sẽn na yɩl tɩ tɩɩg baa a ye sẽn pẽ koom ra wa lebg wok wʋsgo, wall a zugã zẽk n ta sawatã, la tɩ tɩɩg baa a ye sẽn paamd koom sõma ra tõog n zẽk t’a woglmã ta sawatã ye. Bala tɩɩsã fãa na n kiime. B na n siga tẽngã zĩ-zulungẽ wã wa neb nins sẽn ki wã.’
15 “Ad a Zeova sẽn yaa Zu-soab sẽn ka to wã sẽn yeele: ‘Daar ning a sẽn na n sig Yaoogẽ* wã, mam na n kɩtame tɩ b yãb kʋʋre. Rẽ n so tɩ mam na n lud ko-zulumsã, la m gãd a kʋɩlsã sẽn na yɩl tɩ koomã sẽn yaa wʋsgã yaase. Yẽnda yĩnga, mam na n kɩtame tɩ Libã soolmã lebg lika. Weoogã tɩɩs fãa na n kʋɩɩme. 16 A lʋɩɩsã rãamd sã n wa yi, mam na n kɩtame tɩ buud toɛy-toɛyã neb rigi, mam sã n wa kɩt tɩ yẽ ne neb nins sẽn sigd bokẽ wã* sig Yaoogẽ* wã. Woto, Edɛn tɩɩsã fãa,+ Libã tɩɩs nins sẽn yaa neeb la sõma n yɩɩdã, tɩɩs nins fãa sẽn paamd koom sõma wã na n paama belsg tẽngã zĩ-zulungẽ wã. 17 B naag-a lame n sig Yaoogẽ* wã, n tɩ bʋʋg neb nins b sẽn kʋ ne sʋʋsã.+ Yaa yẽ ne a tɛɛndbã* sẽn yit buud toɛy-toɛyã sʋka, la sẽn da be a maasmẽ wã.’+
18 “‘Edɛn tɩ-bʋg n da tar ziir la a yaa kãseng wa foo?+ La sɩd-sɩda, b na n kɩtame tɩ foo ne Edɛn tɩɩsã sig tẽngã zĩ-zulungẽ wã. Fo na n gãanda sẽn pa kẽ-b bãongã sʋka, neb nins b sẽn kʋ ne sʋʋsã sʋka. Bõn-kãngã n na n paam a Farawõ ne a tãb-biisã fãa.’ Yaa a Zeova sẽn yaa Zu-soab sẽn ka to wã n yeele.”