Ezekɩyɛll sebre

20 Yʋʋm a yopoe-n-soabã kiuug a nu soabã rasem piigã daare, Israyɛll kãsem-dãmb kẽer wa n zĩnda mam taoore, n na n sok a Zeova bũmbu. 2 Dẽ, a Zeova goma ne maam n yeel yaa: 3 “Ninsaal biiga, gom ne Israyɛll kãsem-dãmbã n yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb waame n na n sok maam bũmb la? ‘Mam wẽenda ne m meng tɩ m pa na n leok y sokrã ye.’+ Yaa a Zeova sẽn yaa Zu-soab sẽn ka to wã n yeele.”’

4 “Fo segl n saame n na n kao b bʋʋd bɩ? Ninsaal biiga, fo segl n saame n na n kao b bʋʋd bɩ? Kɩt tɩ b bãng bõn-wẽns nins b yaab-rãmbã sẽn maanã.+ 5 Yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Daar ning mam sẽn yãk Israyɛllã,+ mam wẽena* ne a Zakoob yagensã, la m kɩt tɩ b bãng maam Ezɩpt soolmẽ wã.+ Mam wẽename n yeel-b yaa: ‘Mam yaa yãmb Wẽnnaam a Zeova.’ 6 Baraare, mam wẽename tɩ m na n yiis-b-la Ezɩpt soolmẽ wã, n tall-b n kẽng soolem mam sẽn bao b yĩng pʋgẽ, tẽng sẽn pid ne bĩisim la sɩɩdo.+ Ra yaa soolem ning sẽn yaa neer n yɩɩd soolem a taabã fãa wã. 7 Rẽ poore, mam yeel-b lame yaa: ‘Yãmb ned kam fãa segd n loba bõn-wẽns nins sẽn be yãmb taoorã. Ra rẽgm-y y mens ne Ezɩpt bõn-naandsã sẽn yaa bõn-yoodã* ye.+ Mam yaa yãmb Wẽnnaam a Zeova.’+

8 “‘“La b kɩɩsa maam, n pa sak n na n kelg-m ye. B pa lob bõn-wẽns nins sẽn da be b taoorã ye. B pa sak n na n bas Ezɩpt bõn-naandsã sẽn yaa bõn-yoodã me ye.+ Rẽ n so tɩ mam pʋlem tɩ m na n pʋdga m sũ-puugrã b zutu, la m kiig m sũ-puugrã fãa b zut Ezɩpt soolmẽ wã. 9 La mam yõka m meng m yʋʋrã yĩnga, sẽn na yɩl tɩ m yʋʋrã ra sãam buud toɛy-toɛy nins sʋk b sẽn da be wã ye.+ Bala mam kɩtame tɩ b* bãng maam bu-kãens taoore, mam sẽn wa n na n yiis-b* Ezɩpt soolmẽ wã.+ 10 Dẽ, mam yiis-b-la Ezɩpt soolmẽ wã, n tall-b n kẽng we-raoogẽ wã.+

11 “‘“Rẽ poore, mam kõ-b-la m noyã, la m kɩt tɩ b bãng mam tõodã,+ sẽn na yɩl tɩ ned ning sẽn na n sak-b tõog n vɩɩmd bãmb maasem yĩnga.+ 12 Sẽn paase, mam kõ-b-la m vʋʋsg rayã+ tɩ yɩ bãnd maam ne bãmb sʋka,+ sẽn na yɩl tɩ b bãng tɩ yaa maam a Zeova n yaa soab ning sẽn kɩtd tɩ b lebgd sõamyã wã.

13 “‘“La Israyɛll buudã neb kɩɩsa maam we-raoogẽ wã.+ B pa sak mam noyã ye. B zãgsame tɩ b kõn tũ mam tõodã, tõod nins ned sẽn sakd n paam vɩɩm bãmb maasem yĩngã. B rẽgma mam vʋʋsg rayã fasɩ. Rẽ n so tɩ mam pʋlem tɩ m na n pʋdga m sũ-puugrã b zut weoogẽ wã, n menes-ba.+ 14 La mam yõka m meng m yʋʋrã yĩnga, sẽn na yɩl tɩ m yʋʋrã ra sãam buud toɛy-toɛyã taoore, buud nins nifẽ mam sẽn yiis-bã.*+ 15 Mam wẽena we-raoogẽ wã me tɩ m pa na n tall-b n tɩ kẽes soolem ning mam sẽn da kõ-bã pʋgẽ ye.+ Yaa tẽng sẽn pid ne bĩisim la sɩɩdo,+ n yaa neer n yɩɩd soolem a taabã fãa. 16 Yaa b sẽn zãgs tɩ b kõn tũ mam tõodã, n pa sak mam noyã, la b rẽgem mam vʋʋsg rayã yĩnga, bala b sũyã ra bee ne b bõn-naandsã sẽn yaa bõn-yoodã.+

17 “‘“La mam* zoee b nimbãanega, n pa sãam-b ye. Mam pa menes-b we-raoogẽ wã ye. 18 Mam yeela b kambã we-raoogẽ wã+ yaa: ‘Ra tũ-y y yaab-rãmbã noyã, wall y sak b tõodã,+ pa rẽ bɩ y rẽgem y mens ne b bõn-naandsã sẽn yaa bõn-yoodã ye. 19 Mam yaa yãmb Wẽnnaam a Zeova. Tũ-y mam noyã. Sak-y mam tõodã, la y tũ-ba.+ 20 Kɩt-y tɩ mam vʋʋsg rayã yɩ sõamyã,+ tɩ rẽ la b na n yɩ bãnd maam ne yãmb sʋka, sẽn na yɩl tɩ y bãng tɩ mam yaa yãmb Wẽnnaam a Zeova.’+

21 “‘“La kambã sɩnga mam kɩɩsgo.+ B pa sak mam noyã ye. B pa sak mam tõodã la b tũ-b ye. Yaa tõod nins ned sẽn sakd n paam vɩɩm bãmb maasem yĩngã. B rẽgma mam vʋʋsg rayã. Rẽ n so tɩ mam pʋlem tɩ m na n pʋdga m sũ-puugrã b zutu, la m kiig m sũ-puugrã fãa b zut we-raoogẽ wã.+ 22 La mam yõka m meng+ n pa maan bũmb m yʋʋrã yĩnga,+ sẽn na yɩl tɩ m yʋʋrã ra sãam buud toɛy-toɛyã taoore, buud nins nifẽ mam sẽn yiis-bã.* 23 Mam wẽena we-raoogẽ wã me n yeel-b tɩ m na n sãeeg-b-la buud toɛy-toɛyã sʋka, la m sãeeg-b soolem toor-toorã sʋka.+ 24 Yaa b sẽn pa sak mam tõodã, b sẽn zãgs tɩ b kõn tũ mam noyã,+ b sẽn dẽgem mam vʋʋsg rayã, la b sẽn tũ* b yaab-rãmbã bõn-naandsã sẽn yaa bõn-yoodã yĩnga.+ 25 Mam bas-b lame me tɩ b tũ noy sẽn pa sõma, la tõod sẽn pa tõe n kɩt tɩ b paam vɩɩm.+ 26 Mam bas-b lame tɩ b rẽgem b mens ne b maandã, b sẽn wa n dɩkd b kom-dẽemsã n yõogd bugmã.+ Mam maana woto sẽn na yɩl tɩ b sũyã sãam wʋsgo, tɩ b bãng tɩ mam yaa a Zeova.”’

27 “Woto wã, foom a ninsaal biiga, gom ne Israyɛll buudã neb n yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb yaab-rãmbã me maana woto n tʋʋs maam, b sẽn pa maan sɩd ne maamã yĩnga. 28 Mam tall-b lame n tɩ kẽes soolem ning m sẽn da wẽen tɩ m na n kõ-b lame wã pʋgẽ.+ B sẽn yã kunkub-zãntsã la tɩɩs nins vãad sẽn yaa wʋsgã,+ b sɩngame n maand b maandã la b kõt b kũun nins sẽn yikd mam sũurã. B ra kõta b maand sẽn tar yũ-noogã* la b pʋdgd b divẽ kũunã be. 29 Dẽ, mam sok-b lame yaa: ‘Bõe yĩng tɩ yãmb kẽngd zĩ-zãntgẽ wã? (B ket n boond-a lame tɩ Zĩ-zãntg hal n tãag rũndã.)’”’+

30 “Masã, yeel Israyɛll buudã neb yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb me rẽgemda y mens wa y yaab-rãmbã sẽn maanã, n tũud b bõn-naandsã sẽn yaa bõn-yoodã n yood ne-b* la?+ 31 Yãmb kõta y bõn-naandsã fãa sẽn yaa bõn-yoodã maando, n dɩkd y kambã n yõogd bugum, n ket n dẽgemd y mens hal n tãag rũndã la?+ Yãmb a Israyɛll buudã neba, baa ne rẽ, yãmb ket n datame tɩ mam leok yãmb sokr la?”’+

“‘Mam wẽenda ne m meng tɩ m pa na n leok y sokrã ye.’ Yaa a Zeova sẽn yaa Zu-soab sẽn ka to wã n yeele.+ 32 ‘Y sẽn wat n yetẽ: “Bɩ d lebg wa bu-zẽmsã, wa soolem a taabã rotã neb sẽn waoogd* raad la kugã,”+ bũmb ning sẽn be y yamẽ wã pa na n tol n pids ye.’”

33 “A Zeova sẽn yaa Zu-soab sẽn ka to wã yeelame: ‘Mam wẽenda ne m meng tɩ m na n dɩɩ naam y zut ne nug sẽn tar pãnga, kang sẽn tẽege, la sũ-pu-kãsenga.+ 34 Mam na n yiisa yãmb buud toɛy-toɛyã sʋka, la m tigm-y n yiis soolem nins pʋsẽ y sẽn sãeegã. Mam na n maana rẽ ne nug sẽn tar pãnga, kang sẽn tẽege, la ne sũ-pu-kãsenga.+ 35 Mam na n tall-y lame n wa buud toɛy-toɛyã we-raoogẽ wã, n kao y bʋʋd be neng ne nenga.+

36 “A Zeova sẽn yaa Zu-soab sẽn ka to wã yeelame: ‘Mam na n kaoo yãmb bʋʋd wa mam sẽn kao y yaab-rãmbã bʋʋd to-to Ezɩpt soolmã we-raoogẽ wã. 37 Mam na n kɩtame tɩ y tũ rũm-kɩɩmã rasaar tẽngr n looge,+ la m kɩt tɩ yɩ tɩlɛ tɩ y tũ kaoolã. 38 La mam na n yiisa tõatbã ne sẽn kɩɩsd-b maamã yãmb sʋka.+ Bala m na n yiis-b-la soolem ning pʋgẽ b sẽn be sãandã, la b pa na n kẽ Israyɛll soolmẽ wã ye.+ Woto, yãmb na n bãngame tɩ mam yaa a Zeova.’

39 “Sã n yaa ne yãmb a Israyɛll buudã neba, ad a Zeova sẽn yaa Zu-soab sẽn ka to wã sẽn yeele: ‘Bɩ yãmb ned kam fãa kẽng n tɩ waoog a bõn-naandsã sẽn yaa bõn-yoodã.+ La rẽ poore, y sã n pa kelg maam, yãmb maandã la y bõn-naandsã sẽn yaa bõn-yoodã pa na n le tõog n sãam mam yʋʋrã sẽn yaa sõngã ye.’+

40 “A Zeova sẽn yaa Zu-soab sẽn ka to wã yeelame: ‘Yaa mam tãn-sõngẽ wã, Israyɛll tãn-lug-lug zug+ la Israyɛll buudã neb fãa, b fãa zãng na n waoog maam soolmã pʋgẽ.+ Be, mam sũur na n yɩɩ noog ne-ba. Mam na n kɩtame tɩ y kõt y kũunã la y dẽenem biisã kũuni, y bũmb nins sẽn yaa sõamyã wã fãa.+ 41 Mam sã n wa yiis yãmb buud toɛy-toɛyã sʋka, la m tigm-y n yiis soolem nins pʋsẽ yãmb sẽn da sãeegã,+ mam sũur na n yɩɩ noog ne-yã, y maand sẽn tar yũ-noogã* yĩnga. Mam na n wilgame tɩ m yaa sõng yãmb sʋka, buud toɛy-toɛyã nifẽ.’+

42 “‘Mam sã n wa tall yãmb n wa Israyɛll soolmẽ wã,+ soolem ning m sẽn da pʋlem tɩ m na n kõo y yaab-rãmbã pʋgẽ, yãmb na n bãngame tɩ mam yaa a Zeova.+ 43 Be, yãmb na n tẽega y manesmã la y tʋʋm-tʋmdɩ wã fãa y sẽn tʋm n dẽgem y mensã yelle.+ Yãmb na n kisga y mense,* bõn-wẽns nins fãa y sẽn maanã yĩnga.’+ 44 A Zeova sẽn yaa Zu-soab sẽn ka to wã yeelame: ‘Yãmb a Israyɛll buudã neba, mam sã n wa maan yãmb bõn-kãensã m yʋʋrã yĩnga,+ n pa maan yãmb wa sẽn zems y manesem-wẽngã la y tʋʋm-wẽnsã, yãmb na n bãngame tɩ mam yaa a Zeova.’”

45 A Zeova le goma ne maam n yeele: 46 “Ninsaal biiga, wẽnemd f neng n tees goabg sẽnes n gom ne goabg soolmã la f togs bãngr-goama, goabg weoogã kãgr wɛɛngẽ. 47 Yeel goabg kãgrã yaa: ‘Kelg a Zeova goama. Ad a Zeova sẽn yaa Zu-soab sẽn ka to wã sẽn yeele: “Mam na n kɩtame tɩ bugum yõk foo.+ A na n dɩɩ tɩ-maasã la tɩ-koeemsã fãa sẽn be fo pʋgẽ wã. Bug-witmã pa na n ki ye.+ A na n yõoga nensã* fãa, sẽn sɩng goabg n tãag rɩtgo. 48 Nebã* fãa na n yãame tɩ yaa maam a Zeova meng n yõgen bugmã, sẽn na yɩl t’a ra ki ye.”’”+

49 Dẽ, mam yeelame: “Kayto! Zu-soab sẽn ka to a Zeova! B sokda mam wɛɛngẽ yaa: ‘A pa gomd ne pagd* bal sɩda?’”