Zeremi sebre
31 A Zeova yeelame: “Wakat kãnga, mam na n lebga Israyɛll buud toɛy-toɛyã fãa Wẽnnaam, tɩ bãmb lebg mam nin-buiidu.”+
2 Ad a Zeova sẽn yeele:
“Neb nins sẽn põs sʋʋgã paama lohorem we-raoogẽ wã,
Israyɛll nebã sẽn wa n dabd b vʋʋsg zĩigẽ wã.”
3 A Zeova vẽnega a meng ne maam hal zĩ-zãrgẽ n yeele:
“Mam nonga foo ne nonglem sẽn pa sate.
Yaa nonglem-kãng yĩng la mam sẽn maan yãmb neere, n tak yãmb n pẽneg m mengã.*+
4 Mam na n lebsa yãmb y zĩigẽ, tɩ y le lebg buudu.+
6 Bala wakat n wate, tɩ gũudbã sẽn be Efrayim tãensẽ wã na n zẽk b koees n yeele:
‘Yik-y-yã, wa-y tɩ d kẽng tõnd Wẽnnaam a Zeova nengẽ Siyõ.’”+
7 Bala ad a Zeova sẽn yeele:
“Kaas-y ne sũ-noog a Zakoob yĩnga.
Kɩdm-y sũ-noogo, bala yãmb yɩɩda buud toɛy-toɛyã.+
Moon-y rẽ. Pẽg-y Wẽnnaam la y yeele:
‘Zeova, fãag-y yãmb nin-buiidã, Israyɛll neb nins sẽn ketã.’+
8 Mam na n yiis-b-la rɩtg soolmẽ wã n tall n wa.+
Mam na n yiis-b-la hal tẽngã zĩ-zãrsẽ n tigmi.+
Zoens la wobs na n zĩnda b sʋka,+
n paas pagb sẽn tʋte, la pagb sẽn kʋmd rogem.
B na n yɩɩ kʋʋng n lebg n wa zĩ-kãngã.+
9 B na n waa ne yãbre.+
Mam na n lʋɩɩ b taoore, tɩ b kot maam sugri.
Mam na n kɩtame tɩ b kẽn sor sẽn maneg zug sẽn na yɩl tɩ b ra wa lak ye.
Bala mam yaa a Israyɛll Ba, t’a Efrayim yaa mam pipi biiga.”+
10 Yãmb a buud toɛy-toɛyã, kelg-y-yã a Zeova goamã,
la y moon-b ko-sʋk tẽns nins sẽn zãrẽ wã n yeele:+
“Soab ning sẽn sãeeg Israyɛll nebã na n le tigm-b lame n naag taaba.
A na n gesa b yelle, wa rũm-kɩɩm sẽn get a rũms yell to-to wã.+
12 B na n waame, n kaas sũ-noog Siyõ zĩ-zãntgẽ wã.+
B sũy na n yɩɩ noog wʋsg a Zeova sõmblmã* yĩnga,
b sẽn na n paam koodo, divẽ-paalga,+ kaam,
n paas rũm-bõonegã la rũm-bɛdã kambã yĩnga.+
13 “Wakat kãnga, pa-kuilã na n saoo ne sũ-noogo,
n paas kom-bɩɩsã ne nin-kẽembã fãa.+
Mam na n kɩtame tɩ b sũ-sãangã yãbr lebg kɩdengo.+
Mam na n bels-b lame, la m kɩt tɩ b paam sũ-noog tɩ ledg b sũ-sãangã.+
14 Mam na n kõo maan-kʋʋdbã* bũmb wʋsg tɩ seke.
Mam nin-buiidã na n dɩɩ mam sõmblmã yõod tɩ pidi.”+ Yaa a Zeova n yeele.
15 “Ad a Zeova sẽn yeele:
‘Koɛɛg rãamd la b wʋmd Rama.+ Yaa yãbr la sũ-toog kaasg rãamde:
Yaa a Rasɛll n yãbd a kom-dibli wã* yĩnga.+
A tõdgame tɩ b kõn bels-a,
bala b ka le be ye.’”+
16 Ad a Zeova sẽn yeele:
“‘Ra le yãbe, la f ra le raag nintãm yɛs ye.
Bala fo na n paama keoor f tʋʋmã yĩnga.’ Yaa a Zeova n yeele.
‘F kom-dibli wã na n yii bɛ wã soolmẽ n lebg n wa.’+
17 A Zeova yeelame: ‘Fo tõe n saagame tɩ f beoog na n yɩɩ neere.+
Fo kom-dibli wã na n lebg n waa b soolmẽ wã.’”+
18 “Sɩd-sɩda, mam wʋma a Efrayim wõosgã.
A yetame: ‘Yãmb remsa maam. Mam paama remsg
wa nag-bil b sẽn pa nome.
Kɩt-y tɩ m lebg n wa yãmb nengẽ, tɩ m na n lebg n waa tao-tao,
bala yãmb yaa a Zeova sẽn yaa mam Wẽnnaamã.
19 Bala mam sẽn lebg n wa yãmb nengẽ wã poore, mam ket n maanda m bãngẽ ne bũmb nins m sẽn da maanã.+
Yãmb sẽn sõng maam tɩ m wʋm yɛlã võorã poore, mam pãba m gerã ne sũ-sãanga.
Bũmb nins mam sẽn maan m yãadmẽ wã yĩnga,
yãnd wʋsg n yõk maam.’”+
20 A Zeova yeelame: “A Efrayim pa mam bi-nongr sẽn ta m yam sɩda?+
Bala mam sã n zab-a fãa, mam le tẽegda a yelle.
Yaa rẽ yĩng la m sẽn zoet a nimbãanegã.+
Sɩd-sɩda, mam na n kʋm-a lame.”+
21 “Ning-y bãn sorã zug y mens yĩnga,
la y lugl bãn sẽn wilgd sore.+
Ges-y so-kãsengã neere, sor ning yãmb sẽn segd n tũ wã.+
Foom a Israyɛll pa-kuili, lebg n leb tẽns nins sẽn yaa fo rẽndã pʋsẽ.
22 Foom a bi-pugl sẽn pa maand sɩda, fo na n kell n maana sãmbs tɩ ta dabʋre?
Bala a Zeova naana bõn-paal tẽngã zugu:
Pag na n pʋga rao ne a sũur fãa.”
23 Ad Israyɛll Wẽnnaam a Zeova sẽn yaa tãb-biis naabã sẽn yeele: “Mam sã n wa tall b yembsã n lebg n wa, b na n le yeela Zida soolmẽ wã la a tẽnsã pʋsẽ yaa: ‘Foom a tɩrlem zĩiga,+ foom a tãn-sõngo,+ bɩ a Zeova ning foo barka.’ 24 Zida soolmã pʋgẽ la a tẽnsã fãa pʋsẽ, ka-koaadbã ne sẽn gũud-b rũmsã fãa na n zĩnda ne taaba.+ 25 Bala mam na n kõo neb nins sẽn ya wã bũmb fãa tɩ seke, la m keng neb* nins fãa pãng sẽn boogã raoodo.”+
26 Rẽ la mam nek n puk m ninã. Mam gõeemã yɩ-m-la noogo.
27 A Zeova yeelame yaa: “Gese! Wakat n wat tɩ mam na n kɩt tɩ Israyɛll ne Zida nebã fɩɩge. Mam na n kɩtame me tɩ b rũmsã lebg wʋsgo.”+
28 “Mam sẽn ges-b sẽn na yɩl n võ, n tus n lubi, n wã, n sãam la m maan wẽng+ to-to wã, mam na n ges-b-la woto, sẽn na yɩl n me la m sele.”+ Yaa a Zeova n yeele. 29 “Wakat kãnga, b pa na n le yeel tɩ ‘yaa ba-rãmbã n dɩ viyn biis sẽn yaa miisga, tɩ kambã yẽn deeg n zãab’+ ye. 30 La ned kam fãa na n kii a meng kongr yĩnga. Ned ning sẽn dɩt viyn biis sẽn yaa miisga, yaa yẽ mengã yẽn n na n zãabe.”
31 A Zeova yeelame yaa: “Ade! Wakat n wat tɩ mam na n maan kaool-paalg ne Israyɛll la Zida nebã.+ 32 Pa na n yɩ wa kaool ning mam sẽn da maan ne b yaab-rãmbã, daar ning mam sẽn gãd b nug n tall-b n yi Ezɩpt soolmẽ wã,+ rat n yeel tɩ ‘mam kaoolã b sẽn sãame,+ baa mam sẽn da yaa b zu-soab hakɩɩkã* ye.’ Yaa a Zeova n yeele.”
33 “Bala ad kaool ning mam sẽn na n maan ne Israyɛll nebã wakat kãng loogr poorã.” Yaa a Zeova n yeele. “Mam na n ninga m tõogã b pʋsẽ.+ M na n gʋls-a-la b sũyẽ wã.+ Mam na n lebga b Wẽnnaam, tɩ bãmb lebg mam nin-buiidu.”+
34 “La b ned baa a ye pa na n le zãms a to wall a ba-biig n yeel t’a ‘bao n bãng a Zeova’+ ye. Bala b fãa na n bãnga maam, sẽn sɩng ne sẽn yaa-a bilf n yɩɩd bãmb sʋkã, n tãag sẽn yaa-a kãseng n yɩɩdã.”+ Yaa a Zeova n yeele. “Bala m na n kõo b kongrã sugri. M pa na n le tẽeg b yel-wẽndã yell ye.”+
35 Ad a Zeova sẽn yeele,
soab ning sẽn kõ wĩntoogã sẽn na yɩl t’a vẽneg wĩndga,
sẽn lugl noy kiuugã la ãdsã yĩng sẽn na yɩl tɩ b vẽneg yʋngo,
soab ning sẽn zẽkd mogrã n dãmbd a ko-pɛmã,
soab ning yʋʋr sẽn yaa tãb-biis naab a Zeova wã sẽn yeele:+
36 “‘No-kãensã sẽn pa tol n tõe n toeemã,
a Israyɛll yagensã me na n yɩɩ buud mam taoor wakat fãa.’+ Yaa a Zeova n yeele.”
37 Ad a Zeova sẽn yeele: “‘Ned sã n wa tõog n mak saasã la a vaees tẽngã yẽbgre, yaa rẽ poor bal la mam na n daag a Israyɛll yagensã fãa n base, bũmb nins fãa b sẽn maanã yĩnga.’ Yaa a Zeova n yeele.”+
38 “Wakat n wat tɩ b na n me tẽngã+ a Zeova yĩnga, sẽn sɩng ne Hananɛll gasgã+ n tãag Gõdrã zĩigẽ rignoorã.”+ Yaa a Zeova n yeele. 39 “B na n tẽega wĩirã b sẽn tar n magdã+ tɩrg n ta Garɛɛb kunkubrã, la b gõdg n tees Gowa. 40 Rũm-kɩɩmsã* la tompɛglmã* longã* tõre, n paas pʋtã fãa hal n tãag Sedrõ longã,+ hal n tãag Wed-moosã rignoorã+ gõdrã sẽn tees yaangã na n yɩɩ bũmb sẽn yaa sõng a Zeova nifẽ.+ B pa na n le võog-a wall b tus-a n lub ye.”