Ezekɩyɛll sebre

3 Dẽ, a yeela maam yaa: “Ninsaal biiga, wãb bũmb ning sẽn be fo taoorã.* Wãb seb-pindmã, la f kẽng n tɩ gom ne Israyɛll buudã.”+

2 Mam yaaga m noorã, t’a kõ maam seb-pindmã tɩ m wãbe. 3 A le yeela maam yaa: “Ninsaal biiga, wãb seb-pindmã mam sẽn kõt foomã, n pids f pʋgã.” Dẽ, mam sɩnga a wãbre. A ra yaa noog mam noorẽ wã wa sɩɩdo.+

4 A yeela maam yaa: “Ninsaal biiga, kẽng Israyɛll buudã sʋk n tɩ taas-b mam goamã. 5 Bala mam pa tʋmd foo neb sẽn gomd buud-gomd võor wʋmb sẽn yaa toogo, wall buud-gomd fo sẽn pa mi nengẽ ye. Yaa Israyɛll buudã neb nengẽ la m tʋmd foo. 6 Mam pa tʋmd foo buud wʋsg sẽn gomd buud-gomd võor wʋmb sẽn yaa toogo, wall buud-gomd fo sẽn pa mi nengẽ, tɩ fo pa wʋmd b gom-biisã võor ye. Sã n da yaa bãmb nengẽ la mam tʋm foo, b na n kelga foo.+ 7 La Israyɛll buudã neb na n zãgsame tɩ b kõn kelg foo, bala b pa rat n kelg maam ye.+ Israyɛll buudã neb fãa yaa tʋb-pa-wʋmdb la neb sũy sẽn diglmi.+ 8 Mam kɩtame tɩ fo nengã lebg kɛgeng wa b nensã bal kɛpɩ, la m kɩt tɩ f rĩirã lebg kɛgeng wa b rĩyã bal kɛpɩ.+ 9 Mam kɩtame tɩ fo rĩirã lebg wa diyama, n yaa kãn-kãe n yɩɩd wãre.+ Ra zoe-ba, wall f bas tɩ b nensã kẽes-f rabeem wʋsg ye.+ Bala b yaa buud neb sẽn yaa tõatba.”

10 A le yeela maam yaa: “Ninsaal biiga, kelg goam nins fãa mam sẽn togsd foomã, la f bĩng-b f sũurẽ wã. 11 Kẽng fo buudã neb* nins sẽn be yembdã+ sʋk n tɩ gom ne-ba. Yeel-b yaa: ‘Ad a Zeova sẽn yaa Zu-soab sẽn ka to wã sẽn yeele,’ tɩ b kelgame, wall b zãgsame tɩ b kõn kelge.”+

12 Vʋʋsem* n dɩk maam.+ Mam wʋma bʋrg sẽn yaa kãseng mam poorẽ wã, n paas koɛɛg sẽn yete: “Bɩ b pẽg a Zeova ziirã a sẽn beẽ wã.” 13 Mam da wʋmda bõn-vɩɩsã pɩgsã sẽn da sɩɩsd taabã rãamde,+ ruzãnt-rãmbã sẽn be b sɛɛgẽ wã rãamde,+ ne bʋrgã sẽn yaa kãsengã. 14 Vʋʋsmã* rɩka maam n looge. Mam looga ne sũ-toog la sũ-yikri, t’a Zeova nugã ra be mam zug ne pãnga. 15 Dẽ, mam kẽnga neb nins sẽn da be yembd Tɛll-abiibã nengẽ, rat n yeel tɩ neb nins sẽn da be Kebaar kʋɩlgã noorã+ nengẽ, n pa zĩig ning b sẽn da be wã. Mam zĩnda b sʋk rasem a yopoe, n da pa mi m sẽn maandg ye.+

16 Rasem a yopoe wã baasgẽ, a Zeova goma ne maam n yeele:

17 “Ninsaal biiga, mam yãka foo tɩ fo yaa gũud Israyɛll buudã yĩnga.+ Fo sã n wʋm gomd sẽn yi mam noorẽ wã, fo segd n keoog-b lame n kõ-ma.+ 18 Mam sã n yeel nin-wẽng tɩ ‘hakɩɩka a na n kiime,’ tɩ fo pa keoog-a, la f bas n pa gom ne nin-wẽngã sẽn na yɩl t’a bas a wẽnemã n tõog n kell vɩɩmde,+ a na n kii a kongrã yĩnga,+ bala a yaa nin-wẽnga. La mam na n ninga a zɩɩmã taal fo zugu.*+ 19 La fo sã n keoog nin-wẽng t’a pa bas a wẽnemã ne a tʋʋm-wẽnsã, a na n kii a kongrã yĩnga, la fo na n fãaga f vɩɩmã.*+ 20 La nin-tɩrg sã n bas a tɩrlmã n maan sẽn yaa wẽnga,* mam na n dɩgla bũmb sẽn tõe n kɩt tɩ ned lak n lʋɩ a taoorã. A na n kiime.+ Fo sã n pa keoog-a, a na n kii a yel-wẽndã yĩnga, tɩ b pa le tẽeg a tʋʋm-tɩrsã yell ye. La mam na n ninga a zɩɩmã taal fo zugu.*+ 21 La fo sã n keoog nin-tɩrg t’a ra maan yel-wẽnde, t’a sɩd pa maan yel-wẽnde, a na n kell n vɩɩmda b sẽn keoog-a wã yĩnga.+ Fo na n fãaga f vɩɩmã* me.”

22 Be, a Zeova nugã zĩnda mam zugu, t’a yeel maam yaa: “Yik n kẽng tẽn-nabrẽ wã, tɩ mam na n goma ne foo be.” 23 Dẽ, mam yikame n kẽng tẽn-nabrẽ wã. Mam yãa a Zeova ziirã be,+ tɩ wõnd ziir ning mam sẽn yã Kebaar kʋɩlgã noorã.+ Mam lʋɩɩme n fõgen m neng tẽnga.

24 Wẽnnaam vʋʋsmã siga mam zugu, n kɩt tɩ mam yik n yaas m naoã zutu.+ Wẽnnaam goma ne maam n yeele:

“Kẽng n tɩ kẽ f roogã pʋgẽ n pag f menga. 25 Sã n yaa ne foom a ninsaal biiga, b na n sẽba foo ne wĩy sẽn na yɩl tɩ fo ra tõog n yi n kẽng b sʋk ye. 26 Mam na n kɩtame tɩ f zɩlemdã tabend f ragsendakã. Fo na n mukame n pa tõe n wilg-b b kongre, bala b yaa buud neb sẽn yaa tõatba. 27 La mam sã n wa gom ne foo, mam na n yaaga fo noorã. Fo segd n yeel-b lame yaa:+ ‘Ad a Zeova sẽn yaa Zu-soab sẽn ka to wã sẽn yeele.’ Bɩ ned ning sẽn kelgd kelge,+ la bɩ ned ning sẽn zãgsd t’a kõn kelg zãgse, b sẽn yaa buud neb sẽn yaa tõatbã yĩnga.+