Kibayã pipi sebre

20 Yʋʋmdã sɩngrẽ, wakat ning rĩm-dãmbã sẽn mi n yi n kẽng zabrã, a Zowaab+ kẽnga zabre, n tɩ sãam Amon nebã soolmã. Yẽ tɩ gũbga Raba.+ La a Davɩɩd paa Zerizalɛm.+ A Zowaab zaba ne Raba n sãam-a zãnga.+ 2 A Davɩɩd fõka maanf ning sẽn da fõg a Malkam zugã, n mik t’a zɩslmã ra taa sãnem talã* a ye, tɩ b ra nags-a ne kug-neeba. B rɩk-a lame n fõgen a Davɩɩde. A Davɩɩd wʋka teed zem bal tẽngã pʋgẽ me.+ 3 A yiisa neb nins sẽn da be be wã, n tɩ kɩt tɩ b peesd kuga, tɩ b tʋmd ne kud-sɩlems la laya.+ Yaa woto la yẽ maan tẽns nins fãa Amon nebã sẽn so wã. A Davɩɩd ne a tãb-biisã fãa wa n leba Zerizalɛm.

4 Rẽ zugẽ, zabr n zĩnd Israyɛll nebã ne Filisti nebã sʋk Gezɛɛr. Wakat kãnga, Husa rao a Sibekayi+ kʋʋ a Sipayi sẽn da yaa Refayim nebã+ yagengã. La bãmb tõoga Filisti nebã.

5 Zabr n leb n zĩnd Israyɛll nebã ne Filisti nebã sʋka, t’a Zayɩɩr biig a Ɛlhanan kʋ a Lami sẽn yaa Gat rao a Golyat+ ba-biigã. A kãndã raoog ra yaa wa koeer-bõanga.+

6 Zabr n leb n zĩnd Gate,+ tɩ nin-wobg+ ra be be. A nug fãa ra tara nug-biis a yoobe, t’a naoor fãa tar nao-bi a yoobe. A nug-biisã ne a nao-bi wã fãa sẽn naag taab yaa bãmb pisi la a naase. Yẽ me ra yaa Refayim nebã+ yagenga. 7 Yẽ ra baooda Israyɛll nebã noor n ka basdẽ ye.+ La a Zonatã sẽn yaa a Davɩɩd kẽem a Simeya+ biigã kʋ-a lame.

8 Nin-kãensã ra yaa Refayim nebã+ yagens sẽn da be Gate.+ La a Davɩɩd ne a tãb-biisã kʋʋ bãmba.