Zeremi sebre
18 Ad goam nins a Zeova sẽn taas a Zeremi wã: 2 “Yik n kẽng yagdã zakẽ.+ Be, m na n kɩtame tɩ fo wʋm mam goamã.”
3 Dẽ, mam kẽnga yagdã zakẽ, la a ra yagda laoko. 4 La laokã yagdã sẽn da maand ne tãndã sãama a nugẽ. Dẽ, yagdã rɩka tãndã n maan laok a to, wa a sẽn tagsd tɩ zemsame.*
5 Rẽ la a Zeova gom ne maam n yeel yaa: 6 “‘Israyɛll neba, mam pa tõe n maan yãmb wa yagdã sẽn maan to-to wã sɩda?’ Yaa a Zeova n yeele. ‘Israyɛll neba, tãndã sẽn yaa to-to yagdã nugẽ wã, yãmb me yaa woto mam nugẽ.+ 7 Mam sã n yeel tɩ m na n võoga buud wall rĩungu, n tus-a n lub la m sãam-a,+ 8 tɩ bu-kãng nebã bas wẽng ning mam sẽn yeel tɩ b maandame wã, ma-me na n toeema yam* yel-beed ning mam sẽn da rat n kɩt tɩ wa b zutã wɛɛngẽ.+ 9 La mam sã n yeel tɩ m na n mee buud wall rĩung la m sel-a, 10 t’a nebã maan sẽn yaa wẽng mam nifẽ la b pa kelg mam koɛɛgã, mam na n toeema yam,* neer ning mam sẽn da rat n maan-bã wɛɛngẽ.’
11 “Masã, m bõos tɩ f yeel Zida ne Zerizalɛm nebã yaa: ‘Ad a Zeova sẽn yeele: “Mam segenda yel-beed yãmb yĩnga, la m tagsd m sẽn na n sɩbg yãmb to-to wã. M bõos tɩ y bas y manesem-wẽnsã, la y maneg y manesmã ne y tʋʋm-tʋmdɩ wã.”’”+
12 La b yeelame yaa: “Ra nams f meng ye!+ Bala tõnd na n tũu d tagsa wã, tɩ d ned kam fãa maand wa sẽn zems a sũurã sẽn yaa wẽng la sẽn diglmã.”+
13 Woto wã, ad a Zeova sẽn yeele:
“M bõos tɩ y sok bu-zẽmsã sʋk n gese.
Ãnda n zoe n wʋm bũmb a woto buudu?
Israyɛll pa-kuilã maana sẽn yaa wẽng tɩ looge.+
14 Sa-lamdã na n menema Libã pĩig kugã sigdsẽ bɩ,
bɩ ko-maasgã sẽn zoet n yit zĩ-zãrsẽ n watẽ wã na n kʋɩɩme?
15 La mam nin-buiidã yĩma mam yelle.+
Bala b maanda maand* n kõt bũmb sẽn pa tar yõodo.+
B kɩtdame tɩ neb lagsd b soayã zutu, pĩnd wẽndẽ soayã zutu,+
sẽn na yɩl tɩ b tɩ kẽn so-bugs sẽn yaa lond la kunkub zutu,*
16 la sẽn na yɩl n kɩt tɩ b soolmã lebg bũmb sẽn kẽesd rabeem,+
Ned ning fãa sẽn na n loog be na n ges-a-la ne rabeem la a gir a zugu.+
17 Mam na n sãeeg-b-la bɛ wã taoor wa yaang sobgã sẽn sãeegd wudg to-to wã.
B yel-beedã wakate, m pa na n wẽnemd m neng n tees-b ye. M na n tees-b-la m poorã.”+
18 B yeelame: “Wa-y tɩ d zems taab n maan a Zeremi wẽnga,+ bala tõogã* na n ket n bee tõnd maan-kʋʋdbã nengẽ. Sagls me na n yita yam dãmbã nengẽ, tɩ Wẽnnaam goamã yit no-rɛɛsdbã nengẽ. Wa-y tɩ d gom a yell wẽnga,* la d ra kelg a sẽn yetã ye.”
19 Zeova, wẽnemd-y n ges-y maam,
la y kelg m bɛɛbã sẽn yetã.
20 Segdame tɩ ned lebs wẽng neer yĩng bɩ?
Bala b tuka bok mam vɩɩmã* yĩnga.+
Tẽeg-y mam sẽn yaas yãmb taoor n togs bõn-sõma b wɛɛngẽ,
sẽn na yɩl tɩ y sũurã sẽn da puud ne-bã sigã.
21 Woto wã, bɩ y bas tɩ b kambã ki kom.
Kɩt-y tɩ b kʋ-b ne sʋʋse.+
Bɩ b pagbã kong b kambã, la b lebg pʋg-kõapa.+
Bɩ bã-toaag kʋ b rapã.
La bɩ b kʋ b kom-bɩɩsã ne sʋʋs zabr sasa.+
22 Bɩ kelems rãamd yi b rotẽ wã,
yãmb sã n wa kɩt tɩ fãadb wa b nengẽ zĩig pʋgẽ.
Bala b tuka bok n na n yõk maam,
la b rɩgl bẽds mam naoã yĩnga.+
23 La yãmb a Zeova,
yãmb mii magb nins fãa b sẽn magd n na n kʋ maamã sõma.+
Ra lud-y b kongrã ye.
Ra yẽes-y b yel-wẽndã yãmb taoor ye.