Zeremi sebre
16 A Zeova le goma ne maam n yeel yaa: 2 “Fo pa segd n kẽ kãadem, wall f rog kom-dibli la kom-pugli zĩ-kãngã ye. 3 Bala ad bũmb ning a Zeova sẽn yeel kom-dibli la kom-pugli nins sẽn dog soolem-kãngã pʋgẽ wã wɛɛngẽ, la b ma-rãmbã ne b ba-rãmbã wɛɛngẽ: 4 ‘Bã-toos n na n kʋ-ba.+ La ned baa a ye pa na n yãb b kʋʋre, wall n mum-b ye. B na n lebga wa birg tẽn-gãongã zugu.+ Zabr ne kom n na n kʋ-ba,+ tɩ b kũ-rãmbã yɩ bõn-yɩgdɩ wã sẽn yɩgd yĩngrã ne tẽngã we-rũmsã rɩɩbo.’
5 Bala ad a Zeova sẽn yeele:
‘Ra kẽng zak pʋgẽ b sẽn maand tigr kũum yĩng ye.
Ra kẽng be n tɩ yãb wall f pʋʋs kʋʋr ye.’+
‘Bala mam yiisa m laafɩ wã nin-kãens sʋka,
n paas m maan-neerã la m nimbãan-zoeerã.’+ Yaa a Zeova n yeele.
6 ‘Nin-kãsemsã ne nin-bõonesã fãa na n kii soolem-kãngã pʋgẽ.
7 Ned baa a ye pa na n kõ sẽn be-b sũ-sãang pʋgẽ wã rɩɩbo,
n na n bels-b b nebã sẽn maan kaalmã yĩng ye.
Ned baa a ye pa na n kõ-b belsg divẽ
tɩ b yũ, b ba wall b ma sẽn ki yĩng ye.
8 Ra kẽ tigr zakẽ,
n zĩnd n naag neb n dɩ la f yũ ye.’
9 “Bala ad Israyɛll Wẽnnaam a Zeova sẽn yaa tãb-biis naabã sẽn yeele: ‘Mam na n kɩtame tɩ kɩdeng la sũ-noog rãamd sa zĩ-kãngã, la m kɩt tɩ pʋg-paal ne pʋg-paal sɩd koɛɛg ra le zĩnd ye. Mam na n maana rẽ yãmb wakatã, la yãmb nifẽ.’+
10 “Fo sã n wa togs-b gom-kãensã, b na n soka foo yaa: ‘Bõe yĩng t’a Zeova yeel tɩ yel-be-kãensã fãa sẽn yaa kãsemsã na n paama tõndo? Yaa bõe kongre, la bõe yel-wẽnd la d maan n beeg tõnd Wẽnnaam a Zeova?’+ 11 Fo segd n leok-b lame yaa: ‘A Zeova yeelame: “Yaa yãmb yaab-rãmbã sẽn bas maamã yĩnga.+ B ra tũuda wẽnnaam-dãmb a taaba, n waoogd-b la b wõgemded b taoore.+ La b basa maam, n pa tũ mam tõogã ye.+ 12 Yãmb maana sẽn yaa wẽng wʋsg n yɩɩd y yaab-rãmbã.+ Yãmb ned kam fãa tũuda a sũurã sẽn yaa wẽng la sẽn diglmã, n bas mam sakre.+ 13 Rẽ n so tɩ m na n dig yãmb n yiis soolem-kãngã pʋgẽ, tɩ y kẽng soolem yãmb ne y yaab-rãmbã sẽn da pa mi pʋgẽ.+ Be, yãmb na n waooga wẽnnaam-dãmb a taab wĩndg la yʋngo,+ bala m pa na n zoe yãmb nimbãaneg ye.”’
14 “A Zeova yeelame: ‘Wakat n wate, tɩ b pa na n le yeel yaa: “D wẽenda ne a Zeova sẽn vɩ wã, soab ning sẽn yiis Israyɛll nebã Ezɩpt soolmẽ wã!”+ 15 La b na n yeelame yaa: “D wẽenda ne a Zeova sẽn vɩ wã, soab ning sẽn yiis Israyɛll nebã rɩtg soolmẽ wã, la soolem nins fãa pʋsẽ a sẽn da sãeeg-bã n tall-b n lebg n wa wã!” Mam na n tall-b lame n lebg n wa b soolmẽ wã, soolem ning mam sẽn da kõ b yaab-rãmbã.’+
16 A Zeova yeelame: ‘Mam na n boola zĩm-yõgdb wʋsgo,
tɩ b yõg-b wa zĩm.
Rẽ poore, mam na n boola tãoos-rãmb wʋsgo,
tɩ b gẽes-b tãng fãa zugu, kunkubr fãa zugu,
la pĩisã pẽgsẽ.
17 Bala mam ninã geta bũmb nins fãa b sẽn maandã.*
B pa solg ne maam ye.
B kongrã me pa solg ne maam ye.
18 Mam na n deng n keo-b-la bũmb nins fãa b sẽn segd ne wã, b kongrã la b yel-wẽndã yĩnga.+
Bala b rẽgma mam soolmã ne b bõn-naandsã sẽn yaa bõn-yood sẽn pa vɩ wã,*
la b pids mam pʋɩɩrã ne bũmb toor-toor mam sẽn kisi.’”+
19 Zeova sẽn yaa mam pãng la mam soondg zĩiga,
zĩig mam sẽn zoet n kẽngd yel-pakr wakate,+
buud toɛy-toɛyã na n yii tẽngã kɩrems n wa yãmb nengẽ,
n yeel yaa: “Tõnd yaab-rãmbã reega bũmb sẽn yaa ziri fasɩ tɩ yɩ b rogem-pʋɩɩre,
n paas bõn-vɩɩd la bũmb toor-toor sẽn pa tar yõodo.”+
20 Ninsaal tõe n maana wẽnnaam-dãmb bɩ?
A sẽn maandã pa wẽnnaam-dãmb sɩd-sɩd ye.+
21 “Woto yĩnga, mam na n kɩtame tɩ buud toɛy-toɛyã bãnge.
Wakat kãnga, mam na n kɩtame tɩ b bãng mam pãngã ne m pãn-kãsengã.
Na n yɩɩ tɩlɛ tɩ b bãng tɩ mam yʋʋr la a Zeova.”