Tõod sebre

13 “No-rɛɛs bɩ ned sẽn tũnugd ne zãmsd n togsd beoog yell sã n wa yik yãmb sʋk n kõ bãnd wall a togs beoog yelle, 2 tɩ bãndã wall bũmb ning a sẽn togs beoogã wɛɛngẽ wã sɩd pidsi, t’a yetẽ yaa: ‘Wa-y tɩ d tũ wẽnnaam-dãmb a taab la d waoog-ba,’ wẽnnaam-dãmb yãmb sẽn pa mi, 3 yãmb pa segd n kelg no-rɛɛs-kãng bɩ zãmsdã soab goam ye.+ Bala yaa yãmb Wẽnnaam a Zeova n makd yãmb+ n na n bãng yãmb sã n nonga yãmb Wẽnnaam a Zeova ne y sũurã fãa la ne y sɩɩgã* fãa.+ 4 Yaa yãmb Wẽnnaam a Zeova la y segd n tũ. Yẽ la y segd n zoe. A noy la y tog n sake. Yẽ koɛɛg la y segd n kelge. Yaa yẽ la soab ning y sẽn tog n waooge, la y sẽn segd n gãd kãn-kãe.+ 5 La b segd n kʋʋ no-rɛɛsã bɩ zãmsdã soaba,+ bala a baoome n na n kɩt tɩ nebã kɩɩs yãmb Wẽnnaam a Zeova sẽn na yɩl tɩ y bʋdg n bas sor ning yãmb Wẽnnaam a Zeova sẽn kõ yãmb noor tɩ y tũ wã. Yaa yẽ la soab ning sẽn yiis yãmb Ezɩpt soolmẽ wã, n fãag yãmb tẽng ning pʋgẽ y sẽn da yaa yembsã. Yãmb segd n yiisa bũmb ning fãa sẽn yaa wẽng yãmb sʋka.+

6 “Fo ma-biiga, bɩ f bi-ribl wall f bi-pugla, pa rẽ bɩ f pʋg-nongr wall f zoa hakɩɩk sã n soos n na n belg foo n yetẽ yaa: ‘Wa tɩ d tɩ tũ wẽnnaam-dãmb a taaba,’+ wẽnnaam-dãmb foo ne f yaab-rãmbã sẽn pa mi, 7 sẽn yaa buud nins sẽn gũbg yãmbã wẽnnaam-dãmba, b pẽe yãmb wall b zãra ne yãmba, sẽn sɩng ne soolmã kɩreng a ye n tɩ tãag kɩreng a to wã, 8 fo pa segd n sak bɩ n kelg-a ye.+ Fo pa segd me n zoe a nimbãaneg bɩ n kogl-a ye. 9 Fo segd n kʋ-a lame n da bas-a ye.+ Sẽn na yɩl n kʋ-a, foo n segd n yɩ pipi n lobg-a kugri, tɩ nin-buiidã fãa yaool n wa naag n lob-a.+ 10 Fo segd n lob-a-la kug n kʋ,+ bala a baoome n na n kɩt tɩ f bʋdg n bas f Wẽnnaam a Zeova, soab ning sẽn yiis yãmb Ezɩpt soolmẽ wã, tẽng ning pʋgẽ y sẽn da yaa yembsã. 11 Dẽ, Israyɛll nebã fãa na n wʋmame n yɛɛse. La b kõn tol n le saag n maan bũmb sẽn yaa wẽng woto yãmb sʋk ye.+

12 “Yãmb sã n wa wʋm tɩ b gomd tẽns nins yãmb Wẽnnaam a Zeova sẽn na n kõ-y tɩ y soogã a yembr pʋgẽ n yetẽ yaa: 13 ‘Neb sẽn ka bark n yik yãmb sʋkã, n dat n wẽnemd b tẽngã nebã yam n yetẽ: “Wa-y tɩ d tɩ tũ wẽnnaam-dãmb a taaba,” wẽnnaam-dãmb yãmb sẽn pa mi,’ 14 yãmb segd n gesa yellã, n vaees sõma, la y sok n bãnge.+ La sã n yaa sɩd tɩ bõn-wẽn-kãngã maana yãmb sʋka, 15 yãmb segd n kʋʋ tẽn-kãng nebã ne sʋʋse.+ Yãmb segd n sãama tẽngã ne rũmsã n paas bũmb nins fãa sẽn be a pʋgẽ wã.+ 16 Rẽ poore, yãmb segd n tigsa te-zɛɛdmã zãma wã zĩig tẽn-sʋka, la y yõog tẽngã bugum. Te-zɛɛdmã fãa na n yɩɩ wa maoong sẽn yõogd bugum yãmb Wẽnnaam a Zeova yĩnga. Tẽngã na n lebga raboog wakat fãa yĩnga. B pa segd n le me-a ye. 17 Yãmb nug pa segd n dɩk bũmb b sẽn welg toor n na n sãam ye.+ Dẽ, a Zeova sũurã sẽn da puugã na n sigame, t’a zoe yãmb nimbãaneg la a kɩt tɩ y lebg wʋsgo, wa a sẽn da pʋlem yãmb yaab-rãmbã.+ 18 Bala yãmb segd n saka yãmb Wẽnnaam a Zeova,* n tũ a noyã fãa mam sẽn taasd yãmb rũndã wã. Woto, yãmb maanda sẽn yaa tɩrg yãmb Wẽnnaam a Zeova nifẽ.+