Ezekɩyɛll sebre

1 Yʋʋm pis-tã soabã kiuug a naas-n-soabã rasem a nu wã daare, mam sẽn wa n be neb nins b sẽn tall n kẽng yembdã+ sʋk Kebaar kʋɩlgã noore,+ saasã pakame, tɩ mam sɩng n na n yã vẽnegr toor-toor sẽn yit Wẽnnaam nengẽ. 2 Kiuugã rasem a nu wã daare, rat n yeel tɩ rĩm a Zowakin sẽn kẽng yembdã yʋʋm a nu soabã,+ 3 a Zeova goma ne maan-kʋʋd a Buuzi biig a Ezekɩyɛlle,* Kebaar kʋɩlgã noore, Kalde nebã soolmẽ wã.+ Be, a Zeova nugã zĩnda a zugu.+

4 Mam sẽn wa n getẽ wã, mam yãa sob-kãseng+ sẽn yi rɩtg n watẽ, n paas sawad-kãseng la bugum sẽn yãgde,*+ tɩ vẽenem gũbg-a. Bũmb sẽn wõnd elɛgtrom* n da be bugmã sʋka.+ 5 Bũmb sẽn wõnd bõn-vɩɩs a naas+ n da be bugmã pʋgẽ, tɩ bõn-vɩɩg fãa wõnd ninsaala. 6 B fãa ra tara nens a naas-naase, la pɩgs a naas-naase.+ 7 B naoã ra yaa tɩrse, n da tar nao-bend sẽn wõnd nag-bil nao-bendo. B naoã ra pɩnda wa zũud b sẽn tẽg tɩ pɩnda.+ 8 B ra tara nus sẽn wõnd ninsaal nus b pɩgsã tẽngre, kɩrems a naasã fãa. B naasã fãa ra tara nens la pɩgsa. 9 B pɩgsã ra sɩɩsda taaba. B sã n kẽnda, b pa wẽnemded ye. B fãa ra teesda tɩrg n kẽnda.+

10 Ad b nensã sẽn da wõnd bũmb ninga: B naasã fãa ra tara ninsaal neng ne gɩgemd+ neng tɩ be rɩtgo, la loalg+ neng tɩ be goabga. B naasã fãa ra tara sɩlg+ neng me.+ 11 B nensã ra yaa woto. B pɩgsã ra tẽeg n teesa yĩngri. B fãa ra tara pɩgs a yiib sẽn sɩɩsd taaba, la pɩgs a yiib sẽn lud b yĩnsã.+

12 B fãa ra teesda tɩrga, n kẽngd zĩig ning fãa Wẽnnaam vʋʋsmã sẽn tusd-b tɩ b kẽnge.+ B sã n wa kẽnda, b pa wẽnemded ye. 13 Bõn-vɩɩsã yalẽ wã ra yaa wa bug-saal sẽn wita. Bũmb sẽn da wõnd bug-vɩlens sẽn wit wʋsg n da yuumd poorẽ la taoor bõn-vɩɩsã sʋka, tɩ sa-yãgb ra yit bugmã pʋgẽ.+ 14 Bõn-vɩɩsã sã n wa kẽngd taoor la b lebgdẽ, b tʋʋlmã yaa wa sa-yãgbo.

15 Mam sẽn wa n get bõn-vɩɩsã, mam yãame tɩ ruzãnt n be tẽnga, bõn-vɩɩg sẽn tar nens a naas fãa sɛɛga.+ 16 Ruzãnt-rãmbã ra pɩnda wa kirzolit kugri, tɩ bãmb b naasã fãa wõnd taaba. B maan-b lame tɩ yaa wa ruzãnt sẽn sag a to pʋgẽ.* 17 B sã n wa kẽnda, b tõe n teesa kɩrems a naasã fãa n pa wẽnemd ye. 18 B ruzãnt-rãmbã ra yaa zãnts wʋsg hal n kẽesd rabeem. Ruzãnt-rãmb a naasã fãa ra tara nin zĩig fãa.+ 19 Bõn-vɩɩsã sã n wa kẽnd fãa, ruzãnt-rãmbã me tũud-b lame n kẽnda. Bõn-vɩɩsã sã n zẽk yĩngri, ruzãnt-rãmbã me tũud n zẽkame.+ 20 B ra kẽnda zĩig ning fãa Wẽnnaam vʋʋsmã sẽn tusd-b tɩ b kẽnge, rat n yeel tɩ vʋʋsmã sẽn kẽngẽ fãa. Ruzãnt-rãmbã ra naagd-b lame n zẽke, bala vʋʋsem ning sẽn wilgd bõn-vɩɩsã sorã* ra bee ruzãnt-rãmbã pʋsẽ me. 21 Bõn-vɩɩsã sã n da kẽnda, bãmb me kẽndame. B sã n wa yaase, bãmb me yaasdame. B sã n wa zẽk yĩngri, ruzãnt-rãmbã me naagd-b lame n zẽke, bala vʋʋsem ning sẽn wilgd bõn-vɩɩsã sorã ra bee ruzãnt-rãmbã pʋsẽ me.

22 Bõn-vɩɩsã zugẽ, bũmb sẽn yɛdg n wõnd sa-gãongã n da be be, n yaa yɩlll wa galaas sẽn yaa neer wʋsgo. A ra yɛdga bõn-vɩɩsã zugẽ wã.+ 23 B pɩgsã ra tẽega* tɩrg bũmb ning sẽn wõnd sa-gãongã tẽngre, n sɩɩsd taaba.* Bõn-vɩɩg fãa ra tara pɩgs a yiib sẽn na yɩl n lut a yĩngã kɩreng a ye, la pɩgs a yiib sẽn na n lut a yĩngã kɩreng a to wã. 24 Mam sẽn wʋm b pɩgsã rãamdã, ra yaa wa koom sẽn zoet ne pãng rãamde, wa Sẽn-tõe-a-fãa wã rãamde.+ B sã n kẽnda, rãamdã yaa wa tãb-biis wʋsg rãamde. B sã n wa yaase, b sikda b pɩgsã.

25 Koɛɛg n da yit bũmb ning sẽn wõnd sa-gãongã sẽn be b zugẽ wã zugẽ. (B sã n wa yaase, b sikda b pɩgsã.) 26 Bũmb ning sẽn wõnd sa-gãongã sẽn be b zugẽ wã zugẽ, bũmb n da be be n yaa wa safɩɩr kugri.+ A ra wõnda geere.+ Bũmb sẽn yaa wa ninsaal n da zĩ geerã sẽn be hal yĩngrã zugu.+ 27 Mam yãa bũmb sẽn pɩnd wa elɛgtrom+ n yaa wa bugum sẽn yãgda, tɩ be zĩig ning sẽn wõnd yaa a sɛɛgã tɛk n tar n dʋʋdã. A sɛɛgã tɛk n tar n sigda, mam yãa bũmb sẽn wõnd bugum.+ Vẽenem sẽn yãgd n gũbg-a, 28 wa saag-gomtɩʋʋg+ sẽn be sawadgẽ saag niib daare. Vẽenemã sẽn gũbg-a wã ra yaa woto. Ra wõnda a Zeova ziirã.+ Mam sẽn yã-a wã, mam lʋɩɩme n fõgen m neng tẽnga, n wʋmd ned sẽn gomde.