Bʋ-kaoodbã sebre

10 A Abimelɛk loogr poore, a Tola sẽn yaa Isakaar buudã nedã n yik n na n fãag Israyɛll nebã.+ Yẽ yaa a Puwa biiga, t’a Puwa yaa a Dodo biiga. A ra bee Samiir sẽn be Efrayim soolmã zĩig ning sẽn yaa tãensã. 2 A bʋʋ Israyɛll nebã yʋʋm pisi la a tãabo. La a kiime tɩ b mum-a Samiiri.

3 A loogr poore, a Zayɩɩr sẽn yaa Galaad nedã n bʋ Israyɛll nebã yʋʋm pisi la a yiibu. 4 A ra tara kom-dibli pis-tã sẽn da zombd bõens pis-tã, la b ra tar tẽns pis-tã b sẽn ket n boondẽ tɩ Havot-zayɩɩre.+ B bee Galaad soolmẽ wã. 5 A Zayɩɩr wa n kiime tɩ b mum-a Kamon.

6 Israyɛll nebã le maana sẽn yaa wẽng a Zeova nifẽ.+ Bãmb sɩngame n pʋʋsd Baal-rãmbã,+ a Astarte bõn-naandsã, Aram* wẽnnaam-dãmbã, Sɩdõ wẽnnaam-dãmbã, Mowaab wẽnnaam-dãmbã,+ Amon nebã wẽnnaam-dãmbã+ la Filisti nebã wẽnnaam-dãmbã.+ Bãmb basa a Zeova n pa le tũud-a ye. 7 Dẽ, a Zeova sũur puuga ne Israyɛll nebã, t’a ning-b* Filisti ne Amon nebã nugẽ.+ 8 Woto, bãmb weooga Israyɛll nebã, n nams-b wʋsg yʋʋm-kãngã. Bãmb namsa Israyɛll nebã yʋʋm piig la a nii Zʋrdẽ kʋɩlgã rʋʋnd ning sẽn be Galaade, Amoor nebã soolmẽ wã. 9 Sẽn paase, Amon nebã ra rʋʋgda Zʋrdẽ kʋɩlgã n zabd ne Zida buudã nebã, Bẽnzame buudã nebã la Efrayim roogã nebã. La Israyɛll nebã nimbãanegã ra yaa wʋsgo. 10 Israyɛll nebã boola a Zeova n kos sõngr+ n yeel yaa: “Tõnd beega yãmba. Bala tõnd basa yãmb sẽn yaa d Wẽnnaamã, n pʋʋs Baal-dãmba.”+

11 La a Zeova yeela Israyɛll nebã yaa: “Ezɩpt nebã,+ Amoor nebã,+ Amon nebã, Filisti nebã,+ 12 Sɩdõ nebã, Amalɛk nebã la Madiyã nebã sẽn wa n namsd yãmbã, mam pa fãag yãmb sɩda? Yãmb sẽn kelem n bool maamã, mam pa fãag yãmb bãmb nugẽ sɩda? 13 La yãmb basa maam n pʋʋs wẽnnaam-dãmb a taaba.+ Rẽ n so tɩ m pa na n le fãag-y ye.+ 14 Kẽng-y wẽnnaam-dãmb nins y sẽn yãkã nengẽ tɩ b sõng-yã.+ Bɩ bãmb fãag yãmb y toogã pʋgẽ.”+ 15 La Israyɛll nebã leoka a Zeova yaa: “Tõnd beegame. Maan-y tõnd y sẽn date. La yãmb we n fãag-d rũndã bala.” 16 La bãmb yiisa wẽn-sãamsã bãmb sʋka, n tũ a Zeova.+ Rẽ n so tɩ Wẽnnaam da pa le tõe n sĩnd n get Israyɛll nebã namsgã ye.+

17 Amon nebã+ wa n tigma b tãb-biisã, n tilg b sikã Galaade, tɩ Israyɛll nebã me tigim taab n tilg b sikã Mizpa. 18 Galaad nebã ne b nanambsã soka taab yaa: “Ãnd n na n lʋɩ taoor tɩ d tɩ zab ne Amon nebã?+ Bɩ a lebg Galaad nebã fãa naaba.”