Ezekɩyɛll sebre

34 A Zeova le goma ne maam n yeele: 2 “Ninsaal biiga, togs bãngr-gomd n ning Israyɛll pe-kɩɩmbã taale. Togs bãngr-gomd n yeel pe-kɩɩmbã yaa: ‘Ad a Zeova sẽn yaa Zu-soab sẽn ka to wã sẽn yeele: “Toog bee ne Israyɛll pe-kɩɩmbã+ sẽn dɩlgd b mens balã! Pa bãgrã la pe-kɩɩmbã segd n dɩlg sɩda?+ 3 Yãmb rɩta rũmsã kaam, n yãkd b kõbdã n maand fut n yerẽ, n kʋʋd rũms nins sẽn nob sõma wã,+ la y yaool n pa rɩlgd bãgrã ye.+ 4 Yãmb pa paas sẽn pa tar-b pãngã pãnga, y pa tɩp sẽn bẽed-bã, y pa vil sẽn pogl-bã noada, y pa tall sẽn lak-bã n lebg n wa, y pa gẽes sẽn menem-bã me ye.+ Yãmb pʋd n soog-b-la ne toolem, la y weoog-ba.+ 5 Woto kɩtame tɩ b sãeege, b sẽn da pa tar pe-kɩɩmã yĩnga.+ B sãeegame n lebg we-rũmsã buud fãa sẽn be weoogẽ wã rɩɩbo. 6 Mam piisã ra yeebda tãensã fãa zut la kunkub-zãntsã fãa zutu. Mam piisã sãeega dũniyã gill zugu, tɩ ned baa a ye pa sa n gẽes-ba, wall a bao n na n yã-b ye.

7 “‘“Woto wã, yãmb a pe-kɩɩmba, kelg-y-yã a Zeova sẽn yeele: 8 ‘A Zeova sẽn yaa Zu-soab sẽn ka to wã yeelame: “M wẽenda ne m meng tɩ mam piisã lebga bũmb we-rũms sẽn yõgd n wãbdẽ, we-rũmsã buud fãa sẽn be weoogẽ wã rɩɩbo, b sẽn pa tar pe-kɩɩmã yĩnga, la mam pe-kɩɩmbã sẽn pa gẽes mam piisã yĩnga. B pʋd n dɩlgda b mens wakat fãa, n pa rɩlgd mam piisã ye.”’ 9 Woto yĩnga, yãmb a pe-kɩɩmba, kelg-y-yã a Zeova goamã. 10 Ad a Zeova sẽn yaa Zu-soab sẽn ka to wã sẽn yeele: ‘Mam na n zaba ne pe-kɩɩmbã. M na n sok-b-la mam piisã yĩnga.* Mam na n dig-b lame tɩ b ra le rɩlg* mam piisã ye.+ Pe-kɩɩmbã pa na n le rɩlg b mens me ye. M na n fãaga m piisã b noyẽ wã, tɩ b ra le yɩ b rɩɩb ye.’”

11 “‘Bala ad a Zeova sẽn yaa Zu-soab sẽn ka to wã sẽn yeele: “Kelg-y-yã! Mam meng n na n gẽes m piisã. M na n gesa b yelle.+ 12 Mam na n gesa m piisã yell wa pe-kɩɩm sẽn yã a piis sẽn da sãeege, n dɩlgd-ba.+ Mam na n fãag-b lame, n yiis zĩis nins fãa b sẽn da sãeeg n kẽng sawat la lik bida daarã.+ 13 Mam na n yiis-b-la buud toɛy-toɛyã sʋka, n tigim-b n yiis soolem toɛy-toɛyã pʋsẽ n tall-b n wa b soolmẽ wã, la m dɩlg-b Israyɛll tãensã zutu,+ kʋɩlsã noya, la soolmã zĩis nins fãa neb sẽn be wã seesẽ. 14 Mam na n dɩlg-b-la rũms wãbneg zĩig sẽn yaa sõma pʋgẽ. Zĩis nins b sẽn na n wãbd yamdã na n yɩɩ Israyɛll tãens nins sẽn yaa zãntsã zutu.+ B na n gãanda yamd sẽn waoogẽ.+ B na n wãba rũms wãbneg zĩis nins sẽn yaa sõma wʋsgã yamdo, Israyɛll tãensã zutu.”

15 “‘“Maam m toor n na n dɩlg m piisã.+ Mam mengã n na n kɩt tɩ b gãande.”+ Yaa a Zeova sẽn yaa Zu-soab sẽn ka to wã n yeele. 16 “Mam na n gẽesa sẽn menem-bã,+ n tall sẽn lak-bã n lebg n wa, n vil sẽn pogl-bã noada, la m paas sẽn pa tar-b pãngã pãnga. La m na n menesa sẽn nob b rãmbã ne sẽn tar-b pãngã. Mam na n kaoo b bʋʋdo, n sɩbg ned kam fãa tɩ zems a sẽn segd ne sɩbgr ningã.”

17 “‘Sã n yaa ne yãmb sẽn yaa mam piisã, ad a Zeova sẽn yaa Zu-soab sẽn ka to wã sẽn yeele: “Ka la bilfu, mam na n kaoo bʋʋd pesg ne a to sʋka, la pe-raadã ne boeesã sʋka.+ 18 Yãmb sẽn wãbd yamd rũms wãbneg zĩis nins sẽn yaa sõma wʋsgã pa sek yãmba? Yãmb segd n wẽneg n taba y wãbnegã zĩisẽ yamdã sẽn ketã ne nao sɩda? Yãmb sẽn yũ koom sẽn yaa yɩlem wʋsgã poore, yãmb segd n taba koomã n bendg ne y naoã sɩda? 19 Mam piisã segd n wãba yamd zĩig ning yãmb sẽn tab ne y naoã, la b yũ koom ning yãmb sẽn bendg ne y naoã sɩda?”

20 “‘Woto wã, ad a Zeova sẽn yaa Zu-soab sẽn ka to wã sẽn yet-ba: “Kelg-y-yã! Maam m toor n na n kao bʋʋd pe-nobdsã ne pe-wagã sʋka, 21 bala yãmb da tusda sẽn bẽed-bã fãa ne y lʋgã la y bãgdã, la y tã-b ne y yɩɩlã hal n wa sãeeg-b tɩ b zãage. 22 Mam na n fãaga m piisã. B pa na n le yɩ bũmb we-rũms sẽn yõgd n wãbdẽ ye.+ Mam na n kaoo bʋʋd pesg ne a to sʋka. 23 Mam na n yãka pe-kɩɩm a yembr t’a soog-ba.+ Yaa mam tʋm-tʋmd a Davɩɩde.+ A na n dɩlg-b lame. Yẽ meng n na n dɩlg-ba, la a lebg b pe-kɩɩma.+ 24 Maam a Zeova n na n lebg b Wẽnnaam,+ tɩ mam tʋm-tʋmd a Davɩɩd yɩ b naaba.+ Yaa maam a Zeova meng n gome.

25 “‘“Mam na n maana laafɩ kaool ne-ba,+ la m dig we-rũms nins sẽn yaa toosã soolmã pʋgẽ,+ sẽn na yɩl tɩ b tõog n zĩnd ne bãan we-raoogẽ wã, la b gãand kãgẽ wã.+ 26 Mam na n kɩtame tɩ bãmb ne zĩig ning sẽn gũbg mam kunkubrã paam barka.*+ Mam na n kɩtame tɩ saagã niid a wakate. Bark toor-toor n na n kiig wa saaga.+ 27 Weoogã tɩɩsã na n womame, tɩ tẽngã bõn-koaadlã me wome.+ Mam nebã na n zĩnda bãan soolmã pʋgẽ. Mam sã n wa kaoog b yubl-balgdgã, la m fãag-b neb nins sẽn kẽes-b yembdã nusẽ,+ b na n bãngame tɩ mam yaa a Zeova. 28 B pa na n le yɩ bũmb bu-zẽmsã sẽn na n digd n yõgd ye. Tẽngã we-rũmsã pa na n le wãb-b ye. B na n zĩnda bãane, tɩ ned kae n kẽesd-b rabeem ye.+

29 “‘“Mam na n bʋda pʋʋg yʋʋr sẽn na n yi* n kõ-ba. B pa na n le ki kom soolmã pʋgẽ ye.+ Bu-zẽmsã pa na n le paoog-b ye.+ 30 ‘Dẽ, b na n bãngame tɩ maam a Zeova sẽn yaa b Wẽnnaamã bee ne-ba, la tɩ bãmb a Israyɛll buudã neb yaa mam nin-buiidu.’+ Yaa a Zeova sẽn yaa Zu-soab sẽn ka to wã n yeele.”’

31 “‘Sã n yaa ne yãmb sẽn yaa mam piisã,+ piis nins yell mam sẽn getã, yãmb yaa ninsaalb bala, tɩ mam yaa yãmb Wẽnnaam.’ Yaa a Zeova sẽn yaa Zu-soab sẽn ka to wã n yeele.”