Tõod sebre
16 “Tẽegd-y Abiib* kiuugã yelle, n maand Pakã yãmb Wẽnnaam a Zeova yĩnga.+ Bala yɩɩ Abiib kiuug la yãmb Wẽnnaam a Zeova yiis yãmb Ezɩpt soolmẽ wã ne yʋngo.+ 2 Y segd n yãka rũng rũm-bɛdã ne rũm-bõonegã+ sʋk n kʋ Pakã maoongã yãmb Wẽnnaam a Zeova yĩnga,+ zĩig ning a Zeova sẽn na n yãk n ning a yʋʋrã.+ 3 Yãmb pa segd n naag-a ne bũmb sẽn ning rabɩll n wãb ye.+ Y segd n wãba bur sẽn pa ning rabɩlle, sẽn yaa namsg burã rasem a yopoe pʋgẽ. Bala yãmb yii Ezɩpt soolmẽ wã ne yãgbo.+ Maand-y woto y vɩɩmã tõre, n tẽegd daar ning y sẽn yi Ezɩpt soolmẽ wã.+ 4 Rasem a yopoe pʋgẽ, b pa segd n yã rabɩll* yãmb nengẽ y soolmã fãa pʋgẽ ye.+ Pipi daarã zaabr maoongã nemd me pa segd n pa yʋngã tõr n vẽeg beoog ye.+ 5 B pa na n bas tɩ y kʋ Pakã maoongã tẽng ning fãa yãmb Wẽnnaam a Zeova sẽn na n kõ yãmbã pʋgẽ ye. 6 Yãmb segd n kʋʋ maoongã zĩig ning y Wẽnnaam a Zeova sẽn na n yãk n ning a yʋʋrã. Yãmb segd n kʋʋ Pakã maoong zaabre, wĩndgã sẽn wat n kẽ bala,+ wa sẽn zems daar ning b sẽn yãk tɩ yãmb yi Ezɩpt soolmẽ wã. 7 Yãmb segd n sẽe nemdã n wãb+ zĩig ning yãmb Wẽnnaam a Zeova sẽn na n yãkã,+ tɩ yibeoogã bɩ y leb y fu-rotẽ wã. 8 Yãmb segd n wãba bur sẽn pa ning rabɩll rasem a yoobe. La rasem a yopoe-n-soabã na n yɩɩ tigsg sẽn yaa zall yãmb Wẽnnaam a Zeova yĩnga. Y pa segd n tʋm tʋʋmd ye.+
9 “Yãmb segd n sõda rasem a yopoe naoor a yopoe. Y segd n sɩnga rasem a yopoe naoor a yopoe wã sõadg daar ning y sẽn na n dɩk y goetã n sɩng y koodã wʋrbo.+ 10 Yãmb segd n talla y yamleoog kũunã, n maan Kẽebgã tigrã* yãmb Wẽnnaam a Zeova yĩnga.+ Y segd n kõo y kũunã tɩ zems yãmb Wẽnnaam a Zeova sẽn ning yãmb bark to-to wã.+ 11 Sẽn paase, yãmb ne y kom-dibli wã, y kom-pugli wã, y yem-daadã, y yem-pogsã, Levi buudã neb sẽn be yãmb tẽnsẽ wã,* sãambã, kɩɩbsã,* la pʋg-kõapã sẽn be yãmb sʋkã segd n kɩdma sũ-noog yãmb Wẽnnaam a Zeova taoore, zĩig ning yãmb Wẽnnaam a Zeova sẽn na n yãk n ning a yʋʋrã.+ 12 Tẽeg-y tɩ yãmb me ra yaa yembs Ezɩpt soolmẽ wã.+ Woto wã, sak-y no-kãensã fãa la y tũ-ba.
13 “Yãmb segd n maana Zãn tigrã+ rasem a yopoe, yãmb sã n wa tigs y zɛɛgã koodo, la y wẽkr bogdã kaam ne b divẽ wã n sa. 14 Kɩdem-y sũ-noog y tigrã sasa,+ yãmb ne y kom-dibli wã, y kom-pugli wã, y yem-daadã, y yem-pogsã, Levi buudã nebã, sãambã, kɩɩbsã la pʋg-kõapã sẽn be yãmb tẽnsẽ wã. 15 Yãmb na n maana tigrã rasem a yopoe+ y Wẽnnaam a Zeova yĩnga, zĩig ning a Zeova sẽn na n yãkã. Bala yãmb Wẽnnaam a Zeova na n ninga y koodã fãa, la bũmb nins y sẽn maandã fãa barka.+ Yãmb na n kɩdma sũ-noog wʋsgo.+
16 “Yʋʋmd fãa, yãmb kom-dibli wã fãa segd n waa y Wẽnnaam a Zeova taoor naoor a tãabo, zĩig ning a sẽn na n yãkã. Yaa bur sẽn pa ning rabɩll tigrã,+ Kẽebgã tigr*+ la Zãn tigrã+ sasa. La b ned baa a ye pa segd n wa a Zeova taoor nug-zaal ye. 17 Kũun ning ned kam fãa sẽn na n wa ne wã segd n zemsa yãmb Wẽnnaam a Zeova sẽn ning-a bark to-to wã.+
18 “Yãmb segd n yãka bʋ-kaoodba,+ la taoor dãmb buud fãa yĩnga, tẽns nins y Wẽnnaam a Zeova sẽn kõ yãmbã fãa pʋsẽ. B segd n kaooda nin-buiidã bʋʋd ne tɩrlem. 19 Yãmb pa segd n kao bʋʋd kɛgr ye.+ Y pa segd n bak ned n sõnge,+ wall y sak noor-madgr ye. Bala noor-madgr luta yam dãmb nini,+ la a golemd nin-tɩrg goama. 20 Yãmb segd n baoo tɩrlem. Yãmb segd n baoo tɩrlem bala,+ sẽn na yɩl n kell n vɩɩmd la y soog soolem ning yãmb Wẽnnaam a Zeova sẽn na n kõ yãmbã.
21 “Yãmb pa segd n sel tɩɩg buud baa a ye n pẽneg tẽn-kugrã y sẽn maan yãmb Wẽnnaam a Zeova yĩngã, tɩ yɩ ra-luk buud y sẽn lugl n pʋʋsdẽ* ye.+
22 “Yãmb pa segd me n lugl kug n pʋʋsdẽ ye.+ Yaa bũmb yãmb Wẽnnaam a Zeova sẽn kisi.