Tõod sebre
25 “Zabr sã n yik neb a yiib sʋka, b segd n kẽnga bʋ-kaoodbã nengẽ,+ tɩ b kao b bʋʋdo, n kõ sẽn tar-a bʋʋmã bʋʋm la b ning sẽn pa tar-a bʋʋmã taale.+ 2 Sẽn pa tar-a bʋʋmã sã n segda ne pãbre,+ bʋ-kaoodã na n kɩtame t’a gãand a pʋgã zugu, tɩ b pãb-a bʋ-kaoodã taoore. B segd n pãb-a lame tɩ zems a tʋʋmdã wẽnem sẽn ta zĩig ningã. 3 B tõe n wẽ-a-la naoor pis-naase,+ la pa segd n zʋʋg rẽ ye. B sã n kell n pãb-a n zʋʋg woto, y saam-biigã na n paama yãnd yãmb nifẽ.
4 “Loalg sã n wa tʋmd zɛɛgẽ, yãmb pa segd n ning a noorã yʋk ye.+
5 “Ba-biis sã n be ne taaba, t’a yembr ki n pa paam bi-ribla, sẽn ki-a wã pag pa segd n kẽ kãadem ne ned sẽn pa zakã ned ye. Sẽn ki-a wã ba-biigã segd n dɩk-a lame n maan a paga. A segd n maana bũmb ning a sẽn tog n maanã, n kẽ kãadem ne-a.+ 6 Pipi bi-ribl a sẽn na n dogã na n deega a ba-biigã sẽn maan kaalmã yʋʋre,+ t’a yʋʋrã ra menem Israyɛll ye.+
7 “La raoã sã n pa rat n kẽ kãadem ne a ba-biigã pʋg-kõore, pʋg-kõorã segd n kẽnga kãsem-dãmbã nengẽ tẽngã rignoorẽ n tɩ yeel yaa: ‘Mam sɩdã ba-biigã zãgsame t’a kõn ges t’a ba-biigã yʋʋr da menem Israyɛll ye. A pa sak n na n maan bũmb ning a sẽn tog n maanã, n kẽ kãadem ne maam ye.’ 8 Tẽngã kãsem-dãmb segd n bool-a lame n gom ne-a. A sã n kell n pẽdgd n yetẽ yaa: ‘M pa rat n kẽ kãadem ne-a,’ 9 a ba-biigã pʋg-kõorã tog n kolga raoã kãsem-dãmbã taoore, n pidg raoã neoodre,+ n tʋbs a nengã kolkoodo, la a yeele: ‘Yaa woto la b segd n maan rao sẽn zãgs t’a kõn ges t’a ba-biig paam kamba.’ 10 Rẽ poore, Israyɛll soolmẽ wã, b na n boonda a roogã rãmb* tɩ ‘ned ning b sẽn pidg a neoodrã roogo.’
11 “Rap a yiib sã n zabd taaba, t’a yembr pag wa kẽ sʋk n na n sõng a sɩdã, n tẽeg a nug n gãd rao a to wã raoolem, 12 yãmb segd n fiuuga pagã nugu. Yãmb pa segd n zoe a nimbãaneg ye.
13 “Yãmb pa segd n ning kɩlo* toor-toor a yiib b sẽn maan ne kug y korgẽ,+ t’a yembr yaa bedr t’a to wã yaa bilf ye. 14 Yãmb pa segd n tall bõn-makds toor-toor a yiib y zakẽ,*+ t’a yembr yaa bedr t’a to wã yaa bilf ye. 15 Yãmb segd n talla kɩlo* sẽn yaa sõma la sẽn zemse, la makdg sẽn yaa sõma la sẽn zemse, sẽn na yɩl n vɩɩmd n kaoos soolem ning yãmb Wẽnnaam a Zeova sẽn kõ yãmbã pʋgẽ.+ 16 Bala yãmb Wẽnnaam a Zeova kisa zãmb soab sẽn maand woto.+
17 “Tẽeg-y Amalɛk nebã sẽn maan yãmb bũmb ning sorã zugã, yãmb sẽn wa n yi Ezɩptã,+ 18 b sẽn seg yãmb sorã zugu, n zab ne yãmb neb nins fãa sẽn da be poorẽ wã, yãmb sẽn da yɛ, n pa le tar pãngã sasa. B pa zoe Wẽnnaam ye. 19 Yãmb Wẽnnaam a Zeova sã n wa kɩt tɩ y paam y mens ne y bɛɛbã fãa sẽn gũbg yãmbã, soolem ning yãmb Wẽnnaam a Zeova sẽn na n kõ yãmb tɩ yɩ y pʋɩɩrã pʋgẽ,+ y segd n menesa Amalɛk nebã fãa fasɩ saasã tẽngre.+ Y pa segd n yĩm dẽ ye.