Sãmwɛll sebr a yiib-n-soaba
23 Gom-kãensã yaa a Davɩɩd yaoolem goama:+
“Yaa a Zese* biig a Davɩɩd goama,+
a soab ning b sẽn zẽkã,+
a Zakoob Wẽnnaamã sẽn yãk* a soabã,+
Israyɛll yɩɩlã koko-noog soabã goama.+
‘Sẽn dɩt-a naam ninsaalbã zugã sã n yaa tɩrga,+
n dɩt a naamã ne wẽn-zoeere,+
4 yaa wa sãoor sẽn puk yibeoog t’a vẽenemã yãgda,+
wa yibeoog sawat sẽn kae.
A naamã yaa wa saag sẽn ni n yoog tɩ zĩigã yaa vẽenega,
n kɩtdẽ tɩ mood yit tẽngã zugu.’+
5 Mam doogã yaa woto Wẽnnaam taoore.
Yẽ maana kaool sẽn paad wakat fãa ne maam,+
t’a bũmba fãa maneg sõma n zemse, n pa tõe n toeem ye.
Bala kaoolã na n kɩtame tɩ mam paam fãagr la sũ-noog zãng-zãnga.
Yaa rẽ la Wẽnnaam sẽn na n pids kaool-kãngã.+
6 La b na n loba neb nins sẽn ka barkã+ wa gõos tuudu.
Bala b pa tõe n dɩk-b ne nug ye.
7 Ned sã n dat n sɩɩs-ba,
a segd n zãada kut la kãnd raoogo.
La b segd n yõog-b lame tɩ b rɩ bugum tẽma.”
8 Ad a Davɩɩd gãndaadã yʋya:+ A Zosɛɛb-basebɛt sẽn yaa Takmoon raoã. Yẽ n da yaa gãndaad a tãabã taoor soaba.+ A talla a kãndã n kʋ neb kobs-nii daar-n-yɛnga. 9 Yiib-n-soabã yaa a Ahoyi biig a Dodo+ biig a Eleazaare.+ Yẽ naaga gãndaad a tãabã sẽn da be ne a Davɩɩd b sẽn da wa n bao Filisti nebã noorã. Bãmb da tigmame n na n zabe. La Israyɛll nebã sẽn zoe wã, 10 a Eleazaar yalsa a nao zug n zab ne Filisti nebã n kʋ-b hal t’a kangã wa yɛ, t’a nugã ki, a sẽn da zãad sʋʋgã yĩnga.+ Baraare, a Zeova kɩtame tɩ b paam tõogr* sẽn yɩ kãsenga,+ la nin-buiidã pʋgla a Eleazaar n tɩ zɛ sẽn ki-bã teedo.
11 Gãndaoog a tãab-n-soabã yaa a Sama sẽn yaa Haraar dao a Aage biigã. Filisti nebã tigma taab Leyi. Bɛng pʋʋg n da be beenẽ. Nin-buiidã zoee Filisti nebã yĩnga. 12 La a Sama kell n yalsa pʋʋgã tẽn-sʋk n zab n kogl-a. A kʋʋ Filisti nebã hal t’a Zeova kɩt tɩ b paam tõogr* sẽn yɩ kãsenga.+
13 Nanambs pis-tã wã neb a tãab n kẽng a Davɩɩd nengẽ Adulam+ tãngã bokẽ kẽebgã wakate. Rẽ tɩ Filisti nebã tãb-sik n da be Refayim longẽ wã.+ 14 A Davɩɩd ra bee zĩ-soalgdgẽ wã,+ tɩ Filisti nebã tãb-biis sull da be Betlehɛm. 15 A Davɩɩd wa n yeelame: “Mam sã n da tõe n paam bulg ning sẽn be Betlehɛm noorã koom n yũ, m sũur yɩtẽ-la noogo!” 16 Gãndaad a tãabã sẽn wʋm dẽ wã, b kẽe Filisti nebã tãb-sikẽ wã ne pãnga, n pɩʋʋg n ta bulgã sẽn be Betlehɛm noorã, n yõng koomã n wa kõ a Davɩɩde. La a Davɩɩd zãgsame t’a kõn yũ, n daag-a n kõ a Zeova.+ 17 A yeelame yaa: “Zeova, mam kõn saag n maan bõn-kãngã ye! Mam na yũ nin-kãensã sẽn gẽneg b yõyã* zɩɩm?”+ A zãgsame t’a kõn yũ koomã ye. Yaa bõn-kãensã la a Davɩɩd gãndaad a tãabã maan-yã.
18 A Seruya+ biig a Zowaab kẽem a Abisayi+ n da yaa gãndaad a tãab sull a to taoor soaba. Daar a ye, yẽ talla a kãndã n kʋ neb kobs-tã. A yʋʋrã ra yii wa pipi gãndaad a tãabã.+ 19 La baa a sẽn da yaa gãndaad a tãab kãensã taoor soaba, t’a yʋʋr yi n yɩɩdã, a pa ta pipi gãndaad a tãabã zĩigẽ ye.
20 A Zehoyada biig a Benaya+ yɩɩ raood soab sẽn tʋm gãnda-tʋʋm wʋsg Kabzeyɛlle.+ Yẽ n kʋ Mowaab rao a Ariyɛll kom-dibli a yiibã, la a kẽ bok pʋgẽ daar a ye n kʋ gɩgemd+ sa-lamd niib wakate. 21 Leb n yaa yẽ n kʋ Ezɩpt nedã sẽn da yaa nin-wobgã. Ezɩpt nedã ra zãada kãnd a nugẽ, la a Benaya talla raoog bal n zab ne-a, n fãag a kãndã n wẽneg n kʋ-a. 22 Yaa a Zehoyada biig a Benaya n maan bõn-kãensã. A yʋʋrã ra yii wa pipi gãndaad a tãabã. 23 La baa a yʋʋrã sẽn da yi n yɩɩd gãndaad pis-tã wã sʋkã, a pa ta pipi gãndaad a tãabã zĩigẽ ye. La a Davɩɩd yãk-a lame t’a lebg a gũudbã naaba.
24 A Zowaab yao a Asayɛll+ ra naaga gãndaad pis-tã wã: Yaa Betlehɛm dao a Dodo+ biig a Ɛlhanan, 25 Harood rao a Sama, Harood rao a Elika, 26 Pelɛt rao a Helɛɛze,+ Tekowa rao a Ikɛs biig a Ira,+ 27 Anatot rao+ a Abiyezɛɛre,+ Husa rao a Mebunayi, 28 Ahoyi buudã ned a Zalmon, Netofa rao a Maharayi,+ 29 Netofa rao a Baana biig a Helɛɛd, Gibeya sẽn be Bẽnzame soolmẽ wã rao a Ribayi biig a Itayi, 30 Piraton rao a Benaya,+ a Hidayi sẽn yit Gaas+ ko-soayẽ wã, 31 Bɛt-araba rao a Abi-albon, Bawurim rao a Azmavɛte, 32 Saalbim rao a Eliyaba, a Zasɛm kom-dibli wã, a Zonatã, 33 Haraar dao a Sama, Haraar dao a Saraar biig a Ahiyam, 34 a Elifelɛt sẽn yaa a Aasbayi sẽn yaa Maakat rao biigã, Gilo rao a Ahitofɛll+ biig a Eliyam, 35 Karmell rao a Heezro, Arab rao a Parayi, 36 Zoba rao a Natã biig a Yigalle, Gaad buudã rao a Bani, 37 Amon rao a Zelɛk, Beerot rao a Naharayi sẽn da zãad a Seruya biig a Zowaab zab-teedã, 38 Zetɛɛr dao a Ira, Zetɛɛr+ dao a Garɛɛbe, 39 la Hɛt rao a Uuri.+ B fãa ra yaa neb pis-tã la yopoe.