Ezekɩyɛll sebre

21 A Zeova le goma ne maam n yeele: 2 “Ninsaal biiga, wẽnemd f neng n tees Zerizalɛm, n moon koɛɛg zĩ-sõamyã wã wɛɛngẽ, la f togs bãngr-goam Israyɛll soolmã wɛɛngẽ. 3 Yeel Israyɛll soolmã yaa: ‘Ad a Zeova sẽn yeele: “Mam na n zaba ne foo. Mam na n wõoga m sʋʋgã a wʋʋgẽ wã,+ n kʋ nin-tɩrsã ne nin-wẽnsã fãa sẽn be fo pʋgẽ wã. 4 Mam sẽn na n kʋ nin-tɩrsã ne nin-wẽnsã fãa sẽn be fo pʋgẽ wã yĩnga, mam na n wõoga m sʋʋgã a wʋʋgẽ wã nebã* fãa yĩnga, sẽn sɩng goabg n tãag rɩtgo. 5 Nebã fãa na n bãngame tɩ yaa maam a Zeova meng n wõog m sʋʋgã a wʋʋgẽ wã. A pa na n le kẽ be ye.”’+

6 “La foom a ninsaal biiga, wẽed sir la f rigda.* Wẽ sir ne sũ-toog b taoore.+ 7 B sã n sok foo tɩ ‘bõe yĩng tɩ fo wẽed siri,’ bɩ f yeel yaa: ‘Yaa koe-beed yĩnga.’ Bala sãmbg sẽn kae, a na n waame, tɩ sũyã fãa bondg ne rabeem, tɩ nusã fãa ki n pa le tar pãnga, tɩ ned fãa sũur sãame, la tɩ rũmã fãa sodg koom.*+ ‘Kelg-y-yã! Sãmbg sẽn kae, a na n waame. A na n pidsame.’ Yaa a Zeova sẽn yaa Zu-soab sẽn ka to wã n yeele.”

8 A Zeova le goma ne maam n yeele: 9 “Ninsaal biiga, togs bãngr-gomd n yeele: ‘Ad a Zeova sẽn yeele: “Yeel yaa: ‘Sʋʋga! B saasa sʋʋga,+ la b tẽg-a t’a pɩnda. 10 B saas-a lame n na n kʋ neb wʋsgo. B tẽg-a lame sẽn na yɩl t’a pɩnda, n yãgd wa sa-yãgbo.’”’”

“D pa segd n kɩdem sũ-noog sɩda?”

“‘A* na n zãgsa mam bi-roakã naam dasaarã+ wa a sẽn zãgsd tɩɩg buud fãa wã bɩ?

11 “‘B rɩka sʋʋgã n kõ tɩ b tẽg-a t’a pɩle, la sẽn na yɩl tɩ b tall-a n kʋ neba. B saasa sʋʋgã la b tẽg-a t’a pɩnda, sẽn na yɩl tɩ b rɩk-a n ning ned b sẽn yãk t’a kʋ nugẽ.+

12 “‘Ninsaal biiga, zẽk f koɛɛg n yãb la f wiisi,+ bala sʋʋgã waa mam nin-buiidã yĩnga. A waa Israyɛll nanambsã fãa yĩnga.+ A na n naaga bãmb ne mam nin-buiidã n kʋ. Woto wã, pãb f gerã ne sũ-sãanga. 13 Bala vaeesg n vaeese.+ Sʋʋgã sã n zãgs naam dasaarã, bõe n na n maane? Naam dasaarã pa na n le zĩnd ye.’+ Yaa a Zeova sẽn yaa Zu-soab sẽn ka to wã n yeele.

14 “Foom a ninsaal biiga, togs bãngr-gomd la f wẽ nug-pogse. Yeel naoor a tãab yaa: ‘Sʋʋga!’ Yaa sʋʋg sẽn kʋʋd neb n gũbg-ba,+ sʋʋg sẽn kʋʋd neb wʋsgo. 15 B sũyã na n bondga rabeemã yĩnga.+ Neb wʋsg na n kii b tẽngã rignoyẽ. Mam na n talla sʋʋgã n kʋ neb wʋsgo. A yãgda wa sa-yãgbo. B tẽg-a lame t’a pɩnd kʋʋbã yĩnga! 16 Kɛ rɩtgã sõma! Wẽnemd n kẽng goabga! Kẽng zĩig ning fãa f noorã sẽn teesẽ! 17 Sẽn paase, m na n wẽe nug-pogse, la m kɩt tɩ m sũurã sẽn da puugã sigi.+ Yaa maam a Zeova meng n gome.”

18 A Zeova le goma ne maam n yeele: 19 “Sã n yaa ne foom a ninsaal biiga, rẽeg soay a yiibu, sẽn na yɩl tɩ Babilon rĩmã sʋʋgã tũ n wa. Soay a yiibã fãa segd n sɩnga soolem-yɛng pʋgẽ. Fo segd n ninga bãnd* sẽn wilgd sore, zĩig ning soayã sẽn welg taab n tees galʋ-tẽns a yiibã. 20 Fo segd n rẽega sor a ye sẽn na yɩl tɩ sʋʋgã tũ n wa zab ne Raba+ sẽn yaa Amon nebã tẽngã, la sor a to sẽn na yɩl t’a tũ n wa zab ne Zerizalɛm sẽn yaa tẽng sẽn gũbg ne lalg+ n be Zida wã. 21 Bala Babilon rĩmã yaasa sotiisẽ wã, zĩig ning soay a yiibã sẽn welgã, n na n bʋg bagre. A zugsda pɛɛmã. A sogsda a bõn-naandsã* sogsgo. A vaeesda sãoorã. 22 Bũmb ning a sẽn zãad a nug-rɩtg bagrã yĩngã teesa Zerizalɛm, sẽn na yɩl tɩ b rɩgl zab-teed nins b sẽn tar n lubd lalsã, tɩ b kõ noor tɩ b sɩng kʋʋbo, tɩ b kaas zabr kaasgo, tɩ b rɩgl zab-teed nins b sẽn tar n lubd lalsã rignoyẽ wã, tɩ b zam tãnd sẽn na yɩl n zab ne-a, la b me lalg n gũbg-a.+ 23 La na n wõnda zirẽ-be-bagr neb nins* sẽn wẽen ne bãmbã nifẽ.+ La a tẽega b taalã yell n na n yõk-ba.+

24 “Woto wã, ad a Zeova sẽn yaa Zu-soab sẽn ka to wã sẽn yeele: ‘Yãmb n kɩt tɩ b tẽeg yãmb taalã yelle, y sẽn puk y beegrã, la y sẽn kɩt tɩ y yel-wẽnã yaa vẽenes y tʋʋm-tʋmdɩ wã fãa pʋsẽ wã yĩnga. B sẽn tẽeg yãmb yell masã wã, b na n yõga yãmb ne pãng* n looge.’

25 “La foom a Israyɛll na-wẽng+ b sẽn pogl tɩ yaa kɛgeng wʋsgo, fo daarã taame. Yaa fo yaoolem sɩbgrã wakate. 26 Ad a Zeova sẽn yaa Zu-soab sẽn ka to wã sẽn yeele: ‘Yãk zu-vindgã la f fõk maanfã.+ Yɛlã na n toeemame.+ Zẽk sẽn pa zem-a baa fʋɩ wã,+ la f sik sẽn zẽk-a wã.+ 27 Raboogo! Raboogo! Mam na n kɩtame t’a lebg raboogo.* Ned baa a ye pa na n soog-a, n tãag tõogã sẽn kõ a soab sorã sẽn na n wa,+ tɩ m dɩk n kõ-a.’+

28 “Foom a ninsaal biiga, togs bãngr-gomd n yeele: ‘Ad a Zeova sẽn yaa Zu-soab sẽn ka to wã sẽn yeel Amon nebã la b tʋyã wɛɛngẽ.’ Yeel yaa: ‘Sʋʋga! B wõoga sʋʋg kʋʋb yĩnga. B tẽg-a lame t’a pɩnd sẽn na yɩl n kʋ, la sẽn na yɩl t’a yãg wa sa-yãgbo. 29 Baa ne zirẽ-be-vẽnegr toor-toorã la zirẽ-be-bagrã b sẽn maan fo wɛɛngẽ wã, b na n zama fo kũ-rãmbã neb a taabã b sẽn kʋ wã zutu.* Yaa nin-wẽns nins daar sẽn ta wã zutu, neb nins yaoolem sɩbgrã wakat sẽn ta wã. 30 Lebs-a a wʋʋgẽ wã. Mam na n kaoo fo bʋʋd zĩig ning b sẽn naan foomã, soolem ning pʋgẽ fo sẽn yitã. 31 Mam na n kiiga m sũ-puugrã fo zugu. Mam na n fʋʋsa m sũ-pu-kãsengã bugum fo zugu. Mam na n dɩka foo n ning nin-toos nusẽ, neb sẽn mi sãoong nusẽ.+ 32 Fo na n lebga wa bũmb b sẽn ningd bugmẽ sẽn na yɩl t’a wid sõma.+ Fo zɩɩmã na n daaga soolmã pʋgẽ. B pa na n le tẽeg fo yell ye. Bala yaa maam a Zeova meng n gome.’”